ຕາມການລາຍງານ ໜ່ວຍງານປູກຝັງ ຫ້ອງການກະສິກຳ ແລະ ປ່າໄມ້ເມືອງ ທ່າປາງທອງ ແຂວງສະຫວັນນະເຂດ ເມື່ອບໍ່ດົນມານີ້ໃຫ້ຮູ້ວ່າ: ເມືອງທ່າປາງທອງ ໄດ້ຫັນເອົາພະນັກງານວິຊາການ ລົງປະສານສົມທົບກັບອຳນາດ ການປົກຄອງບ້ານ ແລະ ປະຊາຊົນ ໃນເຂດທີ່ມີເງື່ອນໄຂທຳການຜະລິດ ເພື່ອເກັບກຳຂໍ້ມູນ ໃນການຜະລິດລະດູແລ້ງ ແລະ ປູກເຂົ້ານາແຊງ ໃນກາງສົກປີນີ້ ຊຶ່ງຕາມແຜນການ ເມືອງທ່າປາງທອງ ມີແຜນການ ຈະຜະລິດລະດູແລ້ງ ໃຫ້ໄດ້ໃນ ເນື້ອທີ່ 700 ເຮັກຕາ. ໃນນັ້ນ ເນື້ອທີ່ປູກເຂົ້ານາແຊງມີ 500 ເຮັກຕາ, ສາມາດປະຕິບັດໄດ້ຕົວຈິງ 380 ເຮັກຕາ, ທຽບໃສ່ປີຜ່ານມາ ແມ່ນເພີ່ມຂຶ້ນຫຼາຍສົມຄວນ.ມາຮອດປະຈຸບັນ ແມ່ນສາມາດປັກດຳໄດ້ແລ້ວ 100% ຄາດວ່າຈະສາມາດເກັບກ່ຽວ ໃນລະຫວ່າງຕົ້ນເດືອນເມສາ 2016, ສ່ວນແນວພັນທີ່ຊາວກະສິກອນນຳໃຊ້ ແນວ ພັນເຂົ້າໂພນງາມ ແລະ ແນວພັນເຂົ້າປັບປຸງ ເພື່ອຍົກລະດັບສະມັດຖະພາບຜົນຜະລິດ ໃຫ້ໄດ້ຕາມຄາດໝາຍຄື 4 ໂຕນ/ເຮັກຕາ ໃນທົ່ວເມືອງມີຊົນລະປະທານ 1 ແຫ່ງ, ເປັນຊົນລະປະທານແບບນ້ຳໄຫຼເຂົ້າເອງ ສາມາດຫົດເນື້ອທີ່ ທຳການຜະລິດລະດູແລ້ງໄດ້ເຖິງ 2.000 ເຮັກຕາ. ນອກຈາກປູກເຂົ້ານາແຊງແລ້ວ ຊາວກະສິກອນພາຍ ໃນເມືອງທ່າປາງທອງ ຍັງໄດ້ສຸມໃສ່ປູກພືດຜັກຕ່າງໆ ເພື່ອສົ່ງຂາຍໃຫ້ກັບຕະຫຼາດເຊັ່ນ: ໝາກແຕງ, ພືດຕະກຸນຖົ່ວ ແລະ ພືດຜັກອື່ນໆຕື່ມອີກ ໃນເນື້ອທີ່ 200 ເຮັກຕາ ເພື່ອເຮັດໃຫ້ການ ປູກພືດລະດູແລ້ງ ໃນສົກປີນີ້ໄດ້ ຮັບການຈັດຕັ້ງປະຕິບັດທ່ວງທັນກັບລະດູການ ແລະ ຮັບປະກັນສະມັດຖະພາບຜົນຜະລິດ.
ແຫລ່ງຂ່າວ:
