ພາຍຫຼັງປະສົບຜົນສໍາເລັດໃນການຈັດງານເທສະການອາຫານຝຣັ່ງ ໃນປີ 2015 ຜ່ານມາ ກະຊວງການຕ່າງປະເທດ ແລະ ພັດທະນາສາກົນ ແຫ່ງ ສາທາລະນະລັດຝຣັ່ງ ໄດ້ຕັດສິນໃຈສືບຕໍ່ຈັດງານເທສະການອາຫານ ປະຈໍາ 2016 ພ້ອມກັນທົ່ວໂລກ ເຊິ່ງຈະຈັດຂຶ້ນໃນວັນທີ 21 ມີນາ 2016 ໂດຍໃສ່ຊື່ວ່າ Gout de France/Good France 2016 ເພື່ອສະເຫຼີມສະຫຼອງວັດທະນະທໍາການປຸງແຕ່ງອາຫານຝຣັ່ງ ແລະ ໃນປີນີ້ ມີພໍ່ຄົວຫຼາຍກວ່າ 1.600 ຄົນ ທີ່ມີສີມືດີດ້ານການປຸງແຕ່ງອາຫານໃນທົ່ວໂລກ ຈະແບ່ງປັນປະສົບການ ແລະ ບົດຮຽນເຊິ່ງກັນແລະກັນ ທັງເປັນການເຜີຍແຜ່ສິລະປະການດໍາລົງຊີວິດແບບຝຣັ່ງ ໂດຍຜ່ານການຈັດງານເທສະການໃດນຶ່ງໃນລະດັບສາກົນ.

ທັງນີ້ ທ່ານນາງ ກະໂລດິນ ເລີດູ ເອກອັກຄະລັດຖະທູດຝຣັ່ງ ປະຈໍາ ສປປ.ລາວ ໄດ້ຖະແຫຼງໃນຕອນບ່າຍວັນທີ 14 ມີນາ 2016 ທີ່ສະຖານເອກອັກຄະລັດຖະທູດຝຣັ່ງ ປະຈໍາ ສປປ.ລາວ ວ່າ ການຈັດງານເທສະການອາຫານຝຣັ່ງ ປະຈໍາປີ 2016 ນີ້ ແມ່ນໂອກາດໃນການເຜີຍແຜ່ສູດອາຫານຝຣັ່ງ ເຊິ່ງກະຊວງການຕ່າງປະເທດຝຣັ່ງ ໄດ້ເນັ້ນສົ່ງເສີມການບໍລິໂພກທີ່ດີ ແລະ ເຄົາລົບສິ່ງແວດລ້ອມ ທັງສົ່ງເສີມບັນດາຮ້ານອາຫານຕ່າງໆໃຫ້ນໍາໃຊ້ໄຂມັນ ນໍ້າຕານ ແລະ ເກືອໜ້ອຍລົງ ແລະ ເນັ້ນປະເພດຜັກ ແລະ ອາຫານປະເພດເມັດ.