ສະຫະລັດ ໃຫ້ເງິນຊ່ວຍເຫຼືອຈຳນວນ 20 ລ້ານໂດລາແກ່ຢູໂຣບເພື່ອສົມທົບເຂົ້າໃນຄວາມພະຍາຍາມຂອງນາໆຊາດ ໃນການຮັບມືກັບວິດກິດການອົບພະຍົບ.ກະຊວງການຕ່າງປະເທດສະຫະລັດ ໄດ້ອອກຖະແຫລງຂ່າວສະບັບຫນຶ່ງໃນວັນຈັນທີ່ຜ່ານມາໂດຍກ່າວວ່າ ເງິນຈຳນວນນີ້ແມ່ນຈະໄປຊ່ວຍເຫຼືອອົງການສະຫະປະຊາຊາດ ແລະ ອົງການສະພາກາແດງນາໆຊາດ ທີ່ຈະໃຫ້ການຄຸ້ມຄອງ ໃຫ້ບ່ອນຢູ່ອາໄສ ແລະ ການໃຫ້ຄວາມຊ່ວຍເຫຼືອຢ່າງອື່ນໆນຳ ໃນທົ່ວພາກພື້ນຢູໂຣບ.
ການປະກາດກ່ຽວກັບການຊ່ວຍເຫລືອຄັ້ງໃໝ່ນີ້ ຈະເພີ່ມການຊ່ວຍເຫລືອທັງໝົດຂອງສະຫະລັດຂຶ້ນເປັນເກືອບ 44 ລ້ານໂດລ່າ ນັບຕັ້ງແຕ່ໄດ້ເລີ້ມໃນປີກາຍນີ້. ປະມານ 17 ລ້ານ5 ແສນໂດລ່າ ຈະນຳໃຊ້ເພື່ອຊ່ວຍຈັດຕັ້ງປະຕິບັດ ໂຄງການຂອງອົງການອົບພະຍົບສະຫະປະຊາຊາດ ຫຼື UNHCR ແລະແຜນການຮັບມືກັບພວກອົບພະຍົບໃນຂົງເຂດຂອງຢູໂຣບ. ໂດຍສະເພາະແລ້ວ ເງິນຈຳນວນນີ້ຈະໄປຊ່ວຍໃນການຈັດສັນແລະການບໍລິຫານກ່ຽວກັບພວກອົບພະຍົບທີ່ຫາກໍເດີນທາງໄປຮອດໃໝ່ ສົ່ງເສີມການໃຫ້ຄຳປຶກສາ ແລະເພີ້ມ ການໂອ້ລົມສົນທະນາກັນລະຫວ່າງລັດຖະບານ ແລະພວກອົບພະຍົບ ໃນການອົບພະຍົບທີ່ຖືກຕ້ອງຕາມກົດໝາຍນັ້ນ.
ເງິນທີ່ຍັງເຫຼືອນັ້ນແມ່ນມີປະມານ 2 ລ້ານ 5 ແສນໂດລາ ຈະນຳໄປໃຊ້ກ່ຽວກັບການຮ້ອງ ຮຽນສຸກເສີນຂອງກຣີສເມື່ອໄວໆມານີ້ ແລະເພື່ອຊ່ວຍເຫລືອພວກອົບພະຍົບແມ່ຍິງແລະເດັກນ້ອຍແມ່ຍິງ ໃນພາກຕາເວັນອອກສຽງໃຕ້ຂອງຢູໂຣບ. ມັນຈະຖືກນຳໃຊ້ເພື່ອ ພວກເຈົ້າໜ້າທີ່ກຣີສ ທີ່ໃຫ້ການຊ່ວຍເຫລືອພວກທີ່ຖືກຂົ່ມຂືນສຳເລົາແລະຊ່ວຍເຫຼືອປ້ອງກັນແລະຮັບມືກັບຄວາມຮຸນແຮງທາງເພດ ໃນທົ່ວຂົງເຂດ.
ການປະກາດດັ່ງກ່າວນີ້ ມີຂຶ້ນພຽງສັບປະດາດຽວເທົ່ານັ້ນ ຫຼັງຈາກທີ່ສະຫະພາບຢູໂຣບແລະເທີກີ ໄດ້ບັນລຸກັນໃນສິ່ງທີ່ບັນດາຜູ້ນຳທັງສອງຝ່າຍເອີ້ນວ່າ “ຂໍ້ຕົກລົງຄັ້ງປະຫວັດສາດ” ເພື່ອຮັບມືກັບພວກອົບພະຍົບທີ່ເຂົ້າໄປໃນກຣີສແບບ ຜິດກົດໝາຍ ຜ່ານທາງຊິເຣຍ ແລະ ບ່ອນອື່ນໆນັ້ນ.
ແຫລ່ງຂ່າວຈາກ: ຂ່າວ ວີໂອເອລາວນີສ