ສະຫະລັດ ແລະເກົາຫລີໃຕ້ ເລີ່ມການຊ້ອມຮົບຮ່ວມທາງທະຫານປະຈຳປີ ໃນວັນເສົາມື້ນີ້ ບໍ່ເທົ່າໃດມື້ຫລັງຈາກເກົາຫລີເໜືອໄດ້ຂົ່ມຂູ່ວ່າ ຈະຕອບໂຕ້ຖ້າຫາກວ່າການຊ້ອມຮົບໄດ້ກາຍເປັນການໂຈມຕີ ຊຶ່ງການຂົ່ມຂູ່ເຫຼົ່ານີ້ ແມ່ນໄດ້ມີຂຶ້ນໃນແຕ່ລະປີ.
ການຊ້ອມຮົບປະຈຳປີ ຂອງສະຫະລັດ ແລະ ເກົາຫລີໃຕ້ ໃຊ້ເວລາທັງໝົດແປດ ອາທິດ ແລະ ໄດ້ວາງແຜນໄວ້ຢ່າງລະອຽດຮອບຄອບ. ກິດຈະການໃນວັນເສົາມື້ ນີ້ ແມ່ນເລີ້ມຕົ້ນດ້ວຍທະຫານສະຫະລັດ ແລະ ເກົາຫລີໃຕ້ ທີ່ຢູ່ໃນລົດລຳລຽງພົນ ບຸກໂຈມຕີຊາຍຫາດ ທາງແຄມທະເລພາກຕາເວັນອອກຂອງເກົາຫລີໃຕ້.
ກະຊວງປ້ອງກັນປະເທດເກົາຫລີໃຕ້ ຮ້ອງການຊ້ອມຮົບນີ້ວ່າ “ໃຫຍ່ສຸດເທົ່າທີ່ເຄີຍມີມາ” ໂດຍມີທະຫານເກົາຫລີໃຕ້ 300,000 ຄົນ ແລະ ທະຫານສະຫະລັດ ຢ່າງໜ້ອຍ 17,000 ຄົນ ເຂົ້າຮ່ວມ.
ຖະແຫລງການຂອງສະຫະລັດ ທີ່ນຳອອກເຜີຍແຜ່ກ່ອນການຊ້ອມຮົບເລີ້ມຂຶ້ນ ກ່າວວ່າເຮືອບິນນາວິກະໂຍທິນສະຫະລັດ 55 ລຳ ແລະ ກຳປັ່ນ 30 ລຳຂອງ ສະຫະລັດ ແລະ ເກົາຫລີໃຕ້ ໄດ້ເຂົ້າຮ່ວມການຊ້ອມລົບທີ່ມີຂຶ້ນ ໃກ້ກັບເມືອງ Pohang.
ກອງທັບເກົາຫລີເໜືອໄດ້ກ່າວວ່າ ຕົນໄດ້ຕຽມພ້ອມທີ່ຈະປະເຊີນໜ້າກັບກຳລັງສະຫະລັດ ແລະ ເກົາຫລີໃຕ້ “ດ້ວຍການໂຈມຕີແບບສາຍຟ້າແມບທີ່ແນ່ນນອນ ໃນແບບສະບັບຂອງເກົາຫລີ.”
ໃນການຕອບໂຕ້ ກະຊວງປ້ອງກັນປະເທດເກົາຫລີໃຕ້ ໄດ້ເຕືອນພຽງບາງຢ່າງກ່ຽວກັບ“ຄວາມປະພຶດແບບຢັ້ງຄິດ” ແລະ “ການທ້າທາຍຕ່າງໆ.”
ແຫລ່ງຂ່າວຈາກ: http://lao.voanews.com/