ສຳນັກຂ່າວຕ່າງປະເທດ ລາຍງານໃນວັນທີ 28 ມີນາຜ່ານມານີ້ວ່າ ພິພິທະພັນສີລະປະເດນເວີ ຂອງສະຫະລັດອາເມຣິກາ ໄດ້ສົ່ງມອບຮູບແກະສະຫລັກຫີນບູຮານ ” ພຣະຣາມ ” ຍຸກສະຕະວັດທີ X ຄືນໃຫ້ແກ່ກຳປູເຈຍ ພາຍຫລັງທີ່ຮູບແກະສະຫລັກດັ່ງກ່າວ ຖືກລັກລອບອອກຈາກຜາສາດຫີນເກາະແກຣ ໃກ້ກັບຜາສາດຫີນນະຄອນວັດ ສົ່ງອອກນອກປະເທດ ເມື່ອຊຸມປີ 1970 ແລະ ຢູ່ໃນການຄອບຄອງຂອງ ພິພິທະພັນເດນເວີ ຕັ້ງແຕ່ປີ 1986 ເປັນຕົ້ນມາ ໃນຂະນະທີ່ພາກສ່ວນຫົວ, ມື ແລະ ຕີນ ຂອງຮູບແກະສະຫລັກດັ່ງກ່າວ ຍັງຄົງສູນຫາຍ.
ແນວໃດກໍຕາມ ລັດຖະບານກຳປູເຈຍ ໄດ້ຮຽກຮ້ອງໃຫ້ພິພິທະພັນທຸກແຫ່ງ ແລະ ນັກສະສົມທົ່ວໂລກ ທີ່ກຳລັງຄອບຄອງ ຫົວ, ມື ແລະ ຕີນ ຂອງຮູບແກະສະຫລັກຫີນດັ່ງກ່າວນີ້ ຖືເອົາແບບຢ່າງທີ່ດີຂອງພິພິທະພັນເດນເວີ ດ້ວຍການສົ່ງມອບຄືນໃຫ້ແກ່ປະຊາຊົນກຳປູເຈຍ.
ທັງນີ້ ກຳປູເຈຍ ເປັນທີ່ຕັ້ງຂອງອານາຈັກຂອມທີ່ຍິ່ງໃຫຍ່ ຊຶ່ງຣາຊະວົງຜູ້ປົກຄອງອານາຈັກ ນັບຖືສາສະໜາພຸດ ປະສົມປະສານກັບຮິນດູ ໂດຍໄດ້ສ້າງເມືອງ ແລະ ຜາສາດຫີນຕ່າງໆ ແຕ່ພາຍຫລັງຍຸກສົງຄາມລ່າອານານິຄົມ ບັນດາບູຮານສະຖານ ແລະ ບູຮານວັດຖຸຕ່າງໆເຫລົ່ານັ້ນ ມັກຖືກລັກລອບສົ່ງອອກໄປຂາຍ ຢູ່ຕ່າງປະເທດ.
The 62-inch-tall torso, which was stolen in the 1970s from the Koh Ker temple site near the famed Angkor Wat complex, was handed over by the museum, which had possession since 1986. / AFP / TANG CHHIN SOTHY