ພິທີເປີດນຳໃຊ້ອາຄານຫຼັງໃໝ່ຂອງສະຖາບັນການເງິນຈຸລະພາກທີ່ຮັບເງິນຝາກຈຳປາສັກ ຈຳກັດ ໄດ້ມີຂຶ້ນໃນວັນທີ 11 ມີນາຜ່ານມານີ້ ທີ່ສຳນັກງານບ້ານສະໜາມໄຊ ເມືອງປາກເຊ ໂດຍເຂົ້າຮ່ວມເປັນປະທານຂອງທ່ານ ດຣ. ບຸນຖອງ ດີວິໄຊ ເຈົ້າແຂວງໆຈຳປາສັກ, ມີທ່ານ ນະຈັນ ຕະລິວົງ ຫົວໜ້າຫ້ອງການທະນາຄານແຫ່ງ ສປປ ລາວ ພາກໃຕ້ແຂວງຈຳປາສັກ, ທ່ານ ສຸລິຈັນ ຈັນທະສິນ ເຈົ້າເມືອງໆປາກເຊ, ທ່ານ ໜູເຄືອບ ສິດທິເດດ ຜູ້ອຳນວຍການສະຖາບັນການເງິນດັ່ງກ່າວພ້ອມດ້ວຍບັນດາທ່ານແຂກຜູ້ໃຫຍ່ທີ່ກ່ຽວຂ້ອງ, ພະນັກງານ, ນັກວິຊາການພາຍໃນສະຖາບັນເຂົ້າຮ່ວມຢ່າງພ້ອມພຽງ.
ທ່ານ ໜູເຄືອບ ສິດທິເດດ ໄດ້ກ່າວວ່າ: ສະຖາບັນການເງິນຈຸລະພາກທີ່ຮັບເງິນຝາກຈຳປາສັກ ຈຳກັດ ໄດ້ຮັບອະນຸມັດ ຈາກທະນາຄານແຫ່ງ ສປປ ລາວ, ໃນການສ້າງຕັ້ງຂຶ້ນໃນເດືອນມີນາ 2015 ຈຸດປະສົງແມ່ນແນໃສ່ການແກ້ໄຂຄວາມທຸກຍາກຂອງປະຊາຊົນ ແລະ ເພື່ອນຳເອົາປະເທດຫຼຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2020, ພາລະກິດຕົ້ນຕໍຂອງສະຖາບັນພວກເຮົາແມ່ນຂະຫຍາຍການບໍລິການໄປສູ່ປະຊາຊົນທຸກຊຸມຊົນ, ທຸກພາກສ່ວນທີ່ມີລາຍໄດ້ໜ້ອຍໃຫ້ເຂົາເຈົ້າໄດ້ມີໂອກາດເຂົ້າເຖິງການບໍລິການສິນເຊື່ອ ແລະຮັບເງິນຝາກທີ່ເໝາະສົມກັບຄວາມອາດສາມາດ ແລະຄວາມຕ້ອງການຂອງເຂົາເຈົ້າ.
ທ່ານກ່າວຕື່ມວ່າ: ນັບແຕ່ມື້ເປີດບໍລິການແກ່ລູກຄ້າເປັນຕົ້ນມາຮອດທ້າຍປີ 2015 ສະຖາບັນການເງິນແມ່ນໄດ້ໃຫ້ບໍລິການເງິນຈຸລະພາກໃຫ້ແກ່ລູກຄ້າທັງໝົດ 4.026 ຄົນ ໃນນັ້ນຍັງມີລູກຄ້າທີ່ສຶບຕໍ່ເຄື່ອນໄຫວນຳພວກເຮົາໃນປີ 2016 ຈຳນວນ 3.704 ຄົນ, ສາມາດລະດົມເງິນຝາກໄດ້ກວ່າ 56 ຕື້ກີບ, ແລະ ປ່ອຍກູ້ຈຸລະພາກໄດ້ 51 ຕື້ກວ່າກີບ, ໃນທ້າຍປີ 2015 ຍອດເງິນເຫຼືອກູ້ຂອງລູກຄ້າແມ່ນ 37 ຕື້ກວ່າກີບ, ໃນນັ້ນ 49% ແມ່ນການກູ້ຢືມເພື່ອໄປຊົມໃຊ້ໃນຄົວເຮືອນ 30% ແມ່ນການກູ້ຢືມເພື່ອການກະສີກຳ ແລະ 21% ແມ່ນການກູ້ຢືມເພື່ອການຄ້າ.
ສຳລັບໃນປີ 2016 ນີ້ ຜູ້ອຳນວຍການຢ້ຳຕື່ມວ່າ: ສະຖາບັນການເງິນຈຸລະພາກພວກເຮົາມີແຜນທີ່ຈະຂະຫຍາຍຕາໜ່າງການບໍລິການໃຫ້ກວ້າງຂວາງຂຶ້ນ ເພື່ອໃຫ້ເຂົ້າເຖິງລູກຄ້າທີ່ມີຄວາມຕ້ອງການໃນທຸກຂົງເຂດ ແລະເປົ້າໝາຍ ຈະສູ້ຊົນບໍລິການລູກຄ້າໃຫ້ໄດ້ 6.260 ຄົນ, ລະດົມເງິນຝາກຈາກມວນຊົນໃຫ້ໄດ້ 15,6 ຕືກີບ, ໃຫ້ບໍລິການເງິນກູ້ຈຸ ລະພາກໃຫ້ໄດ້ 60,8 ຕື້ກີບ ແລະ ຄາດຄະເນຍອດເຫຼືອເງິນທ້າຍປີນີ້ 67,56 ຕື້ກີບ.
ທີ່ມາ: