ພາຍຫຼັງທີ່ໄດ້ດຳເນີນການກໍ່ສ້າງມາແຕ່ປີ 2013 ໂຄງການກໍ່ສ້າງເສັ້ນທາງຍຸດທະສາດແຕ່ບ້ານຄັນແຍງເມືອງໂພນທອງ-ດ່ານຊາຍແດນສາກົນວັງເຕົ່າແມ່ນມີຄວາມຄືບໜ້າແລ້ວຫຼາຍກວ່າ 90% ໂດຍແມ່ນບໍລິສັດດວງດີກໍ່ສ້າງຂົວ-ທາງຈຳກັດເປັນຜູ້ຮັບເໝົາກໍ່ສ້າງແລະລົງທຶນກ່ອນໃນຮູບແບບສຳປະທານແລະຄາດວ່າຈະໃຫ້ສຳເລັດພ້ອມເປີດການນຳໃຊ້ໃນທ້າຍປີນີ້.
ທ່ານອຸດອນແກ້ວດວງດີປະທານບໍລິສັດດວງດີກໍ່ສ້າງຂົວ-ທາງຈຳກັດໄດ້ໃຫ້ສຳພາດເມື່ອບໍ່ດົນມານີ້ວ່າ: ເສັ້ນທາງເລກທີ 16W ຫຼືເສັ້ນທາງຍຸດທະສາດແຕ່ບ້ານຄັນແຍງເມືອງໂພນທອງ-ດ່ານຊາຍແດນສາກົນວັງເຕົ່າທີ່ມີຄວາມຍາວ42,8ກິໂລແມັດຊຶ່ງເລີ່ມແຕ່ສົ້ນຂົວຂ້າມແມ່ນ້ຳຂອງບ້ານຄັນແຍງ-ດ່ານສາກົນວັງເຕົ່າເມືອງໂພນທອງແຂວງຈຳປາສັກໂດຍບໍລິສັດດວງດີກໍ່ສ້າງຂົວທາງຈຳກັດລົງທຶນໃນເບື້ອງຕົ້ນຫຼາຍກວ່າ 30 ລ້ານໂດລາສະຫະລັດ (240 ຕື້ກີບ) ການກໍ່ສ້າງມາເຖິງປະຈຸບັນແມ່ນສຳເລັດແລ້ວຫຼາຍກວ່າ 90% ສ່ວນວຽກງານທີ່ຍັງເຫຼືອມີພຽງແຕ່ຄວາມລະອຽດຂອງເສັ້ນທາງແລະຂົວບາງແຫ່ງຈາກທີ່ມີທັງໝົດ 4 ຂົວແລະຄາດວ່າຈະໃຫ້ສຳເລັດພ້ອມການເປີດນຳໃຊ້ເປັນທາງການໃນທ້າຍປີ 2016 ນີ້.
ເສັ້ນທາງຍຸດທະສາດບ້ານຄັນແຍງເມືອງໂພນທອງ-ດ່ານຊາຍແດນສາກົນວັງເຕົ່າ, ຈາກເດີມທີ່ມີ 2 ເລນຈະຖືກຍົກລະດັບມາເປັນ 4-6 ເລນທີ່ປູດ້ວຍຢາງອັດສະຟານ, ສາມາດຮັບນ້ຳໜັກໄດ້ 9,1 ໂຕນຕໍ່ເພົາຊຶ່ງເສັ້ນທາງດັ່ງກ່າວແມ່ນນອນໃນເສັ້ນທາງຍຸດທະສາດສຳຄັນໃນການເຊື່ອມຕໍ່ລະຫວ່າງປະເທດແລະອະນຸພາກພື້ນໂດຍສະເພາະແມ່ນການເຊື່ອມຕໍ່ລະຫວ່າງແຂວງຈຳປາສັກສປປລາວກັບຈັງຫວັດອຸບົນລາຊະທານີປະເທດໄທສຳລັບການເປີດປະຕູສູ່AEC ເສັ້ນທາງດັ່ງກ່າວຈະມີຄວາມສຳຄັນກັບການຂົນສົ່ງທາງດ້ານການຄ້າເພື່ອເຊື່ອມໂຍງກັບບັນດາປະເທດໃກ້ຄຽງໂດຍສະເພາະແມ່ນ ໄທ, ຫວຽດນາມແລະກຳປູເຈຍ.
ທີ່ມາ: 