ອີກບໍ່ພໍເທົ່າໃດວັນຕໍ່ໜ້ານີ້ ຄືວັນທີ 20 ມີນາ ປະຊາຊົນລາວທຸກເຜົ່າທີ່ມີເງື່ອນໄຂຄົບຖ້ວນໃນທົ່ວປະເທດກໍຈະພ້ອມກັນເຂົ້າຄູຫາໄປໃຊ້ສິດປະຊາທິປະໄຕຂອງຕົນປ່ອນບັດເລືອກເອົາສະມາຊິກສະພາແຫ່ງຊາດ (ສສຊ) ຊຸດທີ VIII ແລະເລືອກເອົາສະມາຊິກສະພາປະຊາຊົນຂັ້ນແຂວງ-ນະຄອນຫຼວງວຽງຈັນ (ສສຂ) ເຂົ້ານັ່ງຢູ່ສະພາ ເພື່ອເຮັດໜ້າທີ່ເປັນຕົວແທນປົກປ້ອງສິດ ແລະ ຜົນປະໂຫຍດຂອງປະຊາຊົນຕາມທີ່ລະບຸໄວ້ໃນລັດຖະທຳມະນູນແຫ່ງ ສປປ ລາວ ແລະວັນດັ່ງກ່າວກາຍເປັນເຫດການທາງດ້ານການເມືອງທີ່ສຳຄັນຍິ່ງໃນປະຫວັດສາດ ປະຊາທິປະໄຕ ປະຊາຊົນ ແລະເປັນປາງບຸນໃຫຍ່ແຫ່ງມະຫາສາມັກຄີຂອງວົງຄະນະຍາດແຫ່ງຊາດລາວເຮົາ.
ການເລືອກຕັ້ງໃນຄັ້ງນີ້ ເນື້ອແທ້ກໍແມ່ນການປັບປຸງລະບົບອຳນາດແຫ່ງລັດໃຫ້ມີຄວາມເຂັ້ມແຂງ, ເປັນການສືບຕໍ່ເຮັດໃຫ້ການແບ່ງງານ, ແບ່ງຄວາມຮັບຜິດຊອບລະຫວ່າງອົງການອຳນາດລັດດ້ວຍກັນ ແລະລະຫວ່າງສູນກາງກັບທ້ອງຖິ່ນໃຫ້ລະອຽດຈະແຈ້ງ ເຮັດໃຫ້ການເຄື່ອນໄຫວຂອງອົງການອຳນາດລັດມີປະສິດທິພາບ, ມີຄວາມສັກສິດ ແລະຮັບປະກັນໃຫ້ອຳນາດແຫ່ງລັດຂອງພວກເຮົາເປັນອຳນາດລັດທີ່ມາຈາກປະຊາຊົນ ໂດຍປະຊາຊົນ ແລະເພື່ອຜົນປະໂຫຍດຂອງປະຊາຊົນຢ່າງແທ້ຈິງ, ທັງເປັນການຈັດຕັ້ງປະຕິບັດແນວທາງປ່ຽນແປງໃໝ່ຂອງພັກກໍຄືການຈັດຕັ້ງຜັນຂະຫຍາຍເນື້ອໃນຈິດໃຈມະຕິກອງປະຊຸມໃຫຍ່ ຄັ້ງທີ X ຂອງພັກ ແລະຍົກສູງຄຸນນະພາບການຈັດຕັ້ງປະຕິບັດໜ້າທີ່ການເມືອງໃນໄລຍະໃໝ່ຂອງອົງການຕົວແທນທີ່ມາຈາກການເລືອກຕັ້ງໂດຍກົງຂອງປະຊາຊົນ ເພື່ອເລືອກເຟັ້ນເອົາບຸກຄະລາກອນທີ່ມີມາດຕະຖານເຂົ້າເປັນ ສສຊ-ສສຂ ແລະຍັງເປັນການນຳໃຊ້ສິດ ປະຊາທິປະໄຕເຂົ້າໃນການເລືອກຕັ້ງເອົາຕົວແທນແຫ່ງສິດຜົນປະໂຫຍດຂອງຕົນຢ່າງກວ້າງຂວາງ ແລະເລິກເຊິ່ງ.
ທົ່ວປະເທດຜູ້ມີສິດປ່ອນບັດໃນແຕ່ລະເຂດເລືອກຕັ້ງມີຈຳນວນທັງໝົດ 3.988.000 ຄົນ, ຍິງ 2.006.000 ຄົນ, ໃນນີ້ ຫຼາຍກວ່າໝູ່ຢູ່ແຂວງສະຫວັນນະເຂດມີຈຳນວນ 596.000 ຄົນ, ຮອງລົງມາຢູ່ນະຄອນຫຼວງວຽງຈັນມີ 592.000 ຄົນ, ໜ້ອຍກວ່າໝູ່ຢູ່ແຂວງ ໄຊສົມບູນມີ 46.000 ຄົນ ແລະມີຜູ້ສະໝັກຮັບເລືອກຕັ້ງ ສສຊ ຊຸດທີ VIII ຈຳນວນທັງໝົດ 211 ທ່ານ, ເລືອກເອົາ 149 ທ່ານ ແລະ ສສຂ ທັງໝົດ 508 ທ່ານ, ເລືອກເອົາ 360 ທ່ານ, ຂະນະນີ້ຜູ້ທີ່ມີສິດປ່ອນບັດສາມາດເຫັນໜ້າຕາພ້ອມຊີວະປະຫວັດ, ຜົນງານການເຄື່ອນໄຫວຂອງບັນດາຜູ້ສະໝັກຮັບເລືອກຕັ້ງ ສສຊ ແລະ ສສຂ ຜ່ານສື່ມວນຊົນ, ຕິດໄວ້ຕາມສະຖານທີ່ຕ່າງໆ ລວມທັງການລົງພົບປະຫາສຽງຂອງຜູ້ສະໝັກຮັບເລືອກຕັ້ງນຳອີກ.
ເຖິງຢ່າງໃດກໍຕາມ ຜູ້ມີສິດປ່ອນບັດ ທັງຫຼາຍຈົ່ງພ້ອມກັນໄປໃຊ້ສິດຂອງຕົນຢ່າງເຕັມສ່ວນເຂົ້າໃນການເລືອກຕັ້ງ ໂດຍອ່ານໃຫ້ຖີ່ຖ້ວນຫຼີກເວັ້ນການເບິ່ງແບບຜີວເຜີນ ຊຶ່ງມັນບໍ່ອາດຂຶ້ນກັບຮູບຮ່າງໜ້າຕາ, ບໍ່ຂຶ້ນກັບຢູ່ເທິງ ຫຼື ລຸ່ມ ແຕ່ສິ່ງສຳຄັນແມ່ນເລືອກເອົາຜູ້ດີ, ຜູ້ບໍ່ມີບັນຫາຕໍ່ປະເທດຊາດ, ຕໍ່ປະຊາຊົນ ສະນັ້ນ ຕ້ອງປະຕິບັດເປັນພົນລະເມືອງລາວທີ່ມີອາຍຸແຕ່ 21 ປີຂຶ້ນໄປ; ມີນ້ຳໃຈຮັກຊາດ, ຮັກລະບອບປະຊາທິປະໄຕປະຊາຊົນ, ຈົງຮັກພັກດີ ແລະຕັ້ງຕໍ່ບໍລິສຸດຕໍ່ປະເທດຊາດ, ຖືເອົາຜົນປະໂຫຍດຂອງປະຊາຊົນເປັນກົກ, ຮັບໃຊ້ປະຊາຊົນຢ່າງແທ້ຈິງ, ມີຄວາມອົດທົນ, ປະຢັດ, ຊື່ສັດ, ທ່ຽງທຳ, ບໍ່ອວດອົ່ງທະນົງຕົວ, ບໍ່ສວຍໃຊ້ອຳນາດເດັດດ່ຽວຕ້ານການສໍ້ລາດບັງຫຼວງ, ຕ້ານພະຍາດອາຍາສິດ, ເປັນແບບຢ່າງທີ່ດີໃນການປະຕິບັດກົດໝາຍ ແລະບັນຫາສຳຄັນອື່ນໆອີກ.
ການເລືອກຕັ້ງໃນຄັ້ງນີ້ ຍັງມີຂໍ້ຫ້າມສຳລັບຜູ້ມີສິດເລືອກຕັ້ງມີພຶດຕິກຳດັ່ງນີ້: ບິດເບືອນແນວທາງນະໂຍບາຍ ແລະ ຄວາມເປັນຈິງກ່ຽວກັບການເລືອກຕັ້ງ; ໂຄສະນາໃສ່ຮ້າຍປ້າຍສີທັບຖົມຜູ້ສະໝັກເລືອກຕັ້ງ; ປັ່ນປ່ວນສ້າງສະຖານະ ການກໍ່ຄວາມບໍ່ສະຫງົບໃນໜ່ວຍເລືອກຕັ້ງ; ແຊກແຊງການຂີດບັດລົງຄະແນນ ສຽງຂອງຜູ້ອື່ນ ຫຼື ທຳລາຍບັດເລືອກຕັ້ງ; ຂີດບັດລົງຄະແນນບໍ່ຖືກຕ້ອງຕາມລະບຽບຫຼັກການ; ຮັບ ຫຼື ໃຫ້ສິນບົນ; ມີພຶດຕິກຳອື່ນທີ່ເປັນການລະເມີດກົດໝາຍ ແລະລະບຽບທີ່ກ່ຽວຂ້ອງ ພ້ອມດຽວກັນ ກໍມີຂໍ້ຫ້າມສຳລັບຜູ້ຮັບສະໝັກຮັບເລືອກ ຕັ້ງມີພຶດຕິກຳດັ່ງນີ້: ໂຄສະນາໃສ່ຮ້າຍ ປ້າຍສີທັບຖົມຜູ້ສະໝັກເລືອກຕັ້ງດ້ວຍ ກັນ; ໃຫ້ສິນບົນຊື້ຈ້າງຈອບອອຍຜູ້ມີສິດເລືອກຕັ້ງດ້ວຍຮູບການຕ່າງໆ; ໂຄສະນາຫາສຽງໃນມື້ເລືອກຕັ້ງ; ເຂົ້າຫຍຸ້ງກ່ຽວການນັບບັດຄະແນນຂອງຄະນະຮັບຜິດຊອບໜ່ວຍປ່ອນບັດເລືອກຕັ້ງ; ມີພຶດຕິກຳທີ່ເປັນການລະເມີດກົດໝາຍ ແລະລະບຽບການທີ່ກ່ຽວຂ້ອງ, ນອກນີ້ ຍັງມີຂໍ້ຫ້າມສຳລັບຄະນະກຳມະການເລືອກຕັ້ງ ແລະຂໍ້ຫ້າມສຳລັບບຸກຄົນການຈັດຕັ້ງອື່ນຢ່າງເຂັ້ມງວດ.
ການເລືອກຕັ້ງ ສສຊ ຊຸດທີ VIII ແລະສສຂ ສຸດທີ່ມີຄວາມໝາຍສຳຄັນ, ເມື່ອເປັນດັ່ງນັ້ນມັນຈິ່ງເລັ່ງທວງໃຫ້ທົ່ວທັງຊາດ ຈົ່ງເພີ່ມທະວີສະຕິລະວັງຕົວໃຫ້ສູງກວ່າເກົ່າ, ຫັນເອົາວຽກງານການເລືອກຕັ້ງ ສສຊ ແລະ ສສຂ ໃນຄັ້ງນີ້ ເປັນພັນທະໜ້າທີ່ການເມືອງອັນສູງສົ່ງຂອງຕົນ, ທຸກສິ່ງທຸກຢ່າງຮັບປະກັນໃຫ້ການເລືອກຕັ້ງບັນລຸ 3 ຄາດໝາຍມີ 300% ຄື: ຕ້ອງຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ, ຄວາມປອດໄພໃນສັງຄົມ, ບັນຫາ 2: ຕ້ອງຮັບປະກັນໃຫ້ຜູ້ມີສິດເລືອກຕັ້ງໄດ້ໃຊ້ສິດປ່ອນບັດຂອງຕົນດ້ວຍຄວາມສະໝັກໃຈ, ບັນຫາສຸດທ້າຍ ຕ້ອງຮັບປະກັນການລົງຄະແນນສຽງໃຫ້ຖືກຕ້ອງຕາມກົດໝາຍ, ສຳລັບການປ່ອນບັດເລືອກຕັ້ງແມ່ນເລີ່ມແຕ່ເວລາ 7:00 ໂມງເຊົ້າຫາ 17:00 ໂມງແລງຂອງວັນ ອາທິດວັນທີ 20 ມີນາ 2016 ຕ້ອງໃຫ້ສຳເລັດໃນຂອບເຂດທົ່ວປະເທດ, ໃນກໍລະນີຈຳເປັນຄະນະຮັບຜິດຊອບໜ່ວຍປ່ອນບັດເລືອກຕັ້ງອາດຈະຕົກລົງໄຂພິທີ ຫຼື ອັດພິທີໄວ ຫຼື ຊ້າກວ່າເວລາທີ່ກຳ ນົດໄວ້ກໍໄດ້ ໂດຍອີງໃສ່ສະພາບການຕົວຈິງຂອງແຕ່ລະບ່ອນ ແຕ່ບໍ່ໃຫ້ໄຂພິທີກ່ອນ 5:00 ໂມງເຊົ້າ ຫຼື ອັດພິທີຢ່າງຊ້າກ່ອນ 19:00 ໂມງແລງ.
ທີ່ມາ: