ໂຮງຮຽນ ມສ. ຊົນເຜົ່າແຂວງຈໍາປາສັກ ຈັດການແຂ່ງຂັນສິລະປະວັນນະຄະດີ ປະຈຳປີ 2015-2016
ເພື່ອເປັນການສົ່ງເສີມສິລະປະວັນນະຄະດີໃຫ້ຕິດພັນກັບການຮຽນ-ການສອນ ໃຫ້ນັກຮຽນຮູ້ຮັກສາຮີດຄອງ ປະເພນີວັດທະນະທຳອັນດີງາມ ເປັນຜູ້ສືບທອດມໍລະດົກອັນລໍ້າຄ່າ ທີ່ບັນພະບູລຸດໄດ້ສ້າງປະໄວ້ບໍ່ໃຫ້ສູນສິ້ນໄປ ພ້ອມນັ້ນ ກໍເປັນການປຸກຈິດສຳນຶກ ສ້າງໂອກາດໃຫ້ນັກຮຽນຜູ້ທີ່ມີພອນສະຫວັນ ໄດ້ກ້າສະແດງອອກບົນເວທີອັນມີກຽດສະຫງ່າ ການແຂ່ງຂັນສິລະປະວັນນະຄະດີ ປະຈຳສົກປີ 2015-2016 ໄດ້ຈັດຂຶ້ນຢູ່ສະໂມສອນຂອງໂຮງຮຽນ ມສ. ຊົນເຜົ່າແຂວງຈໍາປາສັກ ໃນວັນທີ 04 ມີນາ 2016 ຜ່ານມາ ໂດຍການເປັນກຽດເຂົ້າຮ່ວມຂອງທ່ານ ສົມສະໜິດ ອະພິເດດ ຜູ້ອຳນວຍການ ມສ. ຊົນເຜົ່າ ແຂວງຈຳປາສັກ ມີພະນັກງານ ຄູ-ອາຈານ ນ້ອງນັກຮຽນແຕ່ຊັ້ນ ມ.1 – ມ.7 ເຂົ້າຮ່ວມ.
ການແຂ່ງຂັນສິລະປະວັນນະຄະດີ ຈັດເປັນ 2 ຮຸ່ນຄື ຮຸ່ນເຍົາວະຊົນ ແຕ່ຊັ້ນ ມ.1-ມ.3 ແລະ ຮຸ່ນຊາວໝຸ່ມ ແຕ່ຊັ້ນ ມ.4-ມ.7 ໂດຍການແຂ່ງຂັນຈັດເປັນລາຍການຟ້ອນເຊັ່ນ ຟ້ອນທ່ຽວຊົມຫຼວງພະບາງ ຟ້ອນອວຍພອນ ຟ້ອນສົ່ງພອນປີໃໝ່ ຟ້ອນແດນແຫ່ງອິດສະຫຼະ ຟ້ອນສາວລາວມ່ວນຊື່ນ ຟ້ອນມ່ວນແທ້ບ້ານເຮົາ ຟ້ອນຊາດລາວເຜົ່າລາວ ຟ້ອນແກ້ວຫຼັກເມືອງ ຟ້ອນຊົມເຊີຍຄູ ຟ້ອນລຳຕັ່ງຫວາຍ ຟ້ອນສຽງແຄນລາວ ຟ້ອນສາວລາວຕຳແຜ່ນ ຟ້ອນສີພາຍລາວ ຟ້ອນແສງອາລຸນ ຟ້ອນຫົງຟ້າ ເຊິ່ງແຕ່ລະລາຍການນັ້ນ ບັນດານັກຮຽນໄດ້ໃຊ້ຄວາມຄິດຂອງຕົນເອງ ບວກກັບຄູ-ອາຈານ ແນະນຳຊ່ອຍ ໃນການຄົ້ນຄິດປະດິດຄິດແຕ່ງບົດຟ້ອນຕ່າງໆ ເຊິ່ງສາມາດສ້າງສີສັນທີ່ເປັນໜ້າຈັບອົກຈັບໃຈເມື່ອໄດ້ເບິ່ງໄດ້ຊົມເວລານັກຮຽນຂຶ້ນສະແດງອອກຢູ່ບົນເວທີ.