ໃນໂອກາດທີ່ຄະນະຜູ້ແທນສາກົນ ເດີນທາງມາເຂົ້າຮ່ວມກອງປະຊຸມດ້ານພະລັງງານ ທີ່ນະຄອນຫລວງວຽງຈັນ ແລະ ໄດ້ເດີນທາງໄປຢ້ຽມຢາມ ເບິ່ງການກໍ່ສ້າງເຂື່ອນໄຟຟ້າພະລັງງານນໍ້າໄຊຍະບູລີ ເມື່ອທ້າຍອາທິດຜ່ານມາ, ທ່ານຮອງຜູ້ອໍານວຍການ ບໍລິສັດ ໄຊຍະບູລີ ພາວເວີ ໄດ້ລາຍງານໃຫ້ຮູ້ວ່າ: ມາຮອດປັດຈຸບັນ ການກໍ່ສ້າງໂຄງການດັ່ງກ່າວ ມີຄວາມຄືບໜ້າຫລາຍກວ່າ 60%, ໂດຍໜ້າວຽກທີ່ສໍາເລັດປະກອບມີ:ການກໍ່ສ້າງຕົວເຂື່ອນຝັ່ງເບື້ອງຂວາ ແລະ ພວມດຳເນີນການກໍ່ສ້າງ ເຮືອນຈັກຕົວເຂື່ອນຝັ່ງເບື້ອງຊ້າຍ.
ໂຄງການດັ່ງກ່າວ ມີລັກສະນະຄືຝາຍນ້ຳໄຫລຜ່ານ ທີ່ບໍ່ມີການເກັບກັກນ້ຳ, ເຊິ່ງໄດ້ໃຊ້ເທັກໂນໂລຊີທີ່ທັນສະໄໝ, ໄດ້ມີການອອກແບບປະຕູນ້ຳ ເພື່ອໃຫ້ປາສາມາດຂຶ້ນ-ລົງໄດ້ຢ່າງສະດວກສະບາຍຕາມລະດູການ, ມີຊ່ອງທາງແລ່ນເຮືອ ກວ້າງ 12 ແມັດ, ຍາວ 700 ແມັດ ສາມາດຮອງຮັບເຮືອຂົນສົ່ງສິນຄ້າຂະໜາດໃຫຍ່ ເຖິງ 500 ໂຕນ, ເຂື່ອນແຫ່ງນີ້ ມີກໍາລັງຕິດຕັ້ງທັງໝົດ 1.285 ເມກາວັດ ແລະ ຈະມີມູນຄ່າການລົງທຶນຫລາຍກວ່າ 3 ຕື້ໂດລາສະຫະລັດ, ໂດຍຈະສົ່ງກະແສໄຟຟ້າຂາຍໃຫ້ປະເທດໄທ ຈໍານວນ 1.225 ເມກາວັດ ແລະ 60 ເມກາວັດ ຈະນຳໃຊ້ຢູ່ພາຍໃນປະເທດ, ປັດຈຸບັນມີພະນັກງານ-ກໍາມະກອນ ເຮັດວຽກຫລາຍກວ່າ 8 ພັນຄົນ, ໃນນັ້ນປະມານ 60% ແມ່ນແຮງງານລາວ.
ແຫລ່ງຂ່າວ:
