ວັນທີ 2 ພຶດສະພາ 2014 ທີ່ກະຊວງການຕ່າງປະເທດ ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ ລັດຖະມົນຕີວ່າການ ກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ຣີສັງກວນ ເອກອັກຄະລັດຖະທູດຜູ້ມີອຳນາດເຕັມແຫ່ງ ສາທາລະນະລັດ ປະຊາຊົນ ປະຊາທິປະໄຕ ເກົາຫຼີ (ສປປ ເກົາຫຼີ) ຄົນໃໝ່ ປະຈຳ ສປປ ລາວ.
ໂອກາດດັ່ງກ່າວນີ້ ທ່ານຮອງນາຍົກລັດຖະມົນຕີ ໄດ້ສະແດງຄວາມຊົມເຊີຍ ແລະ ຍິນດີຕໍ່ການມາຮັບໜ້າທີ່ເປັນທູດ ສປປ ເກົາຫຼີ ຄົນໃໝ່ ປະຈຳ ສປປ ລາວ ຂອງທ່ານ ຣີສັງກວນ ຄັ້ງນີ້ ເຊິ່ງຈະເປັນການສືບຕໍ່ເພີ່ມທະວີສາຍພົວພັນມິດຕະພາບ ລະຫວ່າງສອງປະເທດທີ່ມີມາແລ້ວ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ ຄຽງຄູ່ກັບການພັດທະນາການຮ່ວມມືໃນຍຸກໃໝ່ ໃຫ້ນັບມື້ແຕກດອກອອກຜົນ ເພື່ອນຳເອົາຜົນປະໂຫຍດມາສູ່ປະຊາຊົນສອງຊາດລາວ ແລະ ສປປ ເກົາຫຼີ ພ້ອມກັນນັ້ນ ທ່ານຍັງໄດ້ອວຍພອນໃຫ້ທ່ານທູດ ຈົ່ງປະສົບຜົນສຳເລັດ ໃນການມາປະຕິບັດໜ້າທີ່ຢູ່ລາວ ຄັ້ງນີ້.
ທ່ານ ຣີສັງກວນ ທູດ ສປປ ເກົາຫຼີ ຄົນໃໝ່ ໄດ້ສະແດງຄວາມຂອບໃຈ ມາຍັງທ່ານຮອງນາຍົກລັດຖະມົນຕີ ລັດຖະມົນຕີວ່າການ ກະຊວງການຕ່າງປະເທດ ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ຜົນສຳເລັດ ໃນການພົວພັນຮ່ວມມືລະຫວ່າງ ສປປ ລາວ ແລະ ສປປ ເກົາຫຼີ ໃນໄລຍະຜ່ານມາ ກໍ່ຄືໃນສະເພາະໜ້າ ພ້ອມທັງແຈ້ງສະພາບການພັດທະນາເສດຖະກິດ-ສັງຄົມຂອງ ສປປ ເກົາຫຼີ ໂດຍຫຍໍ້ ຕໍ່ທ່ານຮອງນາຍົກລັດຖະມົນຕີຊາບ ແລະ ໃນໂອກາດດັ່ງກ່າວ ທ່ານໄດ້ຢືນຢັນວ່າ: ໃນໄລຍະປະຈຳຢູ່ລາວ ທ່ານຈະປະຕິບັດໜ້າທີ່ອັນມີກຽດຂອງຕົນ ດ້ວຍຄວາມຕັ້ງໜ້າ ຫ້າວຫັນ ແລະ ປະສົບຜົນສຳເລັດ.
ທີ່ມາ http://www.vientianemai.net/teen/khao/1/11711