ສຳນັກງານ​ເອ​ເອຟພີ ລາຍ​ງານ​ວ່າ ​ເມື່ອ​ວັນ​ທີ 2 ມີ​ນາ ​​ເຮືອບິນ​ໂດຍ​ສານ​​ແອ​ບັສ A380 ຂອງ​ສາຍ​ການບິນ​ເອມີ​ເຣສ ລົງຈອດ​ທີ່​ສະໜາມ​ບິນ​ໃນ​ເມືອງ​ໂອ໊ກ​ແລນ ​ເກາະ​ຕອນ​ເໜືອ​ຂອງ​ນິວ​ຊີ​ແລນ ດ້ວຍ​ການ​ທຳລາຍ​ສະຖິຕິ​ໃໝ່​ດ້ວຍ​ການ​​ເປັນ​ຖ້ຽວ​ບິນ​ໂດຍສານ​ພານິດ ຕາມ​ຕາຕະລາງ​ບິນ​ທີ່​ທຳ​ການບິນລວດ​ດຽວ ທີ່​ມີ​ໄລຍະ​ທາງ​ໄກ​ທີ່​ສຸດ​ໃນ​ໂລກ.

ຖ້ຽວ​ບິນ​ດັ່ງກ່າວ ​ໄດ້​ທຳ​ການບິນ​ຈາກ​ນະຄອນຫຼວງ​ດູ​​ໄບຂອງ​ສະຫະລັດ​ອາຣັບ​ເອມິ​ເຣດ ​ໄປ​ຍັງ​ເມືອງ​ໂອ໊ກ​ແລນຂອງ​ນິວຊີ​ແລນ ​ໄລຍະ​ທາງ​ທັງ​ໝົດ 14.200 ກິ​ໂລ​ແມັດ ​ແລະ​ຜູ້​ໂດຍສານ​ຕ້ອງ​ໃຊ້​ເວລາ​ຢູ່​ເຮືອບິນ​ເຖິງ 17 ຊົ່ວ​ໂມງ 15 ນາທີ.

​ໂດຍ​ໄດ້​ທຳລາຍ​ສະຖິຕິ​ບິນ​ໄກ​ລວດ​ດຽວ​ຂອງ​ສາຍ​ການບິນ​ແຄວນ​ຕັສ ທີ່​ເຄີຍ​ບິນ​ຈາກ​ນະຄອນຫຼວງ​ຊິດ​ນິ ອົດ​ສະຕຣາລີ ​ໄປ​ຍັງ​ເມືອງ​ດັລລັສ ສະຫະລັດ​ອາ​ເມ​ລິ​ກາ ​ໃນ​ປີ 2014 ຊຶ່ງ​ມີ​ໄລຍະ​ທາງ 13.800 ກິ​ໂລ​ແມັດ.

​ແນ​ວ​ໃດ​ກໍ​ຕາມ ທາງ​ສາຍ​ການບິນ​ເອມີ​ເຣດ​ໄດ້​ກຽມທຳລາຍສະຖິຕິ​ຄັ້ງ​ໃໝ່​ອີກ ​ໂດຍ​ໄດ້​ກຽມ​ເປີດ​ເສັ້ນທາງບິນ​ລວດ​ດຽວສາຍ​ໃໝ່ ຈາກ​ດູ​ໄບ​ໄປ​ຍັງ​ນະຄອນຫຼວງ​ປາ​ນາມາ​ ​ປ​ະ​ເທດ​ປາ​ນາມາ ທີ່​ຄາດ​ວ່າ​ຈະ​ໃຊ້​ເວລາ​ບິນ​ເຖິງ 17 ຊົ່ວ​ໂມງ 35 ນາທີ ​ໂດຍ​ກຳນົດ​ວ່າ​ຈະ​ເລີ່​ມ​ໃນ​ໄລຍະ​ທ້າຍ​ເດືອນ​ມີນາ​ນີ້ ​ແຕ່​ຫຼ້າ​ສຸດ ​ເມື່ອ​ວັນ​ທີ 3 ມີນາ ທາງ​ສາຍ​ການບິນ​ເອມິ​ເຣດ​ໄດ້​ເລື່ອນ​ແຜນການບິນ​ໄປ​ເປັນ​ຊ່ວງ​ທ້າຍ​ປີ​ນີ້ ຫຼື​ຕົ້ນ​ປີໜ້າ​ແທນ.