ໃນວັນທີ 29 ກຸມພາຜ່ານມາ ອົງການມໍລະດົກໂລກ ແລະຊ່ຽວຊານອົດສະຕາລີ ໄດ້ຄົ້ນພົບກະດູກຄົນບູຮານຢູ່ທົ່ງໄຫຫີນ 1 ບ້ານອຸ ເມືອງແປກແຂວງຊຽງຂວາງ, ຫຼ້າສຸດໄດ້ນຳໄປໄວ້ຢູ່ຫໍມູນເຊື້ອແຂວງ ເພື່ອວິເຄາະວິໄຈຫາຄວາມ ຈິງແລ້ວສະເໜີຂັ້ນເທີງຮັບຊາບ.
ທ່ານ ສີວິໄລ ອຸດົມສຸກ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວ (ຖວທ) ແຂວງຊຽງ ຂວາງໄດ້ໃຫ້ສຳພາດທາງໄກຕໍ່ນັກຂ່າວ ໜັງສືພິມພວກເຮົາໃນຕອນເຊົ້າວັນທີ 2 ມີນາຜ່ານມານີ້ວ່າ: ໃນວັນທີ 29 ກຸມພາ 2016 ອົງການມໍລະດົກໂລກ ແລະຊ່ຽວຊານຈາກອົດສະຕາລີ ໄດ້ລົງສຳຫຼວດທົ່ງໄຫຫີນ 1 ທີ່ບ້ານອຸ ເມືອງແປກ ເພື່ອຕ້ອງການຢືນຢັນເອົາທົ່ງໄຫຫີນເຂົ້າເປັນມໍລະດົກໂລກແຫ່ງທີສາມຂອງ ສປປ ລາວ, ແຕ່ໃນຂະນະທີ່ສຳຫຼວດນັ້ນໄດ້ຂຸດຄົ້ນປະມານ 3-4 ເທື່ອ, ລວງເລິກເທື່ອລະປະມານ 70 ຊັງຕີແມັດ, ໂດຍເທື່ອທີ 4 ກໍພົບເຫັນກະດູກຄົນເປັນລັກສະນະຫົວກະໂຫຼກ ອ້ອມຮອບດ້ວຍໄຫຫີນນ້ອຍ, ຄາດຄະເນເບື້ອງຕົ້ນວ່າອາດເປັນກະດູກຄົນບູຮານແຕ່ບໍ່ແນ່ໃຈວ່າຈະເປັນຄົນສະໄໝໃດ.
ທ່ານຮອງຫົວໜ້າພະແນກ ຖວທ ຍັງໃຫ້ຮູ້ວ່າ: ມາຮອດປະຈຸບັນບັນດາກະດູກທີ່ຄົ້ນພົບແມ່ນໄດ້ນຳໄປເກັບໄວ້ທີ່ຫໍ ມູນເຊື້ອແຂວງ, ໂດຍຂັ້ນຕອນຕໍ່ໄປແມ່ນຈະນຳໄປວິເຄາະວິໄຈ ແລ້ວສະເໜີໃຫ້ຂັ້ນເທິງຮັບຊາບ, ສ່ວນຂຸມທີ່ຂຸດພໍ້ກະດູກນັ້ນແມ່ນຈະໄດ້ມີການຖົມໃຫ້ຢູ່ຄືສະພາບເກົ່າໃນວັນທີ 2 ມີນາ 2016, ຂະນະທີ່ ໄລຍະຜ່ານມາຢູ່ທົ່ງໄຫຫີນ ກໍເຄີຍຄົ້ນພົບກະດູກຄົນບູນຮານມາແລ້ວ ແຕ່ຜູ້ຄົ້ນພົບແມ່ນຊ່ຽວຊານຈາກປະເທດຝຣັ່ງໃນສະໄໝ ປີ 1930.
ຢ່າງໃດກໍຕາມ ການລົງສຳຫຼວດທົ່ງໄຫຫີນຂອງອົງການມໍລະດົກໂລກ ແລະ ຊ່ຽວຊານອົດສະຕາລີໃນເທື່ອນີ້ ນອກຈາກຈະພົບເຫັນກະດູກຄົນ ເປັນລັກສະນະຫົວກະໂຫຼກແລ້ວ, ຍັງໄດ້ຄົ້ນພົບຫຼາຍສິ່ງຫຼາຍຢ່າງທີ່ຈະນຳໄປວິເຄາະວິໄຈຫາມູນເຫດທີ່ແທ້ຈິງ.
ທີ່ມາ: