ເພື່ອປະຕິບັດຕາມທິດຊີ້ນຳຂອງທ່ານເຈົ້າແຂວງໆຫຼວງພະບາງ ແລະ ແຜນຜັງປົກປັກຮັກສາ ແລະເຮັດໃຫ້ຄຸນຄ່າຂອງເມືອງມໍລະດົກໂລກມີຄວາມຍືນຍົງທາງພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງ ຮ່ວມກັບວິຊາການຫ້ອງການມໍລະດົກໂລກພ້ອມດ້ວຍຫົວໜ່ວຍສະເພາະກິດທີ່ກ່ຽວຂ້ອງລົງກວດກາປ້າຍໂຄສະນາຕ່າງໆໃນເຂດເທສະບານເມືອງຫຼວງພະບາງເຂດມໍລະດົກໂລກພົບປ້າຍທີ່ບໍ່ໄດ້ຮັບອະນຸຍາດມີທັງໝົດ 22 ປ້າຍຊຶ່ງທາງເຈົ້າໜ້າທີ່ສະເພາະກິດໄດ້ລົງມືຮື້ຖອນປ້າຍຢູ່ຖະໜົນໄກສອນພົມວິຫານເລີ່ມແຕ່ວັນທີ 25 ມີນາ 2016 ຜ່ານມານີ້.
ທ່ານ ສົມບູນ ແກ້ວດວງຈິດ ຫົວໜ້າໜ່ວຍງານວັດທະນະທຳມະຫາຊົນ, ທັງເປັນຄະນະຄຸ້ມຄອງກວດກາວຽກງານວັດທະນະທຳ, ປ້າຍ, ເກມ ແລະການ ບັນເທີງໄດ້ໃຫ້ສຳພາດຕໍ່ທີມຂ່າວພວກເຮົາຮູ້ວ່າ: ຈຸດປະສົງໃນການເລີກຮື້ປ້າຍຂອງຫົວໜ່ວຍທຸລະກິດໃນຄັ້ງນີ້ແມ່ນເພື່ອປະຕິບັດຕາມທິດຊີ້ນຳຂອງທ່ານເຈົ້າແຂວງໆຫຼວງພະບາງ ແລະແຜນຜັງປົກປັກຮັກສາເຮັດຄຸນຄ່າຂອງເມືອງມໍລະດົກໂລກມີຄວາມຍືນຍົງທາງເຈົ້າໜ້າທີ່ໜ່ວຍສະເພາະກິດກວດກາວັດທະນະທຳປະກອບມີ: ພະແນກ ຖວທ, ຫ້ອງ ການມໍລະດົກ, ພະແນກໂຍທາທິການ ແລະຂົນສົ່ງ, ອົງການພັດທະນາ ແລະ ບໍລິຫານຕົວເມືອງ, ເຈົ້າໜ້າທີ່ປ້ອງກັນ ຄວາມສະຫງົບພ້ອມດ້ວຍອຳນາດການ ປົກຄອງບ້ານແຕ່ລະບ້ານໄດ້ລົງກວດກາປ້າຍທີ່ບໍ່ໄດ້ຮັບອະນຸຍາດຂອງຫົວໜ່ວຍທຸລະກິດທີ່ບໍ່ຖືກຕ້ອງຕາມລະບຽບ ຢູ່ຖະໜົນໄກສອນພົມວິຫານພົບປ້າຍທີ່ບໍ່ຖືກຕ້ອງທັງໝົດ 22 ປ້າຍ ແລະ ໄດ້ເລີ່ມລົງມືຮື້ຖອນປ້າຍເລີ່ມແຕ່ວັນທີ 25 ມີນາ 2016 ຜ່ານມານີ້. ປະຈຸບັນນີ້ທາງ ເຈົ້າໜາທີ່ກຳລັງສືບຕໍ່ຮື້ຖອນໃຫ້ສຳເລັດໃນໄວໆນີ້.
ສຳລັບປ້າຍໂຄສະນາຕ່າງໆຂອງຫົວໜ່ວຍທຸລະກິດຢູ່ເຂດມໍລະດົກຈະໃຫ້ເຮັດເປັນປ້າຍໄມ້, ໂຕໜັງສືຂອງລາວ ໃຫ້ໃຫຍ່ກວ່າໂຕໜັງສືສາກົນທັງນີ້ກໍເພື່ອຄວາມເປັນລະບຽບຮຽບຮ້ອຍໃນເຂດຕົວເມືອງໂດຍສະເພາະແມ່ນເຂດມໍລະດົກໂລກຄຸ້ມຄອງແນໃສ່ເຮັດໃຫ້ເມືອງຫຼວງພະບາງເມືອງຍອດນິຍົມແຫ່ງການທ່ອງທ່ຽວຂອງໂລກກາຍເປັນສະເໜດຶງດູດການທ່ອງທ່ຽວໃຫ້ນັບມື້ນັບຫຼາຍຂຶ້ນໃນແຕ່ລະປີ.
ທີ່ມາ: 