ທ່ານ ອັລດຸນ ຣາມານ ລັດຖະມົນຕີ​ວ່າການ​ກະຊວງ​ການ​ເງິນ​ຄົນທີ 2 ຖະ​ແຫຼ​ງຕໍ່ກອງ​ປະຊຸມ​ສະພາ​ນິຕິບັນຍັດ​ຄັ້ງ​ທີ່ 12 ທີ່​ກຳລັງ​ດຳ​ເນີນ​ຢູ່​ໃນ​ຂະນະ​ນີ້​ວ່າ ລາຄາ​ນ້ຳມັນ​ທີ່​ຫຼຸດ​ລົງ​ຫຼາຍ​ກວ່າ 70% ຕັ້ງ​ແຕ່​ປີ 2014 ​ເຮັດ​ໃຫ້​ຄາດ​ວ່າ ລັດຖະບານ​ຈະ​ມີ​ລາຍ​ໄດ້​ໃນ​ປີ​ງົບປະມານ 2016-2017 ຢູ່​ທີ່ 1,76 ຕື້​ໂດ​ລາບຣູ​ໄນ ສ່ວນ​ລາຍ​ຈ່າຍ​ຈະ​ຢູ່​ທີ່ 5,6 ຕື້​ໂດ​ລາບຣູ​ໄນ ​ເຮັດ​ໃຫ້​ຍອດ​ຂາດ​ດຸນ​ການ​ຄ້າ​ສູງ​ກວ່າ​ປີ​ງົບປະມານ 2015-2016 ທີ່​ຈະ​ສິ້ນ​ສຸດ​ໃນ​ວັນ​ທີ 31 ມີນາ​ນີ້ປະມານ 68% ສະ​ເພາະ​ລາຍ​ໄດ້​ຈາກ​ນ້ຳມັນ ​ແລະ ​ແກ໊ສ​ໃນ​ປີ​ງົບປະມານ​ທີ່​ຈະ​ມາ​ເຖິງ​ນີ້​ຄາດ​ວ່າ ຈະ​ຕໍ່າ​ກວ່າ​ປີ​ງົບປະມານ​ປະຈຸ​ບັນ​ກວ່າ 70%.

ທ່ານ ຣາມານ​ຊີ້​​ແຈງ​ວ່າ ການ​ຄາດ​ຄະ​ເນ​ຕົວ​ເລກ​ລາຍ​ໄດ້​ຂອງ​ລັດຖະບານ​ໃນ​ປີ​ງົບປະມານ 2016-2017 ​ເປັນ​ການ​ຄາດ​ຄະ​ເນ​ຢ່າງ​ລະ​ມັດ​ລະວັງ​ເພື່ອ​ໃຫ້​ລັດຖະບານ​ຈັດ​ສັນ​ເງິນ​ຢ່າງຮອບ​ຄອບຫຼາຍ​ຂຶ້ນ ທ່ານຣາມານ​ຂໍ​ໃຫ້​ພາກ​ລັດ ​ແລະ ​ເອກະ​ຊົນ​ເພີ່ມ​ປະສິດທິພາບ​ການ​ຜະລິດ​ຢ່າງ​ເຕັມ​ກຳລັງ ຫຼີກ​ເວັ້ນການ​ໃຊ້​ຈ່າຍ​ທີ່​ບໍ່​ຈຳ​ເປັນ ​ແລະ ສ້າງ​ຄວາມ​ຫຼາກ​ຫຼາຍ​ທາງ​ເສດຖະກິດ ພ້ອມ​ກັບ​ອ້າງ​ການ​ຄາ​ດຄະ​ເນ​ຂອງ​ກະຊວງ​ວາງ​ແຜນ​ເສດຖະກິດ ​ແລະ ການ​ພັດທະນາ​ວ່າ ​ເສດຖະກິດ​ປີ 2015 ທີ່​ຜ່ານ​ມາ​ນ່າຈະ​ຫົດ​ຕົວ 1,1% ​ແລະ ຈະ​ກັບ​ມາ​ຂະຫຍາ​ຍຕົວ 2,3%​ໃນ​ປີ​ນີ້.