ວັນທີ 31 ມີນາ 2016 ທີ່ແຂວງຫົວພັນພະແນກແຜນການ ແລະ ການລົງທຶນແຂວງ ແລະບໍລິສັດລ້ອງແຈ້ງພັດທະນາກໍ່ສ້າງຈຳກັດໄດ້ຈັດພິທີເຊັນບົດບັນທຶກຄວາມເຂົ້າໃຈການກໍ່ສ້າງເຂື່ອນໄຟຟ້ານ້ຳຕົກຂະໜາດນ້ອຍນ້ຳແຕບບ້ານແຕບເມືອງຊຳໃຕ້.
ຊຶ່ງຮ່ວມລົງນາມຂອງທ່ານ ພູວົງ ສີສົມຮັກ ຫົວໜ້າພະແນກແຜນການແລະການລົງທຶນແຂວງ, ທ່ານ ທອງສຸກ ສົມພາວັນ ຮັກສາການຫົວໜ້າພະແນກພະລັງງານແລະບໍ່ແຮ່ກັບທ່ານຖາວອນອາດສະມຸດອຳນວຍການບໍລິສັດລ້ອງແຈ້ງພັດທະນາກໍ່ສ້າງຈຳກັດໂດຍມີທ່ານ ພູໂຊນ ທຳມະວິໄຊ ຮອງເຈົ້າແຂວງໆຫົວພັນທັງເປັນຜູ້ຊີ້ນຳຂົງເຂດວຽກງານວັດທະນະທຳ-ສັງຄົມຂັ້ນແຂວງ, ພ້ອມດ້ວຍບັນດາທ່ານການນຳຂັ້ນແຂວງ, ເມືອງຊຳໃຕ້, ຫົວໜ້າ-ຮອງຫົວໜ້າຕະຫຼອດຮອດພະນັກງານວິຊາການທັງສອງຝ່າຍເຂົ້າຮ່ວມເປັນສັກຂີພິຍານນຳ.
ໂຄງການສຶກສາສຳຫຼວດຄວາມເປັນໄປໄດ້ໃນການພັດທະນາເຂື່ອນໄຟຟ້ານ້ຳຕົກນ້ຳແຕບເປັນໂຄງການໜຶ່ງທີ່ນອນຢູ່ໃນ 5 ທ່າແຮງຂອງແຂວງຫົວພັນພ້ອມກັນນັ້ນກໍເປັນໂຄງການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມໃຫ້ໄປຕາມທິດອຸດສາຫະກຳແລະທັນສະໄໝ, ເຮັດໃຫ້ໂຄງປະກອບເສດຖະກິດຄ່ອຍຫັນປ່ຽນຈາກຂົງເຂດກະສິກຳກວມອັດຕາສ່ວນຫຼາຍແລະເຂົ້າສູ່ຂົງເຂດອຸດສາຫະກຳແລະການບໍລິການເພີ່ມຂຶ້ນ.
ໂຄງການນີ້ມີໄລຍະການສຳຫຼວດ 12 ເດືອນຊຶ່ງທາງບໍລິສັດໄດ້ວາງເງິນຄ້ຳປະກັນຈຳນວນ 10 ພັນໂລາສະຫະລັດແລະຖ້າການສຳຫຼວດສຳເລັດມີຜົນທາງເສດຖະກິດຈະສາມາດຜະລິດກະແສໄຟຟ້າສະໜອງໃຫ້ແກ່ປະຊາຊົນພາຍໃນແຂວງຫົວພັນເວົ້າສະເພາະເມືອງຊຳໃຕ້ໃຫ້ມີຄວາມສະດວກຂຶ້ນກວ່າເກົ່າໃນອະນາຄົດ.
ທີ່ມາ: