ທ່ານ ພັທ ຄຳເກິ່ງ ຈັນສຸລິມາດ ຫົວໜ້າກອງບັນຊາການ ປກສ ເມືອງໄຊເສດຖາ ນະຄອນຫລວງວຽງຈັນ ໄດ້ຖະແຫລງກ່ຽວກັບ ການມ້າງກຸ່ມແກ້ງຄ້າຂາຍຢາເສບຕິດລາຍໃຫຍ່ ຢູ່ບ້ານໜອງບົວທອງ ເມືອງສີໂຄດຕະບອງ ນະຄອນຫລວງວຽງຈັນ ວ່າ: ໃນລະຫວ່າງເດືອນກຸມພາຜ່ານມາ, ໄດ້ຮັບແຈ້ງຈາກພົນລະເມືອງດີວ່າ ມີກຸ່ມແກ້ງຊື້ຂາຍຢາເສບຕິດລາຍໃຫຍ່ຢູ່ບ້ານດັ່ງກ່າວ, ເຈົ້າໜ້າທີ່ຈຶ່ງລົງເກັບກຳຂໍ້ມູນຫລັກຖານຂອງ ອຳນາດການປົກຄອງບ້ານ ແລະ ຕົກມາຮອດວັນທີ 2 ມີນານີ້, ເວລາປະມານ 13 ໂມງ ຈຶ່ງໄດ້ນຳກຳລັງ ລົງມ້າງເປົ້າໝາຍດັ່ງກ່າວ, ຢູ່ເຮືອນຫ້ອງເຊົ່າ 2 ຊັ້ນ ຜ່ານການກວດຄົ້ນຫ້ອງທີ 1: ພົບຜູ້ຖືກຫາ ຈຳນວນ 2 ຄົນ ຊື່ ທ້າວ ວັນນະແສງ (ຕ້ຳ), ອາຍຸ 24 ປີ ແລະ ທ້າວ ມະໄລກັນ (ກຶ້ມ) ອາຍຸ 22 ປີ. ທັງສອງເປັນສອງອ້າຍນ້ອງ, ພາຍໃນຫ້ອງພົບຂອງກາງຢາເສບຕິດ ປະເພດຢາບ້າ 964 ເມັດ, ຢາໄອ້ 2 ຖົງນ້ອຍ, ປືນສັ້ນ 1 ກະບອກ, ເງິນກີບ 4,3 ລ້ານກີບ, 5.500 ບາດ ສະກຸນເງິນໄທ, ລົດຈັກ 1 ຄັນ, ລົດໃຫຍ່ 1 ຄັນ.
ຫລັງຈາກນັ້ນ ເຈົ້າໜ້າທີ່ໄດ້ເຂົ້າກວດຫ້ອງທີ 2: ພົບຜູ້ຖືກຫາຈຳນວນ 2 ຄົນ ຊື່ ນາງ ບົວສະຫວັນ (ນ້ອຍ), ອາຍຸ 29 ປີ, ເຈົ້າຂອງຫ້ອງ ແລະ ທ້າວ ຄຳສອນ (ແຫລ້), ອາຍຸ 39 ປີ ຢູ່ບ້ານນາແຮ່ ເມືອງສີໂຄດຕະບອງ ພາຍໃນຫ້ອງນອນ ພົບຂອງກາງເປັນຢາບ້າ ຈຳນວນ 24 ຖົງ, ຢາໄອ້ 3 ຖົງນ້ອຍ ແລະ ພົບຢາບ້າໃນຕູ້ເຊັບຕື່ມອີກ 3 ມັດເຄິ່ງ, ເງິນ 9 ລ້ານກີບ ແລະ 31.500 ບາດ, ພ້ອມນັ້ນ ຍັງພົບປືນສັ້ນ 3 ກະບອກ, ພ້ອມລູກປືນຈຳນວນໜຶ່ງ.
ຜ່ານການສືບສວນ-ສອບສອນ ພວກກ່ຽວຮັບສາລະພາບວ່າ ໄດ້ເຄື່ອນໄຫວຊື້ຂາຍຢາເສບຕິດແທ້ ແລະ ຂອງກາງທີ່ເຈົ້າໜ້າທີ່ກວດພົບ ກໍເປັນຂອງພວກກ່ຽວແທ້, ພ້ອມນີ້ ເຈົ້າໜ້າທີ່ຈະໄດ້ສືບຕໍ່ເປີດກວ້າງ ເພື່ອນຳຈັບກຸມກຸ່ມແກ້ງຮ່ວມຂະບວນການ ມາດຳເນີນຄະດີຕາມລະບຽບກົດໝາຍ.
ແຫລ່ງຂ່າວ:
