ລະຫວ່າງວັນທີ 29-31 ມີນາ 2016 ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ສປປ ລາວ ເປັນເຈົ້າພາບຈັດກອງປະຊຸມຄະນະວິຊາການຂົນສົ່ງທາງອາກາດອາຊຽນ (ATWG) ຄັ້ງທີ 33 ແລະບັນດາກອງປະຊຸມທີ່ກ່ຽວຂ້ອງໂດຍພາຍໃຕ້ການເປັນປະທານຂອງທ່ານ ວັນເພັງ ຈັນທະພອນ ຫົວໜ້າກົມການບິນພົນລະເຮືອນ, ຊຶ່ງມີຜູ້ເຂົ້າຮ່ວມຈາກບັນດາປະເທດສະມາຊິກອາຊຽນ, ກອງເລຂາອາຊຽນ, ບັນດາສາຍການບິນຈາກປະເທດອາຊຽນ, ພ້ອມກັນນີ້ກໍມີປະເທດຍີ່ປຸ່ນ, ສະຫະລັດອາເມລິກາ ແລະທີມງານສະໜັບສະໜູນໂຄງການພາຍໃຕ້ໂຄງການເຊື່ອມໂຍງການຂົນສົ່ງທາງອາກາດລະຫວ່າງ ASEAN-EU ແລະສາມາຄົມຂົນສົ່ງທາງອາກາດສາກົນ (IATA) ເຂົ້າຮ່ວມ.
ທ່ານ ວັນເພັງ ຈັນທະພອນ ໃຫ້ຮູ້ວ່າ: ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອທົບທວນຄືນຜົນຂອງກອງປະຊຸມ ATWG ຄັ້ງທີ 32 ທີ່ຜ່ານມາທີ່ຢາງກຸງ, ປະເທດມຽນມາພ້ອມທັງປືກສາຫາລືກັນກ່ຽວກັບອົງປະກອບທາງດ້ານເສດຖະກິດການບິນ ແລະເຕັກນິກການບິນທີ່ສຳຄັນໃນການເປີດຕະຫຼາດການບິນດຽວອາຊຽນ( ASEAN Single Aviation Market) ຂອງປະເທດສະມາຊິກອາຊຽນກໍຄືນະໂຍບາຍການເປີດກ້ວາງນ່ານຟ້າອາຊຽນຊຶ່ງອົງປະກອບທາງດ້ານເສດຖະກິດການບິນປະກອບມີຄື: ແຜນຍຸດທະສາດການຂົນສົ່ງທາງອາກາດ 2016-2025 ແຜນດຳເນີນງານໄລຍະສັ້ນ-ກາງ 2016-2017 ຄວາມຄືບໜ້າການເປີດກ້ວາງການຈັດຕັ້ງປະຕິບັດສິດທິການທີ 5 ຄວາມເປັນໄປໄດ້ການສ້າງແບບຟອມການອອກອະນຸຍາດຖ້ຽວບິນ (Operating permit), ກົດໝາຍ ວ່າດ້ວຍການແຂ່ງຂັນຢ່າງເປັນທຳ, ການຄຸ້ມຄອງສິດທິຜູ້ຊົມໃຊ້ ແລະລະບຽບການທີ່ກ່ຽວຂ້ອງ ໂດຍສະເພາະການເປີດນ່ານຟ້າຂອງບັນດາ ປະເທດອາຊຽນກັບປະເທດຄູ່ເຈລະຈາ ເຊັ່ນ: ອາຊຽນ-ຈີນ, ອາຊຽນ-ຍີ່ປຸ່ນ,ອາຊຽນ-ອີຢູ, ອາຊຽນ-ສ.ເກົາຫຼີ, ອາຊຽນ-ອິນເດຍ, ອາຊຽນ-ຮົງກົງ, ອາຊຽນ-ອາເມລິກາແລະອາຊຽນ-ລັດເຊຍ ສຳລັບອົງປະກອບທາງດ້ານເຕັກນິກການບິນທີ່ສຳຄັນປະກອບມີລະບົບຕິດຕາມລະບຽບການບິນອາຊຽນ, ການປະເມີນຄວາມປອດໄພຜູ້ປະຕິບັດງານການບິນອາຊຽນ, ການຮັບຮູ້ຊຶ່ງກັນ ແລະກັນກ່ຽວກັບການອອກໃບຢັ້ງຢືນ, ໃບຮັບຮອງ ແລະໃບອະນຸຍາດການຈັດຕັ້ງປະຕິບັດຈຸດປະສານງານກ່ຽວກັບຄວາມປອດໄພການບິນ ແລະແຜນແມ່ບົດການຄຸ້ມຄອງຈະລາຈອນທາງອາກາດ ແລະຄວາມເປັນໄປໄດ້ການສ້າງແບບຟອມການອອກອະນຸຍາດຖ້ຽວບິນໂດຍອີງໃສ່ແຜນການດຳເນີນງານການເຊື່ອມໂຍງຂະແໜງບໍລິການຂົນສົ່ງທາງອາກາດທີ່ໄດ້ກຳນົດແຜນປະຕິບັດງານກ່ຽວກັບການເຊື່ອມໂຍງ ແລະການເປີດເສລີການຂົນສົ່ງທາງອາກາດເລີມແຕ່ປີ 2005-2015 ຊຶ່ງແຜນປະຕິບັດງານດັ່ງກ່າວແມ່ນໄດ້້ກຳນົດຂອບການເປີດກ້ວາງສິດທິການບິນທີ 3,4 ແລະ 5 ຢ່າງເສລີເຕັມຮູບແບບ.
ສ່ວນການບໍລິການຜູ້ໂດຍສານ ແລະ ສິນຄ້າທາງອາກາດພາຍໃນປະເທດສະມາຊິກອາຊຽນເພື່ອຮັບຮອງຕະຫຼາດການບິນດຽວອາຊຽນໝາຍຄວາມວ່າສາມາດຂົນສົ່ງຜູ້ໂດຍສານ ແລະສິນຄ້າທາງອາກາດຈາກຈຸດໃດໜຶ່ງ (ສະໜາມບິນສາກົນ) ຂອງປະເທດໃດໜຶ່ງໄປອີກຈຸດໜຶ່ງຂອງປະເທດອື່ນ ແລະບິນໄປຕໍ່ອີກຈຸດໃດໜຶ່ງຂອງປະເທດທີ 3 ກໍຄືໃນປະເທດສະມາຊິກອາຊຽນ, ສຳລັບ ສປປ ລາວ ເຮົາແມ່ນໄດ້ກຳນົດ 4 ສະໜາມບິນສາກົນ (ວັດໄຕ, ຫຼວງພະບາງ, ສະຫວັນ ແລະ ປາກເຊ) ເປັນສະໜາມບິນທີ່ຈະຮອງຮັບເອົາການຈັດຕັ້ງປະຕິບັດບັນດາສັນຍາຫຼາຍຝ່າຍອາຊຽນວ່າດ້ວຍການຂົນສົ່ງຜູ້ໂດຍສານ ແລະສິນຄ້າທາງອາກາດຢ່າງເສລີເຕັມຮູບແບບກໍຄືສັນຍາກັບບັນດາປະເທດຄູ່ເຈລະຈາ.
