ໂດຍ: ໂອຫຼົດ
ຫົວພັນເປັນແຂວງໜຶ່ງທີ່ຕັ້ງຢູ່ທາງພາກເໜືອສຸດຂອງປະເທດລາວຕັ້ງຢູ່ທິດຕາເວັນອອກສຽງເໜືອຂອງແຂວງຊຽງຂວາງ ຊຶ່ງເສັ້ນທາງເຂົ້າເຖິງແຂວງດັ່ງກ່າວຂ້ອນຂ້າງຫຍຸ້ງຍາກພໍສົມ ຄວນ ເນື່ອງຈາກມີພູເຂົາອ້ອມຮອບຫຼາຍເຮັດໃຫ້ການສ້າງເສັ້ນທາງຄົດລ້ຽວ, ການເດີນທາງຈິ່ງຕ້ອງໃຊ້ເວລາດົນ ແລະ ມີຄວາມສ່ຽງສົ່ງຜົນເຮັດໃຫ້ການຂົນສົ່ງສິນຄ້າລຳບາກທີ່ສຳຄັນບັນຍາກາດການທ່ອງທ່ຽວແຂວງບໍ່ຄຶກຄື້ນເທົ່າທີ່ຄວນ, ຂະນະທີ່ປະຈຸບັນໂຄງການກໍ່ສ້າງສະໜາມບິນໜອງຄ້າງຊຳເໜືອໃກ້ຈະສຳເລັດຄາດກາງປີໜ້າເປີດນຳໃຊ້ ແລະ ເຊື່ອແນ່ວ່າຈະເປັນອີກເສັ້ນທາງດຶງດູດນັກທ່ອງທ່ຽວເຂົ້າທ່ຽວຊົມແຂວງຫຼາຍຂຶ້ນ.
ສຳລັບໂຄງການກໍ່ສ້າງສະໜາມບິນໜອງຄ້າງ ເມືອງຊຳເໜືອ ແຂວງຫົວພັນ ເປັນໂຄງການໜຶ່ງຂອງລັດຖະບານ ສປປ ລາວ ທີ່ສ້າງຂຶ້ນມາເພື່ອຮອງຮັບເຮືອບິນສາຍພາຍໃນ ແລະ ຕ່າງປະເທດໃນອະນາຄົດ ເພື່ອເປັນການຊຸກຍູ້ ແລະ ສົ່ງເສີມການພັດທະນາເສດຖະກິດສັງຄົມ ແລະ ການຂົນສົ່ງສິນຄ້າທາງອາກາດ ໂດຍສະເພາະຂະແໜງການທ່ອງທ່ຽວຂອງແຂວງຫົວພັນກໍຄືພາຍໃນປະເທດ ເນື່ອງຈາກວ່າແຂວງຫົວພັນເປັນແຂວງທີ່ມີສະຖານທີ່ທ່ອງທ່ຽວທີ່ຫຼາກຫຼາຍ ແລະ ສວຍງາມທາງດ້ານວັດທະນະທຳ, ທຳມະຊາດ ແລະ ປະຫວັດສາດເປັນຕົ້ນ: ເມືອງວຽງໄຊອະດີດສູນບັນຊາການໃຫຍ່ຂອງກຸ່ມຜູ້ນຳຂະບວນການປະເທດລາວ, ເມືອງຊຳເໜືອ ເມືອງເອກຂອງແຂວງຫົວພັນມີຊາຍແດນຕິດກັບຫວຽດນາມຕັ້ງຢູ່ທ່າມກາງຮ່ອມພູອັນຂຽວຂະຈີມີ ຄວາມສູງ 1.200 ແມັດ ເປັນເມືອງທີ່ມີທິວທັດທີ່ສວຍງາມ, ຕາດສະເຫຼີຍ, ວັດໂພໄຊໄຊຍະລາມ ແລະ ອີກຫຼາຍໆແຫ່ງທີ່ມີຄວາມໂດດເດັ່ນເປັນເອກະລັກ.
ແນວໃດກໍດີ ໂຄງການກໍ່ສ້າງສະໜາມບິນໜອງຄ້າງ ເມືອງຊຳເໜືອ ທີ່ຄາດກາງປີໜ້າຈະເປີດນຳໃຊ້ນັ້ນເຊື່ອວ່າຈະເປັນອີກຊ່ອງທາງໜຶ່ງທີ່ຈະສາມາດດຶງດູດນັກທ່ອງທ່ຽວທັງພາຍໃນແລະ ຕ່າງປະເທດໃຫ້ເດີນທາງເຂົ້າມາທ່ຽວຊົມແຂວງຫົວພັນນັບມື້ນັບຫຼາຍຂຶ້ນ ເພາະວ່າການສັນຈອນທາງອາກາດມີຄວາມສະດວກສະບາຍ ແລະ ວ່ອງໄວ ເຖິງແມ່ນວ່າຄ່າໃຊ້ຈ່າຍຈະຂ້ອນຂ້າງສູງແຕ່ກໍຖືເປັນທາງເລືອກໃຫ້ກັບບຸກຄົນທີ່ເດີນທາງໄປແຂວງດັ່ງກ່າວ ແລະ ຈະສົ່ງຜົນເຮັດໃຫ້ບັນຍາກາດການທ່ອງທ່ຽວພາຍໃນແຂວງຫົວພັນມີຄວາມຟົດຟື້ນຂຶ້ນ.
ທີ່ມາ ເສດຖະກິດ-ການຄ້າ