ໃນຕອນແລງວັນທີ 31 ມີນາ 2016 ຜ່ານມາ ພະແນກແຜນການ ແລະ ການລົງທຶນແຂວງຫົວພັນ ສົມທົບກັບ ບໍລິສັດລ້ອງແຈ້ງພັດທະນາກໍ່ສ້າງຈຳກັດ ໄດ້ຈັດພິທີເຊັນບົດບັນທຶກຄວາມເຂົ້າໃຈ (MOU) ໃນການກໍ່ສ້າງເຂື່ອນໄຟຟ້ານ້ຳຕົກຂະໜາດນ້ອຍ ນ້ຳແຕບ ບ້ານແຕບ ເມືອງຊຳໃຕ້ ແຂວງຫົວພັນ ຢູ່ທີ່ຫ້ອງປະຊຸມພະແນກແຜນການ ແລະ ການລົງທຶນແຂວງ ເຊິ່ງໂຄງການສຶກສາ ສຳຫຼວດຄວາມເປັນໄປໄດ້ໃນການພັດທະນາເຂື່ອນໄຟຟ້ານ້ຳຕົກນ້ຳແຕບ ເມືອງຊຳໃຕ້ ແຂວງຫົວພັນ ເປັນໂຄງການນຶ່ງທີ່ນອນຢູ່ໃນ 5 ທ່າແຮງຂອງແຂວງ ພ້ອມກັນນັ້ນ ກໍເປັນໂຄງການນຶ່ງທີ່ຈັດຕັ້ງຜັນຂະຫຽາຍແຜນພັດທະນາເສດຖະກິດສັງຄົມໃຫ້ໄປຕາມທິດອຸດສາຫະກຳ ແລະ ທັນສະໄໝ ເຮັດໃຫ້ໂຄງປະກອບເສດຖະກິດຄ່ອຍຫັນປ່ຽນຈາກຈາກຂົງເຂດກະສິກຳກວມອັດຕາສ່ວນຫຼາຍ ແລະ ເຂົ້າສູ່ຂົງເຂດອຸດສາຫະກຳ-ການບໍລິການເພີ່ມຂື້ນ ໂຄງການດັ່ງກ່າວມີໄລຍະການສຳຫຼວດ 12 ເດືອນ ທາງບໍລິສັດເຫັນດີວາງເງິນຄ້ຳປະກັນບົດບັນທຶກຄວາມເຂົ້າໃຈຈຳນວນ 10.000 ໂດລາສະຫະລັດ ຖ້າການສຳຫຼວດ ກໍ່ສ້າງເຂື່ອນໄຟຟ້ານີ້ສຳເລັດ ຈະສາມາດຜະລິດກະແສໄຟຟ້າສະໜອງໃຫ້ແກ່ປະຊາຊົນພາຍໃນແຂວງຫົວພັນເວົ້າຮວມ ເວົ້າສະເພາະເມືອງຊຳໃຕ້ ໃຫ້ມີຄວາມສະດວກດີຂື້ນກວ່າເກົ່າ.

ຮ່ວມລົງນາມເຊັນບົດບັນທຶກໃນຄັ້ງນີ້ມີທ່ານ ພູວົງ ສີສົມຮັກ ກຳມະການພັກແຂວງ ຫົວໜ້າພະແນກແຜນການ ແລະ ການລົງທຶນແຂວງ ທ່ານ ທອງສຸກ ສົມພາວັນ ຮັກສາການຫົວໜ້າພະແນກພະລັງງານ ແລະ ບໍ່ແຮ່ແຂວງຫົວພັນ ແລະ ທ່ານ ຖາວອນ ອາດສະມຸດ ອຳນວຍການບໍລິສັດລ້ອງແຈ້ງພັດທະນາກໍ່ສ້າງຈຳກັດ ໂດຍການເປັນກຽດເຂົ້າຮ່ວມເປັນສັກຂີພະຍານຂອງທ່ານ ພູໂຊນ ທຳມະວິໄຊ ກຳມະການປະຈຳພັກແຂວງ ຮອງເຈົ້າແຂວງໆຫົວພັນ ຜູ້ຊີ້ນຳຂົງເຂດວຽກງານວັດທະນະທຳ-ສັງຄົມຂັ້ນແຂວງ ມີບັນດາທ່ານການນຳຂັ້ນແຂວງ ເມືອງຊຳໃຕ້ ຫົວໜ້າ-ຮອງຫົວໜ້າຫ້ອງການທຽບເທົ່າອ້ອມຂ້າງແຂວງ ພ້ອມດ້ວຍພະນັກງານວິຊາການທັງສອງຝ່າຍເຂົ້າຮ່ວມ.

ຂ່າວ/ພາບ: ນິດຖະໜອມ

ຂ່າວຈາກ: ວິທະຍຸ-ໂທລະພາບນະຄອນຫຼວງ