ເຈົ້າ​ໜ້າ​ທີ່​ຈະລາ​ຈອນ​ທາງ​ອາກາດປະ​ທ້ວງ ກະທົບ​ຖ້ຽວ​ບິນ​​ເກຣກ

0
1759

ທ່າ​ອາກາດສະຍານ​ເອ​ເທິ​ນຖະ​ແຫຼ​ງວ່າ ຖ້ຽວບິນ​ໃນ​ເກຣກຢຸດ​ສະຫງັດ​ໃນ​ມື້​ນີ້ ພາຍຫລັງ​​ເຈົ້າ​ໜ້າ​ທີ່​ຄວບ​ຄຸມ​ການ​ຈະລາຈອນ​ທາງ​ອາກາດ​ນັດ​ຢຸດ​ງານ​ປະ​ທ້ວງ​ເປັນ​ເວລາ 24 ຊົ່ວ​ໂມງ​ຈາກ​ແຜນ​ປະຕິຮູບ​ລະບົບ​ບຳນານ​ຕາມ​ຂໍ້​ຮຽກ​ຮ້ອງ​ຂອງ​ກຸ່ມ​ຜູ້​ໃຫ້​ເງິນ​ກູ້​ເກ​ຣກ.

ຖະ​ແຫຼງລະບຸ​ວ່າ ການ​ປະ​ທ້ວງ​ສົ່ງ​ຜົນ​ກະທົບ​ຕໍ່​ເນື່ອງ​ຖ້ຽວ​ບິນ​ທັງ​ຂາ​ເຂົ້າ ​ແລະ​ອອກ​ທັງ​ໝົດ ​ໂດຍ​ຈະ​ສິ້ນສຸດ​ລົງ​ໃນ​ຄ່ຳ​ມື້​ນີ້ເວລາ​ທ້ອງ​ຖິ່ນ, ການ​ປະ​ທ້ວງ​ເທື່ອ​ນີ້ລວມ​ເຖິງ​ເຈົ້າ​ໜ້າ​ທີ່​ສຳນັກງານ​ລັດຖະບານ ​ໂຮງຮຽນ ​ແລະ ​ໂຮງໝໍ​ນຳ ​ເຊັ່ນ​ດຽວ​ກັບ​ສຳນັກງານ​ສື່ໃນ​​ເກຣກ​ທີ່​ຢຸດງານ​ປະ​ທ້ວງ ​ເຮັດ​​ໃຫ້​ຕ້ອງ​ງົດ​ອອກ​ອາກາດ​ຂ່າວ​ທາງ​ສະຖານີ ​ແລະ​ເວັບ​ໄຊ ທັງ​ນີ້​ກຸ່ມ​ເຈົ້າ​ໜີ້​ເກຣກຂໍ​ໃຫ້​ເກຣກປະຕິຮູບ​ລະບົບ​ບຳນານ ​ແລະ​ພາສີ ​ເພື່ອ​ແລກປ່ຽນ​ກັບ​ການ​ໄດ້​ຮັບ​ເງິນ​ກູ້ປົດ​ໜີ້​ສິນ​ຈຳນວນ​ຫຼາຍ​ຂອງ​​ເກຣກຕັ້ງ​ແຕ່​ເດືອນ​ກໍລະກົດ​ປີ​ທີ່​ຜ່ານ​ມາ.