ວັນທີ 14 ມີນາຜ່ານມາ, ທີ່ສຳນັກງານໃຫຍ່ຂອງບໍລິສັດ ນິວຕັນສາກົນ ໄດ້ຈັດພິທີລ້ຽງສົ່ງນັກສຶກສາຈຳນວນ 6 ຄົນ ເພື່ອໄປສຶກສາຕໍ່ຢູ່
ປະເທດອົດສະຕຣາລີ ໂດຍໃຫ້ກຽດເຂົ້າຮ່ວມໃນພິທີມີ ທ່ານ ດຣ. ສີສະໝອນ ສິດທິລາດວົງສາ ຫົວໜ້າຫ້ອງການກະຊວງສຶກສາທິການ ແລະກີລາ, ທ່ານ ໃຫຍ່ ຂຸນວົງສາ ປະທານ ບໍລິສັດ ນິວຕັນ ສາກົນ, ທ່ານ ນາງ ລິນດາ ສຸວັນນະເຮືອງ ຮອງປະທານບໍລິສັດ ນິວຕັນສາກົນ, ທ່ານ ໂອຊາມາ ອັບແດນລາຕິນ ປະທານບໍລິສັດເອເອັມອີເອສກຣຸບ ອົດສະຕຣາລີ (AMES GROUP Australia), ພ້ອມດ້ວຍນັກຮຽນ ແລະ ພໍ່ແມ່ນັກຮຽນເຂົ້າຮ່ວມ.
ທ່ານ ໃຫຍ່ ຂຸນວົງສາ ກ່າວວ່າ: ການຈັດພິທີລ້ຽງສົ່ງນັກສຶກສາໄປຮຽນຕໍ່ໃນລະດັບປະລິນຍາຕີ ແລະໂທຢູ່ປະເທດອົດສະຕຣາລີໃນຄັ້ງນີ້ ກໍເພື່ອປະຕິບັດຕາມ ແນວທາງນະໂຍບາຍຂອງພັກ-ລັດແນໃສ່ພັດທະນາບຸກຄະລາກອນໃຫ້ມີຄຸນນະພາບ ແລະມີຄວາມກ້າວໄກ ຊຶ່ງຜູ້ທີ່ ຢາກຈະໄປຮຽນຕໍ່ຕ່າງປະເທດພຽງແຕ່ປະກອບເອກະສານໃຫ້ຖືກຕ້ອງ ແລະ ບໍລິສັດ ນິວຕັນເອງ ກໍຍັງມີຄູ່ຮ່ວມງານ ກັບປະເທດອົດສະຕຣາລີ ກໍຄືບໍລິສັດເອເອັມອີເອສ ກຣຸບ ອົດສະຕຣາລີຊຶ່ງເປັນ ບໍລິສັດທີ່ເປັນຕົວແທນຂອງທຸກມະຫາວິທະຍາໄລ ຢູ່ທາງອົດສະຕຣາລີ.
ສ່ວນ ທ່ານ ໂອຊາມາ ອັບແດນລາຕິນໄດ້ກ່າວວ່າ: ໃນການຮ່ວມມືກັບບໍລິສັດ ນິວຕັນ ສາກົນ ເທື່ອນີ້ກໍຖືວ່າເປັນຂີດໝາຍສຳຄັນອັນໜຶ່ງໂດຍສະເພາະແມ່ນການປະກອບເອກະສານທີ່ຖືກຕ້ອງຕາມລະບຽບຂອງປະເທດອົດສະຕຣາລີ ເພື່ອຂໍຮຽນຕໍ່ຄັ້ງນີ້ບັນລຸຕາມຜົນສຳເລັດຊຶ່ງ ຈຳນວນນ້ອງນັກຮຽນທັງ 6 ຄົນ ທີ່ໄດ້ ສະເໜີມາແມ່ນສາມາດໄປຮຽນຕໍ່ໄດ້ທັງໝົດ ພ້ອມນັ້ນຍັງຕ້ອງການທີ່ຈະຊ່ວຍນັກສຶກສາລາວໄປຮຽນໃຫ້ຫຼາຍຍິ່ງຂຶ້ນ ໂດຍ ຫວັງວ່າການຮ່ວມມືຂອງບໍລິສັດ ນິວຕັນ ສາກົນ ກັບບໍລິສັດເອເອັມອີເອສກຣຸບ ອົດສະຕຣາລີ ຄັ້ງນີ້ຈະຮັບສຳເລັດຫຼາຍຂຶ້ນ.
ນອກຈາກນັ້ນທາງບໍລິສັດ ນິວຕັນ ສາກົນ ຍັງສາມາດສົ່ງໃຫ້ໄປຮຽນຕໍ່ຢູ່ບັນດາປະເທດຕ່າງໆເຊັ່ນ: ອັງກິດ, ສະຫະລັດ ອາເມລິກາ, ການາດາ, ນິວຊີແລນ, ຈີນ ແລະຫວຽດນາມຫາກທ່ານໃດສົນໃຈຢາກເອົາລູກຫຼານໄປຮຽນຕໍ່ກໍສາມາດປະສານງານຫາເພິ່ນໄດ້.
ທີ່ມາ: