ເພື່ອເຮັດໃຫ້ການຫຼິ້ນບຸນກຸດສົງການປີໃໝ່ລາວ ປະຈຳ ພສ 2559 ໄດ້ຮັບການອານຸລັກຮັກສາ ແລະສືບທອດຄຸນຄ່າທາງດ້ານວັດທະນະທຳອັນດີງາມ, ມີຄວາມເປັນລະບຽບຮຽບຮ້ອຍ, ມີຄວາມສະຫງົບ, ປອດໄພ ແລະມີບັນຍາກາດເບີກບານມ່ວນຊື່ນໃນການຫຼິ້ນ, ທ່ານເຈົ້າເມືອງໆຫຼວງພະບາງໄດ້ອອກລະບຽບການຢ່າງເຂັ້ມງວດ.
ທ່ານ ສຸກັນ ບຸນຍົງ ເຈົ້າເມືອງໆຫຼວງພະບາງໄດ້ໃຫ້ສຳພາດຕໍ່ທີມຂ່າວພວກເຮົາໃນວັນທີ 6 ເມສາຜ່ານມານີ້ຮູ້ວ່າ: ລະບຽບການຫຼີ້ນບຸນປີໃໝ່ທີ່ເມືອງຫຼວງພະບາງປະກອບມີ: 1) ວ່າດ້ວຍການຫົດສົງນ້ຳ: ກ່ອນຈະຫົດນ້ຳບຸກຄົນໃດໜຶ່ງຕ້ອງຂໍອານຸຍາດເສຍກ່ອນຈິ່ງຫົດ, ຕ້ອງຫົດແຕ່ຕົນຕົວເທົ່ານັ້ນບໍ່ຄວນຫົດຫົວ ແລະຫົດດ້ວຍການສາດນ້ຳໃສ່, ນ້ຳທີ່ນຳມາຫົດສົງກັນຕ້ອງເປັນນຳທີ່ສະອາດ, ຫ້າມບໍ່ໃຫ້ນຳເອົານ້ຳທີ່ປະສົມທາດເຄມີ-ນ້ຳສີ-ນ້ຳມັນເຄື່ອງຈັກ-ນ້ຳມັນປຸງແຕ່ງອາຫານ-ນ້ຳກ້ອນມາຫົດສົງກັນ, ຫ້າມເອົາອ່າງນ້ຳ-ຖັງນ້ຳ-ຕໍ່ທໍ່ນ້ຳອອກມາຕັ້ງແຄມທາງ ແລະລັດທາງ ເພື່ອຫົດນ້ຳກັນ ຊຶ່ງເປັນການກີດຂວາງການສັນຈອນຫ້າມຫົດນ້ຳກັນໂດຍສວຍໂອກາດລ່ວງລະເມີດດ້ານຮ່າງກາຍຜູ້ອື່ນ ໂດຍສະເພາະເພດກົງກັນຂ້າມ, ຫ້າມນຳເອົານ້ຳສີຂີ້ມິ້ນໝໍ້ຂີ້ຕົມແປ້ງມາທາກັນ. 2) ການແຕ່ງກາຍ ໃນການເຂົ້າຮ່ວມບຸນເຊັ່ນ: ການໂລະລາດຊົມເຊີຍປະກວດນາງສັງຂານໄປສົງນ້ຳພະພຸດທະຮູບຕ້ອງໃຫ້ສອດຄ່ອງກັບວັດທະນະທຳອັນດີງາມຂອງຊາວຫຼວງພະບາງພວກເຮົາ, 3) ການນຳໃຊ້ພາຫະນະສັນຈອນຕາມທ້ອງຖະໜົນ: ພາຫະນະທີ່ສັນຈອນຕາມຖະໜົນຕ້ອງ ປະຕິບັດກົດລະບຽບການສັນຈອນຢ່າງ ເຂັ້ມງວດ, 4) ການຈັດງານມ່ວນຊື່ນໃນ ເວລາງານບຸນ: ສະຖານທີ່ບັນເທີງ, ກາ ລາໂອເກະ, ງານລາຕີສະໂມສອນ, ວົງດົນຕີ, ຕ້ອງປິດການບໍລິການບໍ່ໃຫ້ເກີນ 23:30 ໂມງ, 5) ການເຂົ້າຮ່ວມຊົມ-ຮ່ວມເຊຍຢູ່ງານປະກວດຄັດເລືອກນາງ ສັງຂານຕ້ອງໃຫ້ມີຄວາມເປັນລະບຽບ ຮຽບຮ້ອຍມີຄວາມມ່ວນຊື່ນມີຄວາມສະຫງົບ, ບໍ່ເຍາະເຍີ້ຍສຽດສີກັນດ້ວຍວາຈາບໍ່ສຸພາບຫຍາບຄາຍທີ່ຈະພາໃຫ້ເກີດຂໍ້ຂັດແຍ່ງແຕກແຍກຄວາມສາມັກຄີກັນ, 6) ແຕ່ລະສຳນັກງານອົງການບ້ານຕ່າງໆຕ້ອງຈັດຕັ້ງການປ້ອງກັນເວນຍາມ, ແຕ່ລະຄອບຄົວທີ່ອອກໄປທ່ຽວຫຼິ້ນບຸນຄວນມີຜູ້ເຝົ້າເຮືອນ, ຖ້າມີຄວາມຈຳເປັນກ່ອນອອກຈາກເຮືອນໄປຕ້ອງມອດໄຟ ອັດປະຕູໃສ່ກະແຈໃຫ້ລະອຽດເສຍກ່ອນຈິ່ງໄປ. 7) ຫ້າມສວຍໃຊ້ໂອກາດຍາມບຸນເຕົ້າໂຮມຄົນ ເພື່ອເປົ້າໝາຍເຄື່ອນໄຫວທາງການເມືອງທີ່ຂັດຕໍ່ແນວທາງຂອງພັກກົດໝາຍຂອງລັດ, ມົ້ວສຸມຫຼິ້ນການພະນັນຢາເສບຕິດ ແລະການຄ້າປະເວນີ. 8) ການຄຸ້ມຄອງລາຄາ: ຫ້າມບໍ່ໃຫ້ຂຶ້ນລາຄາບ້ານພັກ, ໂຮງແຮມ-ລີສອດ, ຮ້ານອາຫານ, ເຄື່ອງບໍລິໂພກ, ອຸປະໂພກ, ລົດໂດຍສານທຸກປະເພດ, ເຮືອ ໂດຍສານທຸກປະເພດ ແລະລາຄາສິນຄ້າອື່ນໆເປັນເດັດຂາດ, 9) ຫ້າມເອົາສີ ຕ່າງໆໝາຍກາງທາງ, ແຄມທາງ, ແຄມຮົ້ວ, ກົກເສົາ ແລະບ່ອນອື່ນເພື່ອໝາຍບ່ອນຂາຍເຄື່ອງມື້ວັນບຸນເປັນເດັດຂາດ, ຖ້າຜູ້ໃດຫາກເຮັດລ່ວງເກີນ ເມື່ອຮູ້ຕາມຫຼັງຈະມີການປັບໃໝຕາມລະບຽບບ້ານເມືອງ, 10) ການພັກລັດຖະການ: ງານບຸນປີໃໝ່ລາວປີນີ້ມີ 2 ຫົນ ( ເນົາ 2 ມື້) ແລະສຳລັບພະນັກງານຈະໄດ້ພັກວຽກລັດຖະການ 4 ວັນ ແຕ່ວັນທີ 13-16 ເດືອນເມສາປີ 2016.
ສຳລັບການຈັດຕັ້ງປະຕິບັດແມ່ນໄດ້ມອບໃຫ້ທຸກການຈັດຕັ້ງຂອງພັກ-ລັດ- ປກສ ເມືອງ, ອົງການປົກຄອງບ້ານເຜີຍແຜ່ລະບຽບທຸກກໍລະນີທີ່ເກີດຂຶ້ນ ຊຶ່ງເປັນ ການລະເມີດລະບຽບການທີ່ກຳນົດອອກມອບໃຫ້ເຈົ້າໜ້າທີ່ ປກສ ເມືອງ ປກສ ບໍລິການປະຊາຊົນອົງການຄຸ້ມຄອງທີ່ກ່ຽວຂ້ອງປະສານສົມທົບກັບອຳນາດການປົກຄອງບ້ານດຳເນີນມາດຕະການທາງວິໄນຕໍ່ຜູ້ລະເມີດຕາມຂໍ້ກຳນົດກົດລະບຽບຢ່າງເຂັ້ມງວດ ແລະເດັດຂາດ ແລະ ກໍລະນີຮ້າຍແຮງຕ້ອງດຳເນີນຄະດີຕາມກົດໝາຍ.
ທີ່ມາ: