ວັນທີ 4 ມີນານີ້, ຢູ່ຫ້ອງຕຳຫຼວດ ນະຄອນຫຼວງວຽງຈັນ ທ່ານ ພັທ ຄຳແພງ ໄຊຍະລາດ ຮອງກອງບັນຊາການ ປກສ ນະຄອນຫຼວງວຽງຈັນ, ໄດ້ຖະແຫຼງກ່ຽວກັບຜົນການຈັບກຸ່ມເປົ້າໝາຍທີ່ກໍ່ຄວາມບໍ່ສະຫງົບໃນຕົວເມືອງ, ໂດຍການນຳເຂົ້າອາວຸດເສິກ ແລະວັດຖຸລະເບີດຈຳນວນຫຼາຍ ເພື່ອກໍ່ຄວາມບໍ່ສະຫງົບຢູ່ນະຄອນຫຼວງວຽງຈັນວ່າ: ພາຍຫຼັງໄດ້ຮັບແຈ້ງວ່າມີການເຄື່ອນໄຫວ
ຂອງກຸ່ມຄົນບໍ່ດີ, ມີການນຳເຂົ້າອາວຸດເສິກຈຳນວນບໍ່ໜ້ອຍ ເພື່ອມາຈຳໜ່າຍໃຫ້ກຸ່ມຄົນບໍ່ດີທີ່ອາໃສຢູ່ໃນນະຄອນຫຼວງວຽງຈັນ, ດັ່ງນັ້ນ ເຈົ້າໜ້າທີ່ ປກສ ນະຄອນຫຼວງວຽງຈັນ ໄດ້ແຕ່ງຕັ້ງເຈົ້າໜ້າທີ່ວິຊາສະເພາະສົມທົບກັບພາກສ່ວນກ່ຽວຂ້ອງ ເພື່ອລົງເກັບກຳຂໍ້ມູນນຳມາວິເຄາະຢ່າງຊັດເຈນ. ນັບແຕ່ເດືອນມີຖຸນາ 2015 ຈົນເຖິງວັນທີ 24 ພະຈິກ 2015 ຈິ່ງສາມາດຈັບກຸ່ມເປົ້າໝາຍໄດ້ທັງໝົດ 12 ຄົນ, ຍິງ 5 ຄົນ, ໃນນັ້ນ ມີສັນຊາດໄທ 9 ຄົນ, ຍິງ 4 ຄົນ ແລະຮອດວັນທີ 28 ພະຈິກ 2015 ສາມາດຈັບເປົ້າໝາຍໄດ້ຕື່ມອີກ 8 ຄົນ, ຍິງ 4 ຄົນ ລວມທັງໝົດເປັນ 20 ຄົນ, ຍິງ 9 ຄົນ, ພ້ອມນີ້ ຍັງສາມາດຢືດຂອງກາງໄດ້ຄື: ປືນຊະນິດຕ່າງໆ 28 ກະບອກ, ໃນນັ້ນ ປືນເຫຼັກຍາວ 17 ກະບອກ, ປືນສັ້ນ 11 ກະບອກ, ໝາກແຕກ 24 ໜ່ວຍ, ລູກປືນຊະນິດຕ່າງໆເກືອບ 700 ລູກ ແລະ ກະສອບລູກປຶນມີແກັບ 53 ກະສອບ, ໂຄງໃສ່ປືນສັ້ນສຳລັບຍິງໄກ 3 ຊຸດ, ກ້ອງສ່ອງສຳລັບຕິດປືນ 3 ໜ່ວຍ, ສິ້ນສ່ວນປະກອບປືນສັ້ນ 13 ອັນ, ໜ້າເຮັດດ້ວຍເຫຼັກ 1 ອັນ, ງ້າວ 3 ດວງ, ຢາໄອ້ 1 ຖົງໃຫຍ່ ແລະ 19 ຖົງນ້ອຍ, ຢາບ້າ 119 ເມັດ ແລະເຄື່ອງວັດຖຸອື່ນໆອີກເປັນຈຳນວນຫຼາຍ.
ເຈົ້າໜ້າທີ່ໃຫ້ຮູ້ວ່າ: ຜ່ານການສືບສວນ-ສອບສວນ ພວກກ່ຽວໄດ້ຮັບສາລະພາບວ່າໄດ້ຮ່ວມກັນຊື້ຂາຍ, ຂົນສົ່ງ, ຄອບຄອງອາວຸດເສິກ ແລະມີຢາເສບຕິດໄວ້ໃນຄອບຄອງຄືປະເພດຢາໄອ, ຢາບ້າ ແລະຂອງກາງທີ່ເຈົ້າໜ້າທີ່ກວດພົບນັ້ນເປັນຂອງພວກກ່ຽວແທ້. ພ້ອມນີ້ ເຈົ້າໜ້າທີ່ຍັງຈະສືບຕໍ່ເປີດກວ້າງດຳເນີນການສືບສວນ-ສອບສວນ ເກັບກຳຂໍ້ມູນຫຼັກຖານຂະຫຍາຍຜົນໄປຫາກຸ່ມແກ້ງເຄືອຂ່າຍທີ່ຍັງເຫຼືອເພື່ອນຳຈັບຕົວມາດຳເນີນຄະດີຕາມລະບຽບກົດໝາຍຢ່າງເຂັ້ມງວດ.
ທີ່ມາ: