ສຳລັບຄົນມັກລືມມ່າເຂົ້າເປັນປະຈຳຕ້ອງອ່ານ ເຮົາມີເຄັດລັບດີໆກ່ຽວກັບວີທີໜຶ້ງເຂົ້າແບບບໍ່ຕ້ອງໝ່າ ມາຝາກ ເຊິ່ງເຄັດລັບນີ້ໄດ້ຖືກເປີດເຜີຍໃນເຟສບຸກ ວາລະສານ ມະຫາຊົນ ອ່ານແລ້ວມັນເປັນຄວາມຮູ້ທີ່ມີປະໂຫຍດດີ ລາວໂພສຕ໌ເລີຍຂໍນຳມາແບ່ງປັນໃຫ້ເພື່ອນໃນເພສໄດ້ອ່ານກັນ ເຊິ່ງຈະມີຂັ້ນຕອນການເຮັດແນວໃດນັ້ນເຮົາມາເບິ່ງກັນເລີຍ.
ວິທີເຮັດ
ເອົານ້ຳໃສ່ຫມໍ້ຫນຶ້ງ ໃສ່ຫລາຍເທົ່າກັບສອງເທື່ອຂອງການຫນຶ້ງປົກກະຕິ
– ລ້າງເຂົ້າໃຫ້ສະອາດດ້ວຍນ້ຳສະອາດປະມານ 2-3 ນໍ້າ
– ເອົາເຂົ້າໃສ່ຫວດຕາມປົກກະຕິ ລໍຖ້າຈັກຫນ້ອຍເພື່ອໃຫ້ມັນສະເດັດນ້ຳກ່ອນ.
– ນຳເອົາໄປຫນຶ້ງຄືປົກກະຕິ ເອົາຝາຫມໍ້ງຳໄວ້.
– ເມື່ອເຫັນອາຍຂຶ້ນທົ່ວແລ້ວ ບຶດຫນຶ້ງໃຫ້ປົງລົງ ເອົາເຂົ້າໄປລ້າງດ້ວຍນ້ຳສະອາດ (ລ້າງຄາຫວດເລີຍກໍໄດ້) ລ້າງໃຫ້ທົ່ວ ແລະ ບີບເຂົ້າທີ່ຈັບໂຕກັນເປັນກ້ອນໃຫ້ແຕກອອກເປັນເມັດໃຜ ເມັດມັນ. ລໍຖ້າໃຫ້ສະເດັດນ້ຳກ່ອນບຶດຫນຶ່ງ.
– ເອົາໄປຫນຶ້ງອີກຄັ້ງຕາມປົກກະຕິ ກະວ່າເຂົ້າສຸກແລ້ວໃຫ້ເອົາໄມ້ກະດ້າມຫລືບ່ວງຈົກເບິ່ງ ເພື່ອ ໃຫ້ແນ່ໃຈວ່າເຂົ້າສຸກດີ, ເມື່ອເຂົ້າສຸກແລ້ວກໍປົງລົງຊວ່າຍເຂົ້າລົງກະຕິບເຂົ້າ ກິນໄດ້ຕາມປົກກະຕິ ແລະ ເຂົ້າຈະມີກິ່ນຫອມ ແລະ ລົດຊາດແຊບດີ (ລອງເຮັດເບິ່ງ ຖ້າບໍ່ແນ່ໃຈກໍລອງຫນຶ້ງເບິ່ງຫນ້ອຍຫນຶ່ງກ່ອນກໍໄດ້ເດີ!).
ຂໍ້ມູນຈາກ: ວາລະສານ ມະຫາຊົນ