ສຳນັກຂ່າວຕ່າງປະເທດ ລາຍງານໃນວັນທີ 8 ມີນາຜ່ານມານີ້ວ່າ ຄະນະນັກທໍລະນີວິທະຍາຈີນ ແລະ ຝຣັ່ງ ໄດ້ຄົ້ນພົບຖ້ຳຂະໜາດໃຫຍ່ ຢູ່ເລິກລົງໄປໃຕ້ດິນ ປະມານ 420 ແມັດ ໂດຍພາຍໃນຖ້ຳ ປະກອບມີທະເລສາບ, ແມ່ນ້ຳ, ນ້ຳຕົກຕາດ, ຫີນງອກຮູບຊົງສວຍງາມຕ່າງໆ ຕະຫລອດຮອດພືດ, ປາ, ເຈຍ, ງູ ແລະ ສິ່ງທີ່ມີຊີວິດສາຍພັນອື່ນໆ ຊຶ່ງຄາດວ່າຖ້ຳດັ່ງກ່າວ ຈະມີຄວາມຍາວຫລາຍກວ່າ 16.5 ກິໂລແມັດ.
ຖ້ຳດັ່ງກ່າວ ຕັ້ງຢູ່ເມືອງຕົງຫລັນ ແຂວງກວາງຊີ ທາງພາກໃຕ້ຂອງປະເທດຈີນ ຊຶ່ງເປັນເຂດພື້ນທີ່ ທີ່ມີພູມສັນຖານອັນເປັນລັກສະນະຊັ້ນຫີນປູນ ຖືກກັດເຊາະຈົນກາຍເປັນຂຸມ, ເປັນຖ້ຳ ແລະ ທາງນ້ຳ ຕ່າງໆ.
