ທະນາຄານໂລກອະນຸມັດເງິນກູ້ມູນຄ່າ 500 ລ້ານໂດລາສະຫະລັດໃຫ້ກັບລັດຖະບານສປ ຈີນ ເພື່ອໃຊ້ໃນແຜນການແກ້ໄຂບັນຫາດ້ານມົນລະພິດທາງອາກາດໃນນະຄອນຫຼວງປັກກິ່ງ ແລະ ພື້ນທີ່ອ້ອມຂ້າງ.
ຕາມຂ່າວຕ່າງປະເທດລາຍງານວ່າ ທະນາຄານໂລກ(ເວິລແບງ)ອະນຸມັດເງິນກູ້ຢືມ 500 ລ້ານໂດລາໃຫ້ກັບລັດຖະບານຈີນ ຊຶ່ງເປັນສ່ວນໜຶ່ງໃນແຜນການສົ່ງເສີມ“ສິນເຊື່ອເພື່ອໂລກສີຂຽວ” ມູນຄ່າ 1,4 ຕື້ໂດລາ ພາຍໃນໄລຍະເວລາ 6 ປີຕໍ່ໜ້າ ເພື່ອແກ້ໄຂບັນຫາມົນລະພິດທາງອາກາດໃນນະຄອນຫຼວງປັກກິງ ແລະ ພື້ນທີ່ອ້ອມຂ້າງ ໂດຍຍັງມີເງິນສະໜັບສະໜູນປະມານ 500 ລ້ານໂດລາຈາກທະນາຄານຫົວເຊີຍ ແລະ ອີກ 400 ລ້ານໂດລາຈາກຕາສານທຶນ, ເງິນຈຳນວນດັ່ງກ່າວຈະຈັດສັນໃຫ້ແກ່ທຸລະກິດຕ່າງໆໃນປັກກິ່ງ, ມົນທົນເຫີເປີ່ຍ ແລະ ນະຄອນທຽນຈິນ ລວມທັງພື້ນທີ່ອ້ອມຂ້າງ ເພື່ອຊ່ວຍເຫຼືອໃນມາດຕະການຮັບມືກັບມົນລະພິດທາງອາກາດ ພາຍໃຕ້ແຜນແມ່ບົດຂອງລັດຖະບານໃນການຄວບຄຸມ ແລະ ປ້ອງກັນເຊັ່ນຫຼຸດບໍລິໂພກຖ່ານຫີນ ແລະ ການຫຼຸດການປ່ອຍອາຍພິດເຮືອນແກ້ວ ຊຶ່ງຈະມີການຈັດຕັ້ງສູນສິນເຊື່ອເພື່ອໂລກສີຂຽວໂດຍທະນາຄານຫົວເຊີຍ.
ທັງນີ້ຈີນເປັນປະເທດທີ່ປ່ອຍອາຍພິດເຮືອນແກ້ວລາຍໃຫຍ່ສຸດຂອງໂລກ ສ່ວນໜຶ່ງມາຈາກການເພິ່ງພາຖ່ານຫີນ ໂດຍກະແສໄຟຟ້າທົ່ວປະເທດ 70% ມາຈາກຖ່ານຫີນ ຊຶ່ງລັດຖະບານຕັ້ງເປົ້າຫຼຸດໃຊ້ພະລັງງານຈາກເຊື້ອໄຟຖ່ານຫີນລົງ ດ້ວຍການເພີ່ມພະລັງງານຈາກແຫຼ່ງອື່ນເຊັ່ນ ພະລັງງານນິວເຄລຍ, ພະລັງງານນ້ຳ, ພະລັງງານແສງອາທິດ ໂດຍຕັ້ງເປົ້າຫຼຸດການປ່ອຍມົນລະພິດໃນພາກສ່ວນພະລັງງານລົງ 60% ພາຍໃນປີ 2020.
ແຫລ່ງຂ່າວຈາກ: 