ແຫລ່ງຂ່າວໃນສະພາບເອີຣົບ (ອີຢູ) ເຜີຍວ່າ ຄະນະກຳມາທິການເອີຣົບກຳລັງພິຈາລະນາເລື່ອງຈະກຳນົດໃຫ້ຊາວອາເມລິກາ ແລະຊາວການາດາຕ້ອງຂໍກວດກາໜັງສືເດີນທາງ ຫຼື ວີຊາ ກ່ອນເຂົ້າອີຢູ ເພື່ອຕອບໂຕ້ທີ່ທັງສອງປະເທດນີ້ຍັງກຳນົດໃຫ້ສະມາຊິກອີຢູບາງປະເທດຕ້ອງຂໍວີຊາເຂົ້າປະເທດ.
ແຫລ່ງຂ່າວເຜີຍວ່າ ຄະນະກຳມາທິການເອີຣົບຊຶ່ງເປັນໜ່ວຍງານບໍລິຫານຂອງອີຢູຈະຫາລືເລື່ອງນີ້ໃນວັນອັງຄານໜ້າ ໜຶ່ງອາທິດກ່ອນທີ່ປະທານາທິບໍດີບາຣັກ ໂອບາມາຂອງສະຫະລັດຈະຢ້ຽມຢາມອີຢູ ຊຶ່ງຄາດວ່າຈະຫາລືເລື່ອງຄວາມເປັນຫຸ້ນສ່ວນການຄ້າ ແລະການລົງທຶນຂ້າມມະຫາສະໝຸດອັດລັງຕິກ (ທີທີໄອພີ) ນຳ.
ສະຫະລັດ ແລະ ການາດາກຳນົດໃຫ້ຣູມານີ ແລະບຸລກາຣີ ຊຶ່ງເປັນສະມາຊິກອີຢູໃນປີ 2007 ຈະຕ້ອງຂໍວີຊາເຂົາປະເທດ ອີກທັງຍັງບໍ່ອະນຸຍາດໃຫ້ສະມາຊິກອີຢູອີກ 3 ປະເທດຈາກທັງໝົດ 28 ປະເທດຄືໂຄຣເອເຊຍ, ໄຊປຣັສ ແລະໂປໂລຍ ເຂົ້າຮ່ວມໂຄງການຍົກເວັ້ນວີຊາໃຫ້ແກ່ສະມາຊິກອີຢູນຳ ປະຈຸບັນໂປໂລຍເປັນສະມາຊິກຄວາມຕົກລົງເຊງເກນ 26 ປະເທດທີ່ອະນຸຍາດໃຫ້ສະມາຊິກໃນກຸ່ມເດີນທາງລະຫວ່າງກັນໂດຍບໍ່ຕ້ອງຖືໜັງສືເດີນທາງ ສ່ວນອີກ 4 ປະເທດທີ່ສະຫະລັດ ແລະການາດາກໍານົດໃຫ້ຕ້ອງຂໍວີຊາຢູ່ລະຫວ່າງກຽມເຂົ້າເປັນສະມາຊິກເຊງເກນ.