ໄອເອັມເອຟ ຊີ້ການເຮັດສົງຄາມ ແລະ ການຫຼຸດລົງຂອງລາຄານ້ຳມັນ ສົ່ງຜົນກະທົບຕໍ່ທ່າອຽງການຂະ ຫຍາຍຕົວທາງເສດຖະກິດຂອງພາກພື້ນຕາເວັນອອກກາງ ແລະອາຊີກາງ.
ກອງທຶນການເງິນລະຫວ່າປະເທດ ຫຼື ໄອເອັມເອຟ ລະບຸໃນລາຍງານວ່າ ປະເທດຕະຫຼາດເກີດໃໝ່ທັງໝົດກຳລັງປະເຊີນກັບທ່າອຽງການຂະຫຍາຍຕົວຫຼຸດລົງໃນໄລຍະ 5 ປີຕໍ່ໜ້າ ແຕ່ປະເທດຕາເວັນອອກກາງ ແລະ ອາຊີກາງອາດມີການຂະຫຍາຍຕົວຕ່ຳກວ່າຄ່າສະເລ່ຍຂອງປະເທດໃນຕະຫຼາດເກີດໃໝ່ ແລະ ປະເທດກຳລັງພັດທະນາປະມານ 1,25%.
ຜູ້ອຳນວຍການປະຈຳພາກພື້ນຕາເວັນອອກກາງຂອງໄອເອັມເອຟ ທ້າວ ມາຊູດ ອາເໝັດ ກ່າວວ່າ ປະເທດສ່ວນໃຫຍ່ໃນຕາເວັນອອກກາງຍັງປະເຊີນກັບຄວາມຂັດແຍ້ງ ເຮັດໃຫ້ເປັນປັດໃຈຖ່ວງດຶງການຂະຫຍາຍຕົວໃນພາກພື້ນ ຂະນະທີ່ເຮັດໃຫ້ເກີດຜູ້ອົບພະຍົບຈຳນວນຫຼາຍລ້ານຄົນຫຼົບໜີອອກຈາກປະເທດ ຂະນະທີ່ລາຄານ້ຳມັນຫຼຸດລົງເປັນເວລາດົນ ສົ່ງຜົນກະທົບຕໍ່ທ່າອຽງການຂະຫຍາຍຕົວໃນໄລຍະຍາວຂອງປະເທດຜູ້ສົ່ງອອກນ້ຳມັນ ເຮັດໃຫ້ມີການປັບຫຼຸດຄ່າໃຊ້ຈ່າຍ ແລະ ຫຼຸດການຈ້າງວຽກເຮັດໃນພາກລັດ ເຮັດໃຫ້ເກີດແຮງກົດດັນຕໍ່ມາດຕະຖານຄ່າຄອງຊີບ ແລະ ທ່າອຽງການຂະຫຍາຍຕົວຂອງເສດຖະກິດ.
ລາຍງານຂອງໄອເອັມເອຟຍັງແນະນຳໃຫ້ປະເທດດັ່ງກ່າວເພີ່ມປະສິດທິພາບການຜະລິດ ດ້ວຍການເພີ່ມສຶກສາ ແລະ ເພີ່ມທັກສະໃຫ້ແກ່ແຮງງານໄປພ້ອມໆກັບປະຕິຮູບກົດລະບຽບ ແລະ ກົດໝາຍດ້ານພາສີ ລວມທັງຫຼຸດ ບົດບາດຂອງລັດວິສາຫະກິດລົງ.