ທ່ານ ສີ​ບຸນ​ເຮືອງ ວຽນ​ເຮືອງ​ໄຜ່ ປະທານ​ສະພາ​ບໍລິຫານ​ເສດຖະກິດ​ນິຄົມ​ອຸດສາຫະກຳ ແລະ ການ​ຄ້າ​ວຽງ​ຈັນ​ໂນນ​ທອງ ໄດ້​ກ່າວ​ວ່າ: ນິຄົມ​ອຸດສາຫະກຳ ແລະ ການ​ຄ້າ​ວຽງ​ຈັນ​ໂນນ​ທອງ ຖືກ​ສ້າງຕັ້ງ​ຂຶ້ນ​ບົນ​ພື້ນຖານ​ເງື່ອນໄຂ​ຂອງ​ສັນຍາ​ຮ່ວມ​ມື​ພັດທະນາ ລະຫວ່າງ​ກະຊວງ​ອຸດສາຫະກຳ ແລະ ການ​ຄ້າ ຕາງໜ້າ​ໃຫ້​ລັດຖະບານ ​ສປປ ລາວ ກັບ​ບໍລິສັດ ໜຳ​ເວ​ພັດທະນາ ຈຳກັດ ທີ່​ໄດ້​ລົງ​ນາມ​ກັນ​ປີ 2009 ເຊິ່ງ​ເປັນ​ການ​ລົງທຶນ​ປະສົມ​ລະຫວ່າງ​ລັດຖະບານ​ແຫ່ງ ​ສປປ ລາວ ຖື​ຫຸ້ນ 30% ກັບ​ນັກ​ລົງທຶນ​ໃຕ້​ຫວັນ (ບໍລິສັດ ໜຳ​ເວ​ພັດທະນາ ຈຳກັດ) ຖື​ຫຸ້ນ 70% ໂດຍ​ຖືກ​ຮັບຮອງ ແລະ ສ້າງຕັ້ງ​ຂຶ້ນ​ໃນ​ວັນ​ທີ 1 ພະຈິກ 2010 ຢູ່​ເຂດ​ຫຼັກ 22 ບ້ານ​ໂນນ​ທອງ ເມືອງ​ໄຊ​ທານີ ນະຄອນຫຼວງ​ວຽງ​ຈັນ.

ນິຄົມ​ແຫ່ງ​ນີ້​ແມ່ນ​ມີ​ເນື້ອທີ່​ໃນ​ເບື້ອງ​ຕົ້ນ 110 ເຮັກຕາ ເພື່ອ​ດຳເນີນ​ເຄື່ອນ​ໄຫວ​ທຸລະ​ກິດ​ກາ ຜະລິດ​ສົ່ງ​ອອກ ການ​ຄ້າ ການ​ບໍລິການ ການ​ບໍລິຫານ ແລະ ພັດທະນາ​ໃຫ້​ກາຍເປັນ​ເຂດ​ອຸດສາຫະກຳ ການ​ຄ້າ ແລະ ການ​ບໍລິການ​ທີ່​ທັນ​ສະໄໝ ເຊິ່ງ​ພາຍຫຼັງ​ໄດ້​ມີ​ການ​ພັດທະນາ​ມາ​ຮອດ​ປັດຈຸບັນ​ນີ້ ໄດ້​ມີ​ນັກ​ລົງທຶນ​ຕ່າງປະເທດ ເປັນຕົ້ນ​ແມ່ນ ຈີນ ຍີ່ປຸ່ນ ໃຕ້​ຫວັນ ໄທ ແລະ ເດັນ​ມາກ ເຂົ້າ​ມາ​ຈັບຈອງ ແລະ ຈົດ​ທະບຽນ​ໄປ​ແລ້ວ ຈຳນວນ 28 ບໍລິສັດ ໃນ​ນັ້ນ ລວມ​ທັງ​ບໍລິສັດ ມິ​​ສ​ຊູ​ມິ​​ສ​ຊິ ທີ່​ຫາກໍ່​ເຊັນ​ສັນຍາ​ໄປ​ແລ້ວ​ເມື່ອ​ມໍ່ໆ​ຜ່ານ​ມາ​ນີ້ ໂດຍ​ມາ​ຮອດ​ດຽວນີ້ ໄດ້​ຈັບຈອງ​ເນື້ອທີ່​ດິນ​ເທົ່າ​ກັບ 70% ຂອງ​ເນື້ອທີ່​ດິນ​ທັງ​ໝົດ ເພື່ອ​ດຳເນີນ​ກິດຈະການ​ການ​ຜະລິດ ແລະ ໄດ້​ມີ​ທຶນ​ຈົດ​ທະບຽນ ທັງ​ໝົດ 41,61 ລ້ານ​ໂດ​ລາ​ສະຫະລັດ ຫຼື ປະມານ 328 ຕື້​ກີບ ໃນ​ນັ້ນ ໄດ້​ລົງທຶນ​ກໍ່ສ້າງ​ໂຮງງານ ແລະ ນຳ​ເຂົ້າ​ວັດຖຸ​ອຸປະກອນ​ເຂົ້າ​ມາ ເພື່ອ​ທຳ​ການ​ຜະລິດ​ສົ່ງ​ອອກ​ມີ 7 ບໍລິສັດ ແລະ 10 ກວ່າ​ບໍລິສັດ ກຳລັງ​ກໍ່ສ້າງ​ໂຮງງານ ແລະ ໄດ້​ມີ 2 ບໍລິສັດ​ສົ່ງ​ອອກ​ແລ້ວ ມາ​ຮອດ​ປັດຈຸບັນ ມູນ​ຄ່າ​ການ​ນຳ​ເຂົ້າ​ທັງ​ໝົດ 11 ລ້ານ​ກວ່າ​ໂດ​ລາ ຫຼື ປະມານ 88 ຕື້​ກີບ ແລະ ມີ​ການ​ສົ່ງ​ອອກ​ສິນຄ້າ​ໄປ​ປະເທດ​ເຢຍ​ລະ​ມັນ ອິ​ຕາ​ລີ ແລະ ປະເທດ​ຍີ່ປຸ່ນ ມີ​ມູນ​ຄ່າ​ການ​ສົ່ງ​ອອກ 5 ລ້ານ​ໂດ​ລາ ຫຼື ປະມານ 40 ຕື້​ກີບ ນອກຈາກ​ບໍລິສັດ​ທີ່​ຈົດ​ທະບຽນ​ແລ້ວ ຍັງ​ມີ​ຫຼາຍ​ບໍລິສັດ​ທັງ​ພາຍ​ໃນ ແລະ ຕ່າງປະເທດ​ໄດ້​ເຂົ້າ​ມາ​ສຶກ​ສາ​ຂໍ້​ມູນ ແລະ ມີ​ຄວາມ​ສົນໃຈ​ທີ່​ຈະ​ເຂົ້າ​ມາ​ລົງທຶນ​ໃນ​ນິຄົມ​ແຫ່ງ​ນີ້ ຊຶ່ງ​ນິຄົມ​ແຫ່ງ​ນີ້ ສາມາດ​ສ້າງ​ວຽກ​ເຮັດ​ງານ​ທຳ​ໃຫ້​ປະຊາຊົນ​ອ້ອມ​ຂ້າງ​ໄດ້​ຈຳນວນ 600 ກວ່າ​ຄົນ ແລະ ຄາດ​ວ່າ​ໃນ​ສົກ​ປີ 2015-2016 ຈະ​ສາມາດ​ສ້າງ​ວຽກ​ເຮັດ​ງານ​ທຳ​ໃຫ້​ປະຊາຊົນ​ລາວ​ໄດ້​ເຖິງ 10.000 ຄົນ.

ທ່ານ ສີ​ບຸນ​ເຮືອງ ວຽນ​ເຮືອງ​ໄຜ່ ຍັງ​ກ່າວ​ຕື່ມ​ວ່າ: ໄປ​ຄຽງ​ຄູ່​ກັບ​ການ​ດຶງ​ດູດ​ນັກທຸລະກິດ ເຂົ້າ​ມາ​ລົງທຶນ​ໃນ​ເນື້ອທີ່​ນິຄົມ​ແລ້ວ ທາງ​ບໍລິສັດ​ຜູ້​ລົງທຶນ ຍັງ​ໄດ້​ດຳເນີນ​ການ​ກໍ່ສ້າງ​ພື້ນຖານ​ໂຄງ​ລ່າງ​ໄປ​ພ້ອມໆ​ກັນ​ຢ່າງ​ຕໍ່​ເນື່ອງ ເຊັ່ນ: ເສັ້ນທາງ​ລະບົບ​ນ້ຳ ໄຟຟ້າ ປະຕູໂຂງ ຫ້ອງການ ອ່າງເກັບນ້ຳ ຮົ້ວ​ອ້ອມ ແລະ ສິ່ງ​ອຳນວຍ​ຄວາມ​ສະດວກ​ອື່ນໆ ລວມ​ແລ້ວ​ມູນ​ຄ່າ​ການ​ລົງທຶນ​ຕົວ​ຈິງ ມາ​ຮອດ​ປັດຈຸບັນ​ປະມານ 30 ລ້ານ​ກວ່າ​ໂດ​ລາ ຫຼື ປະມານ 240 ຕື້​ກີບ ໃນ​ນັ້ນ​ເປັນ​ການ​ລົງທຶນ​ຂອງ​ຜູ້​ພັດທະນາ 10 ລ້ານ​ກວ່າ​ໂດ​ລາ ຫຼື ປະມານ 80 ຕື້​ກີບ.

ທີ່ມາ http://www.vientianemai.net/teen/khao/1/11694