ສຳນັກຂ່າວຕ່າງປະເທດ ລາຍງານໃນວັນທີ 29 ມີນາຜ່ານມານີ້ວ່າ ທ່ານ ຟິແດນ ກາສໂຕຣ ອະດີດປະທານປະເທດ ແລະ ລັດຖະບູລຸດ ແຫ່ງ ສາທາລະນະລັດກູບາ ຊຶ່ງເປັນອ້າຍຂອງ ທ່ານ ຣາອູນ ກາສໂຕຣ ປະທານປະເທດກູບາຄົນປັດຈຸບັນ ໄດ້ຂຽນບົດຄວາມຕີພິມລົງ ໜັງສືພິມກຣານມາ ຊຶ່ງເປັນປາກກະບອກສຽງຂອງລັດຖະບານ ສະບັບວັນທີ 28 ມີນາ 2016 ມີເນື້ອໃນວ່າ ກູບາບໍ່ຕ້ອງການຂອງຂວັນ ຈາກ ” ຈັກກະພັດອາເມຣິກາ ” ເນື່ອງຈາກຄວາມບາດໝາງໃນອະດີດກວ່າ 50 ປີ ຊຶ່ງໂທດກຳທີ່ຊາວກູບາ ຍາກທີ່ຈະລືມໄດ້ ແລະ ເມື່ອໄດ້ຮັບຟັງຖ້ອຍຖະແຫລງຂອງ ປະທານາທິບໍດີ ບາຣັກ ໂອບາມາ ແຫ່ງ ສະຫະລັດອາເມຣິກາ ທີ່ເດີນທາງມານະຄອນຫລວງລາຮາວານ ເມື່ອອາທິດທີ່ຜ່ານມາແລ້ວ ເຫັນໄດ້ວ່າຫວານນອກຂົມໃນ.
ທ່ານ ກາສໂຕຣ ຊຶ່ງປັດຈຸບັນອາຍຸໄດ້ 89 ປີ ໄດ້ກ່າວໃນບົດຄວາມຂອງຕົນອີກວ່າ ຄຳແນະນຳທີ່ດີທີ່ສຸດ ຊຶ່ງສາມາດມອບໃຫ້ແກ່ ລັດຖະບານວໍຊິງຕັນ ໃນເວລານີ້ຄື ຂໍໃຫ້ໂອບາມາຢຸຕິຄວາມພະຍາຍາມ ສ້າງທິດສະດີຫັນປ່ຽນໂດຍສັນຕິ ແລະ ບິດເບືອນສະຖານະການທາງການເມືອງ ຢູ່ປະເທດກູບາອີກ ພ້ອມທັງໄດ້ເນັ້ນຢ້ຳອີກວ່າ ຊາວກູບາມີສັກສີ ແລະ ສາມາດເພິ່ງພາຕົນເອງໄດ້ ໂດຍຈະບໍ່ມີທາງຕົກຢູ່ທ່າມກາງພາບລວງຕາ ທີ່ອີກຝ່າຍໜຶ່ງສ້າງຂຶ້ນມາ ແລະ ປະລາໄຊໃຫ້ແກ່ ຄວາມຈອມປອມ ຫລື ແນວທິດທຶນນິຍົມ ທີ່ສະຫະລັດອາເມຣິກາໄດ້ຍື່ນມາໃຫ້ ຜ່ານການພັດທະນາດ້ານການສຶກສາ, ວິທະຍາສາດ ແລະ ວັດທະນະທຳ.
ບົດຄວາມດັ່ງກ່າວຂອງ ກາສໂຕຣ ຖືເປັນການຕອບໂຕ້ຖ້ອຍຖະແຫລງຂອງ ບາຣັກ ໂອບາມາ ຊຶ່ງກ່າວຂໍການໃຫ້ອະໄພຈາກຊາວກູບາ ຕໍ່ບົດບາດຂອງລັດຖະບານອາເມຣິກາ ທີ່ມີຕໍ່ກັບກູບາໃນໄລຍະສົງຄາມເຢັນ ພາຍຫລັງທີ່ ທ່ານ ຟິແດນ ກາສໂຕຣ ນຳພາມວນຊົນຊາວກູບາ ເຮັດການປະຕິບັດໂຄ່ນລົ້ມ ລະບອບການປົກຄອງຜະເດັດການທຶນນິຍົມຂອງ ທ່ານ ຟຸນເກນຊິໂອ ບາຕິສຕາ ທີ່ໄດ້ຮັບການສະໜັບສະໜູນ ຈາກສະຫະລັດອາເມຣິກາ ເມື່ອປີ 1959.