ພິທີຈັດຕັ້ງການສອບເສັງນັກຮຽນເກັ່ງຊັ້ນມັດທະຍົມສຶກສາຂັ້ນແຂວງ ທົ່ວແຂວງຊຽງຂວາງ ປະຈຳສົກຮຽນ 2015 – 2016 ໄດ້ໄຂຂຶ້ນໃນຕອນເຊົ້າຂອງວັນທີ 17 ມີນາ 2016 ຜ່ານມາທີ່ສະໂມສອນໂຮງຮຽນສາມັນກິນນອນຊົນເຜົ່າແຂວງຊຽງຂວາງ ໂດຍພາຍໃຕ້ການເປັນປະທານຂອງທ່ານ ບົວລີ ພັນນາວົງ ກຳມະການພັກແຂວງ ຫົວໜ້າພະແນກສຶກສາທິການ ແລະ ກີລາແຂວງຊຽງຂວາງ ເຂົ້າຮ່ວມພິທີມີທ່ານ ໄຊປັນຍາ ໄຊຍະຈິດ ຫົວໜ້າຂະແໜງມັດທະຍົມສຶກສາພ້ອມຄະນະ ມີຄະນະກຳມະການຍາມຫ້ອງສອບ ກຳມະການກວດບົດ ແລະ ຄູນຳພານັກຮຽນ ພ້ອມດ້ວຍນ້ອງນັກສອບທີ່ມາຈາກແຕ່ລະເມືອງທົ່ວແຂວງເຂົ້າຮ່ວມ.
ທ່ານ ນາງ ວຽງເພັດ ເທບອຸດົມ ຮອງຫົວໜ້າຂະແໜງມັດທະຍົມ ພະແນກສຶກສາທິການ ແລະ ກີລາແຂວງຊຽງຂວາງໄດ້ກ່າວລາຍງານວ່າ ສໍາລັບການສອບເສັງຄັດເລືອກນັກຮຽນເກັ່ງຊັ້ນມັດທະຍົມສຶກສາຂັ້ນແຂວງຢູ່ແຂວງຊຽງຂວາງ ສົກຮຽນ 2015 – 2016 ນີ້ ມີນັກຮຽນທັງໝົດທີ່ເປັນໂຕແທນໃຫ້ແຕ່ລະເມືອງທົ່ວແຂວງເຂົ້າຮ່ວມ 46 ຄົນ ຍິງ 8 ຄົນ ໃນນັ້ນ ຊັ້ມ ມ. 4 ມີ 23 ຄົນ ຍິງ 4 ຄົນ ແລະ ຊັ້ນ ມ. 7 ມີ 23 ຄົນ ຍິງ 4 ຄົນ ສໍາລັບວິຊາທີ່ນຳມາສອບເສັງປະກອບມີ ວິຊາ ພາສາລາວ-ວັນນະຄະດີ ວິຊາຄະນິດສາດ ວິຊາເຄມີສາດ ແລະ ວິຊາຟີຊິກສາດ ແຕ່ລະວິຊາໃຊ້ເວລາສອບເສັງທັງໝົດ 90 ນາທີ ພາຍຫຼັງສຳເລັດການສອບເສັງພາກວິຊາການແລ້ວ ບັນດານ້ອງໆນັກສອບຍັງຈະໄດ້ເຂົ້າຮ່ວມຖາມ-ຕອບ ຄວາມຮູ້ຮອບໂຕ ເພື່ອຊີງເອົາຂອງຂວັນລາງວັນ ແລະ ໄປທັດສະນະສຶກສາສະຖານທີ່ທ່ອງທ່ຽວທີ່ສຳຄັນທາງປະຫວັດສາດຂອງແຂວງຕື່ມອີກ.
ຂ່າວ/ພາບ: ຄານສີສະຫວັນ ພົງພັກດີ
ແຫລ່ງຂ່າວຈາກ: ວິທະຍຸ-ໂທລະພາບນະຄອນຫຼວງ.