ສູນຮ່ວມມືພັດທະນາວິທະຍາສາດ-ເຕັກໂນໂລຊີ ຂໍ້ມູນຂ່າວສານ ແຂວງຫຼວງພະບາງ ຈະກາຍເປັນສ່ວນນຶ່ງໃນການປະກອບສ່ວນຊ່ອຍສ້າງຊັບພະຍາກອນມະນຸດໃນການຊຸກຍູ້ ສົ່ງເສີມພັດທະນາ ແລະ ເຝິກອົບຮົມທາງດ້ານວຽກງານວິທະຍາສາດ-ເຕັກໂນໂລຊີຂໍ້ມູນຂ່າວສານ ເພື່ອຍົກລະດັບຄວາມຮູ້ ຄວາມສາມາດໃຫ້ແກ່ພະນັກງານ ທະຫານ ຕໍາຫຼວດ ແລະ ປະຊາຊົນພາຍໃນແຂວງຫຼວງພະບາງ ໃຫ້ສາມາດເຂົ້າເຖິງຂໍ້ມູນຂ່າວສານໄວຂຶ້ນໂດຍຜ່ານທາງສື່ເອເລັກໂຕຣນິກ.

ທ່ານ ສິງຄໍາ ພົມມະລັດ ຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງຫຼວງພະບາງ ໄດ້ໃຫ້ຮູ້ວ່າ ການສ້າງສູນຮ່ວມມືພັດທະນາວິທະຍາສາດ-ເຕັກໂນໂລຊີ ຂໍ້ມູນຂ່າວສານ ແຂວງຫຼວງພະບາງ ແມ່ນເພື່ອປະຕິບັດຕາມພາລະບົດບາດ ສິດໜ້າທີ່ ແລະ ການເຄື່ອນໄຫວຂອງພະແນກວິທະຍາສາດ ແລະ ເຕັກໂນໂລຊີ ເຊິ່ງມີພາລະບົດບາດເປັນເສນາທິການໃຫ້ແກ່ການນໍາຂອງແຂວງ ແລະ ພະແນກການຕ່າງໆໃນການສະໜອງຂໍ້ມູນຂ່າວສານທາງດ້ານເຕັກໂນໂລຊີໃໝ່ໆ ທັງຕິດຕາມຕີລາຄາ ແລະ ລາຍງານສະພາບການ ພ້ອມທັງປຸກຈິດສໍານຶກ ຮວມທັງວຽກງານສາມສ້າງຕາມນະໂຍບາຍຂອງພັກ ແລະ ລັດຖະບານວາງອອກ ພ້ອມນີ້ ສູນດັ່ງກ່າວຍັງຈະເປັນສະຖານທີ່ສ້າງຊັບພະຍາກອນມະນຸດໃນການຊຸກຍູ້ ສົ່ງເສີມພັດທະນາ ແລະ ເຝິກອົບຮົມທາງດ້ານວຽກງານວິທະຍາສາດ-ເຕັກໂນໂລຊີຂໍ້ມູນຂ່າວສານ ເປັນການຍົກລະດັບຄວາມຮູ້ ຄວາມສາມາດໃຫ້ແກ່ທຸກພາກສ່ວນໃນສັງຄົມໃນ 12 ເມືອງທົ່ວແຂວງ ທັງເປັນການສ້າງຈິດສໍານຶກ ຮວມທັງສ້າງຂະບວນການກ່ຽວກັບວຽກງານຕ່າງໆທີ່ຕິດພັນກັບເຕັກໂນໂລຊີຂໍ້ມູນຂ່າວສານ ຂໍ້ມູນເອເລັກໂຕຣນິກ ດັ່ງນັ້ນ ສູນດັ່ງກ່າວຫຼັງຈາກທີ່ໄດ້ໄຂໃຫ້ບໍລິການແລ້ວ ຈະສາມາດຊ່ອຍໃຫ້ການອັບເດດຄວາມຮູ້ ຄວາມສາມາດແກ່ບຸກຄະລາກອນ ໃຫ້ສາມາດນໍາໃຊ້ຄອມພີວເຕີ ແລະ ສາມາດເຂົ້າເຖິງທາງດ້ານຂໍ້ມູນຂ່າວສານທາງສື່ເອເລັກໂຕຣນິກ ດ້ວຍເຕັກໂນໂລຊີທີ່ທັນສະໄໝ.