ຖ້ຳທ່ານປະທານໄກສອນ ພົມວິຫານ ເມືອງ ວຽງໄຊ ແຂວງ ຫົວພັນ. - ລາວໂພສຕ໌ Laopost

Click here - to use the wp menu builder

Homeຂ່າວທ່ອງທ່ຽວຖ້ຳທ່ານປະທານໄກສອນ ພົມວິຫານ ເມືອງ ວຽງໄຊ ແຂວງ ຫົວພັນ.

ຖ້ຳທ່ານປະທານໄກສອນ ພົມວິຫານ ເມືອງ ວຽງໄຊ ແຂວງ ຫົວພັນ.

ຂ່າວທ່ອງທ່ຽວ

Published on

17/03/2016

By ບຸດສະດີ ສາຍນ້ຳມັດ

4345

00013728-24

ທ່ອງທ່ຽວວັນນີ້ລາວໂພສຕ໌ຈະພາທຸກທ່ານໄປເມືອງວຽງໄຊ ແຂວງຫົວພັນ

ເສັ້ນທາງຈາກເມືອງຊຳເໜືອເຖິງເມືອງວຽງໄຊມີໄລຍະທາງ 29 ກິໂລແມັດ ມີທິວທັດທຳມະຊາດທີ່ສວຍງາມດ້ວຍພູເຂົາລູກນ້ອຍລູກໃຫຍ່ເກະກ່າຍສະລັບຊັບຊ້ອນກັນໄປ ຕາມເສັ້ນທາງໄປກໍ່ເຫັນເຮືອນປະຊາຊົນ ເຫັນທົ່ງໄຮ່ທົ່ງນາສວຍງາມ ເມືອງວຽງໄຊແຕ່ກ່ອນເຄີຍເປັນດັ່ງສູນບັນຊາການຂອງກອງກຳລັງປົດປ່ອຍປະເທດຊາດ ສະຖານທີ່ທ່ອງທ່ຽວຊື່ດັງຂອງເມືອງນີ້ກໍ່ແມ່ນບັນດາຖ້ຳຂອງທ່ານຜູ້ນຳລາວເຊັ່ນ: ຖ້ຳທ່ານ ໄກສອນພົມວິຫານ, ຖ້ຳທ່ານຄຳໄຕ ສີພັນດອນ, ຖ້ຳທ່ານ ໜູຮັກ ພົມສະຫວັນ, ຖ້ຳທ່ານ ສຸພານຸວົງ, ຖ້ຳທ່ານ ພູມີ ວົງວິຈິດ, ຖ້ຳກອງປ້ອງກັນທາງອາກາດ.

ເຊິ່ງວັນນີ້ລາວໂພສຕ໌ຈະພາທຸກທ່ານໄປທ່ຽວຖ້ຳທ່ານປະທານ ໄກສອນ ພົມວິຫານ ເຊິ່ງຕັ້ງຢູ່ເມືອງ ວຽງໄຊ ແຂວງ ຫົວພັນ. ຖ້ຳນີ້ນອກຈາກຈະເປັນແຫລ່ງທ່ອງທ່ຽວທີ່ຂຶ້ນຊື່ອີກແຫ່ງໜຶ່ງຂອງເມືອງວຽງໄຊແລ້ວ ຍັງເປັນບ່ອນຈາລຶກປະຫວັດສາດການຕໍ່ສູ້ກູ້ຊາດຂອງລາວເຮົາ ຫາກທ່ານໃດທີ່ຍັງບໍ່ເຄີຍໄດ້ມາເທື່ອເຮົາມາທ່ຽວພ້ອມໆກັນເລີຍ.

ຖ້ຳທ່ານ ໄກສອນ ພົມວິຫານ ເດີມເອີ້ນວ່າ ຜາຢ່ອນ ແຕ່ກ່ອນກີ້ຖ້ຳນີ້ມີເຜິ້ງຫຼາຍ ປະຊາຊົນເຂດນີ້ຢາກໄດ້ແຕ່ຂຶ້ນໄປເອົາລຳບາກ ຕ້ອງປີນຂຶ້ນຜາ ແລ້ວເອົາເຊືອກຢ່ອນລົງມາເພື່ອເອົາເຜິ້ງ ຈິ່ງເອີ້ນວ່າຖ້ຳຢ່ອນ ຖ້ຳນີ້ເປັນຖ້ຳທຳມະຊາດ 2 ຖ້ຳ ຕິດຕໍ່ກັນ ໃນປີ 1964 ທ່ານປະທານໄກສອນ ພົມວິຫານ ໄດ້ໂຍກຍ້າຍເຂົ້າມາຢູ່ ໄລຍະທຳອິດກໍ່ຍັງບໍ່ມີການປັບປຸງ ຕໍ່ມາໄດ້ເຈາະສອງຖ້ຳຖະລຸຊອດຫາກັນ ເຊິ່ງມີຄວາມຍາວ 140 ແມັດ ຖ້ຳນີ້ເປັນຖ້ຳທີ່ສູງກ່ວາໜ້າດິນຈົນໄດ້ສ້າງຂັນໄດຂຶ້ນໄປ 32 ຂັ້ນ ຖ້ຳນີ້ປະກອບດ້ວຍຫ້ອງປ້ອງກັນ, ຫ້ອງຮັບແຂກສູນກາງພັກ ແລະ ຮັບແຂກຕ່າງປະເທດ, ຫ້ອງປະຊຸມ, ຫ້ອງສະໂມສອນ ເຊິ່ງເປັນສະຖານທີ່ຫລິ້ນກິລາວ ແລະ ສີລະປະຕ່າງໆ ໂດຍສະເພາະທ່ານປະທານໄກສອນ ພົມວິຫານ ມັກຫຼິ້ນກິລາ ເຊັ່ນ: ກິລາຕີປິ່ງປ່ອງເປັນຕົ້ນ ນອກຈາກນີ້ຍັງມີຫ້ອງຄົ້ນຄ້ວາ, ຫ້ອງນອນ. ທີ່ປາກຖ້ຳກໍ່ມີຖ້ຳນ້ອຍເຊິ່ງເປັນຖ້ຳອາຫານໃນເວລາສົງຄາມ ໃນຕົ້ນປີ 1973 ຈິ່ງໄດ້ສ້າງເຮືອນຫຼັງໜຶ່ງໃຫ້ເປັນທີ່ພັກຂອງທ່ານປະທານໄກສອນ ພົມວິຫານ ແຕ່ຍັງບໍ່ທັນສຳເລັດສົມບູນ ທ່ານປະທານໄກສອນ ພົມວິຫານໄດ້ຢ້າຍເຂົ້າມາວຽງຈັນກ່ອນ ເຮືອນຫຼັງນີ້ຕໍ່ມາໄດ້ໃຊ້ເປັນບ່ອນເກັບເອກະສານ ແລະ ສິ່ງຂອງທາງປະຫວັດສາດ.

ພາຍໃນຖ້ຳທ່ານປະທານໄກສອນ ພົມວິຫານ ຕົບແຕ່ງແບບລຽບງ່າຍ ຫ້ອງນອນ, ຫ້ອງປະຊຸມ, ຫ້ອງນ້ຳຕົບແຕ່ງແບບງ່າຍໆ ໂຕະຕັ່ງເປັນໄມ້, ຖ້ຳຂອງທ່ານໄກສອນເຢັນສະບາຍມີລົມຜ່ານເຂົ້າອອກ ທີ່ພິເສດໃນຖ້ຳນີ້ມີຫລຸມຫລົບໄພ ເພາະເວລາທີ່ເຮືອບິນຂອງອາເມລິກາຖີ້ມອາວຸດເຄມີ ຈະໄດ້ຫລົບຢູ່ໃນຫ້ອງຫລຸມຫລົບໄພນີ້ໃນຫລຸມນີ້ມີເຄື່ອງປັບອາກາດເຮັດໃຫ້ອາກາດຢູ່ທາງໃນບໍລິສຸດ ຫ້ອງນີ້ຢູ່ໄດ້ຈຳກັດຄົນ ມີໄວ້ສະເພາະບຸກຄົນສຳຄັນເທົ່ານັ້ນ.

https://youtu.be/3Gt7ctM7Po0

ສະຖານທີ່ທ່ອງທ່ຽວບໍ່ພຽງແຕ່ຈະສວຍງາມຢ່າງດຽວເທົ່ານັ້ນ ແຕ່ມົນສະເໜ່ຂອງມັນທີ່ແທ້ຈິງແມ່ນເລື່ອງລາວ ແລະ ຮ່ອງຮອຍປະຫວັດສາດທີ່ຈາລຶກໄວ້ໃຫ້ເປັນຕຳນານສືບທອດຕໍ່ໆໄປ.

ຮວບຮວມຂໍ້ມູນໂດຍ: ລາວໂພສຕ໌

ຂອບໃຈແຫຼ່ງຈໍ້ມູນ ແລະ ວິດີໂອຈາກ: ເວັບໄຊ໌ຮັອດເຊຍ ແລະ ຮູບພາບຈາກເວັບໄຊ໌ພັນທິບດອັດຄອມ.

ບົດຄວາມຫຼ້າສຸດ