ແຫຼ່ງມໍລະດົກໂລກວັດພູຈຳປາສັກໄດ້ຮັບການຄັດເລືອກໃຫ້ເປັນສະຖານທີ່ທ່ອງທ່ຽວຍອດນິຍົມ 2 ປີຊ້ອນຄື: ປີ 2015-2016, ໂດຍ ເວັບໄຊ ສປ ຈີນ ທີ່ມີສຳນັກງານຕັ້ງ ຢູ່ນະຄອນຫຼວງປັກກິ່ງເປັນຜູ້ຄັດເລືອກ.
ຫ້ອງການມໍລະດົກໂລກວັດພູຈຳປາສັກແຈ້ງໃຫ້ຮູ້ຫວ່າງບໍ່ດົນມາ ນີ້ວ່າ: ມໍລະດົກໂລກວັດພູພ້ອມພື້ນທີ່ວັດທະນະທຳຈຳປາສັກໄດ້ຮັບການຄັດເລືອກໃຫ້ເປັນສະຖານທີ່ທ່ອງທ່ຽວຍອດນີຍົມປະຈຳປີ 2015 ແລະ2016 (2 ປີຕິດຕໍ່ກັນ), ໂດຍເວັບໄຊ ສປ ຈີນ.
ໃນແຕ່ລະປີເວັບໄຊດັ່ງກ່າວຈະດຳເນີນການຄັດເລືອກສິ່ງທີ່ເອີ້ນວ່າທາງເລືອກສູງສຸດ (Top Choice) ໂດຍແບ່ງອອກເປັນ 4 ປະເພດຄື: ສະຖານທີ່ທ່ອງທ່ຽວຍອດນິຍົມ, ໂຮງແຮມ, ຮ້ານອາຫານ ແລະຮ້ານຄ້າ, ໃນນັ້ນ ມໍລະດົກໂລກວັດພູຈຳປາສັກ ພ້ອມພື້ນທີ່ວັດທະນະທຳຈຳປາສັກ ໄດ້ຮັບຄັດເລືອກໃຫ້ເປັນສະຖານທີ່ ທ່ອງທ່ຽວຍອດນິຍົມ ປະຈຳປີ 20152016, ໂດຍໃຫ້ຫຼຽນໄຊ ເປັນເຄື່ອງໝາຍຢັ້ງຢືນ ແລະສິ່ງດັ່ງກ່າວໄດ້ສະແດງອອກໃຫ້ເຫັນເຖິງ ຄວາມປະທັບໃຈຂອງນັກທ່ອງທ່ຽວ ໃນທົ່ວໂລກທີ່ມີຕໍ່ບັນດາແຫຼ່່ງສະ ຖານບູຮານ, ວັດຖຸບູຮານ, ທີ່ນອນໃນ ພື້ນທີ່ມໍລະດົກໂລກຂອງພວກເຮົາ ຊຶ່ງແມ່ນໝາກຜົນ ແລະຜົນງານ ຂອງການເອົາໃຈໃສ່ໃນການຄຸ້ມ ຄອງປົກປັກຮັກສາຂອງອຳນາດການປົກຄອງທຸກຂັ້ນນັບແຕ່ສູນກາງລົງເຖິງທ້ອງຖິ່ນ, ແມ່ນກຽດຕິຍົດ ອັນໜື່ງທີ່ພວກເຮົາຄວນພາກພູມໃຈ ເຊີດຊູ ແລະເສີມຂະຫຍາຍໃຫ້ດີຍິ່ງໆ ຂຶ້ນ.
ຢ່າງໃດກໍຕາມ ສປປ ລາວ ເຮົາມີແຫຼ່ງມໍລະດົກໂລກ 2 ແຫ່ງທີ່ຖືກຮັບຮອງເອົາຈາກອົງການອຸຍເນັດສະໂກ, ໃນນັ້ນມີແຫຼ່ງມໍລະດົກໂລກຫຼວງພະບາງ ແລະແຫຼ່ງມໍລະດົກໂລກຈຳປາ ສັກ ຊຶ່ງແຕ່ລະປີມໍລະດົກໂລກ 2 ແຫ່ງໄດ້ດຶງດູດ ແລະສ້າງລາຍຮັບທີ່ສຳຄັນເຂົ້າປະເທດ, ເຫັນໄດ້ໃນປີ 2015 ຜ່ານມາມີນັກທ່ອງທ່ຽວເຂົ້າມາຢ້ຽມຢາມປະ ເທດລາວທັງໝົດປະມານ 4 ລ້ານກວ່າຄົນ ແລະສາມາດສ້າງລາຍຮັບໄດ້ສູງເຖິງ 670 ລ້ານໂດລາສະຫະລັດ.
ຂ່າວຈາກ http://www.sedthakid.la/