spot_img
Homeຂ່າວພາຍ​ໃນມຊ ບຸກໄປສະເໝີ ໜອງຄາຍ 2-2 ນັດອຸ່ນເຄື່ອງກຽມ ລາວພຣີເມຍລີກ 2016

ມຊ ບຸກໄປສະເໝີ ໜອງຄາຍ 2-2 ນັດອຸ່ນເຄື່ອງກຽມ ລາວພຣີເມຍລີກ 2016

Published on

ມຊ ບຸກໄປສະເໝີ ໜອງຄາຍ 2-2 ນັດອຸ່ນເຄື່ອງກຽມ ລາວພຣີເມຍລີກ 2016
ມະຫາວິທະຍາໄລແຫ່ງຊາດ ຫຼື ມຊ ເອັຟຊີ ທີມນ້ອງໃໝ່ໃນລາວພຣີເມຍລີກ ພາດໂອກາດເກັບໄຊຊະນະກັບບ້ານ ຫຼັງຂຶ້ນນຳກ່ອນເຖິງ 2 ຄັ້ງ ແຕ່ກໍ່ຖືກ ໜອງຄາຍ ເອັຟທີ ໄລ່ຕີສະເໝີທັງສອງຄັ້ງ ກ່ອນຈົບດ້ວຍຜົນ 2-2 ປະຕູ ໃນການແຂ່ງຂັນເຕະບານນັດອຸ່ນເຄື່ອງມິດຕະພາບ ເພື່ອເປັນການກຽມຄວາມພ້ອມຂອງນັກກີລາ ກ່ອນເປີດການແຂ່ງຂັນເຕະບານ ລາວພຣີເມຍລີກ ລະດູການ 2016 ໃນທ້າຍເດືອນມີນານີ້.
ເມື່ອທ້າຍອາທິດທີ່ຜ່ານມາ ທັບນັກເຕະສະໂມສອນ ມຊ ເອັຟຊີ ທີມນ້ອງໃໝ່ ລາວພຣີເມຍລີກ ໄດ້ຍົກທັບໄປເຕະບານນັດອຸ່ນເຄື່ອງມິດຕະພາບກັບ ໜອງຄາຍ ເອັຟທີ ສະໂມສອນຈາກລີກພູມີພາກ ດິວິຊັ່ນ 2 ຂອງປະເທດໄທ ໂດຍນຳພາຄະນະໃນຄັ້ງນີ້ຂອງ ທ່ານ ຮສ.ດຣ ອາທິດອຸໄທ ຈະຕຸພອນໄຊ ຮອງປະທານສະໂມສອນ ມຊ ເອັຟຊີ ພ້ອມດ້ວຍຄູເຝິກ ແລະ ນັກກີລາ ລວມເຖິງແຟນບານຊາວລາວ ແລະ ຊາວແຂວງໜອງຄາຍເຂົ້າຮ່ວມຊົມຮ່ວມເຊຍ.

ເກມນີ້, ທ່ານ ວາລາກອນ ພົມພັກດີ ຄູເຝິກໃຫຍ່ ມຊ ເອັຟຊີ ຈັດທີມຊຸດໃຫຍ່ລົງສະໜາມ ເພື່ອທົດສອບຄວາມພ້ອມຂອງ 11 ຕົວຈິງ ກ່ອນເປີດການແຂ່ງຂັນເຕະບານ ລາວພຣີເມຍລີກ 2016 ນຳທີມໂດຍ ແສງພະຈັນ ບຸນທິສານ ຜູ້ຮັກສາປະຕູດີກຣີທີມຊາດລາວ, ຕ໊ອກຕີ ຂຸນທຸມພອນ ອະດີດນັກເຕະຂອງ SHB ວຽງຈັນ ຢືນບັນຊາເກມໃນແດນກາງ, ອາມີໄຊ ເກດຕະວົງ ອະດີດນັກເຕະທີມຊາດລາວຮຸ່ນອາຍຸບໍ່ເກີນ 16 ປີ ຢືນເປັນປີກຂວາງ ແລະ ສີສະຫວາດ ດາລາວົງ ທີ່ຍ້າຍຈາກ ເອສຣາ ຢືນປີກຊ້າຍ ຂະນະທີ່ ສະໂມສອນ ໜອງຄາຍ ເອັຟທີ ເຈົ້າພາບ ກໍ່ຈັດຊຸດໃຫຍ່ລົງສະໜາມເຊັ່ນກັນ ເພື່ອຄົ້ນຫາ 11 ຕົວຈິງ ກ່ອນເປີດລີກພູມິພາກ ດິວິຊັ່ນ 2 ເຊັ່ນກັນ.

ເລີ່ມເກມເຄິ່ງເວລາທຳອິດ ທັງ 2 ທີມ ແມ່ນເນັ້ນສູ້ກັນແຖວກາງສະໜາມເປັນສ່ວນໃຫຍ່ ປ່ຽນກັບບຸກປ່ຽນກັບຮັບ ແຕ່ມາເຖິງນາທີໆ 20 ມຊ ເອັຟຊີ ທີມຢາມ ໄດ້ປະຕູຂຶ້ນນຳກ່ອນຢ່າງໄວວາ 1-0 ຈາກຈັງຫວະຊຸນລະມຸນໃນໜ້າເຂດໂທດ ກ່ອນທີ່ ຕ໊ອກຕີ ຂຸນທຸມພອນ ກອງກາງປະສົບການສູງ ຈະແປເນັ້ນໆເຂົ້າປະຕູໄປຢ່າງສວຍງາມ ຫຼັງຈາກເສຍປະຕູ ໜອງຄາຍ ເຈົ້າພາບ ກໍ່ເປີດເກມບຸກເຂົ້າໃສ່ທັນທີ ແລະ ມີໂອກາດໄດ້ລຸ້ນປະຕູເປັນຫຼາຍຄັ້ງ ແຕ່ຈັງຫວະສຸດທ້າຍຍັງບໍ່ສາມາດຈົບສະກໍໄດ້ ເຮັດໃຫ້ໝົດເຄິ່ງເວລາທຳອິດ ສະໂມສອນ ມຊ ຂຶ້ນນຳ ໜອງຄາຍ ຢູ່ 1-0.

ເລີ່ມເຄິ່ງເວລາທີ 2 ໄດ້ພຽງ 5 ນາທີເທົ່ານັ້ນ ໜອງຄາຍ ກໍ່ມາໄດ້ປະຕູຕີສະເໝີ 1-1 ຈາກລູກຟຣີຄິກຂອງໝາຍເລກ 10 ຫຼັງຈາກນັ້ນ ທີມເຈົ້າພາບກໍ່ສືບຕໍ່ບຸກເຂົ້າໃສ່ຢ່າງຕໍ່ເນື່ອງຢ່າງຈົນເພີນ ເມື່ອເປັນຄືແນວນັ້ນກໍ່ຕ້ອງຖືກລົງໂທດທັນທີຈາກຈັງຫວະໂຕ້ກັບໄວຂອງ ສີສະຫວາດ ດາລາວົງ ປີກຈອມທັກສະໄດ້ບານແຖວກາງສະໜາມ ກ່ອນລາກຂຶ້ນມາທາງປີກຂວາໜີກອງຫຼັງໜອງຄາຍ 2 ຄົນ ກ່ອນຍິງບານສວນຕົວຜູ້ຮັກສາປະຕູເຂົ້າໄປຢ່າງສວຍງາມ ໃນນາທີ 66 ເຮັດໃຫ້ ມຊ ເອັຟຊີ ຂຶ້ນນຳ 2-1 ປະຕູ. ຢ່າງໃດກໍ່ຕາມ, ຈາກນັ້ນອີກ 9 ນາທີຕໍ່ມາ ເຈົ້າຖິ່ນກໍ່ມາໄດ້ປະຕູຕີສະເໝີເປັນ 2-2 ຈາກລູກຈຸດໂທດຂອງໝາຍເລກ 10 ແລະ ກໍ່ເປັນປະຕູທີ 2 ຂອງລາວໃນເກມນີ້ ສ່ວນເວລາທີ່ເຫຼືອທັງ 2 ທີມ ບໍ່ສາມາດຍິງປະຕູກັນໄດ້ເພີ່ມ ຈົບ 90 ນາທີທັງ 2 ທີມກິນກັນບໍ່ລົງ ສະເໝີ 2-2.
ສໍາລັບຜົນງານການອຸ່ນເຄື່ອງຂອງ ມຊ ເອັຟຊີ ກ່ອນລຸຍການແຂ່ງຂັນລະດັບສູງສຸດຂອງລາວ ລົງສະໜາມ 4 ນັດຊະນະ 2, ສະເໝີ 1 ແລະ ເສຍ 1 ນັດ ໂດຍນັດທໍາອິດຖະຫຼົ່ມ ຊ້າງນ້ອຍ ເອຟຊີ 4-0, ນັດທີ 2 ເສຍໃຫ້ ລາວໂຕໂຢຕ້າ ເອັຟຊີ 0-4, ນັດທີ 3 ຊະນະ ກອງທັບ ຫຼື Army FC 1-0 ແລະ ສະເໝີ ໄຊທານີ 0-0 ຊິຕີ້ ເຊິ່ງຖືວ່າເປັນຜົນງານດີສໍາລັບທີມນ້ອງໃໝ່ ແລະ ການກະກຽມຄວາມພ້ອມຢ່າງຕໍ່ເນື່ອງ ກ່ອນລຸຍ ລາວພຣີເມຍລີກ 2016 ທີ່ຈະເປີດສາກຂຶ້ນໃນກາງເດືອນມີນານີ້.

ຂໍ້ມູນຈາກ ຂ່ານສານກີລາລາວຕ່າງປະເທດ ຄວາມເຄື່ອນໄຫວເຈາະເລິກ

ບົດຄວາມຫຼ້າສຸດ

ຍ້ອນຫຼັບໃນ! ກະບະລີໂວ້ຕຳລົດສອງແຖວ ບາດເຈັບ 18 ຄົນ ໃນນັ້ນ 3 ຄົນສາຫັດ

ກະບະລີໂວ້ຫຼັບໃນຕຳລົດສອງແຖວ ບາດເຈັບ 18 ຄົນ ໃນນັ້ນ 3 ຄົນສາຫັດ ຢູ່ບ້ານດ້ານຊ້າງ ເມືອງໄຊທານີ ນະຄອນຫຼວງວຽງຈັນ ເຈົ້າໜ້າທີ່ ປກສ ເມືອງໄຊທານີ ນະຄອນຫຼວງວຽງຈັນ ໃຫ້ຮູ້ວ່າ:...

ທັງໜ້າຕາດີ ທັງຈິດໃຈດີ Felix Stray kids ໃນ 2 ປີທີ່ (2024-2025) Felix ໄດ້ບໍລິຈາກໃຫ້ປະເທດລາວ ລວມມູນຄ່າທັງໝົດປະມານ 3 ຕື້ກີບ

ທັງໜ້າຕາດີ ທັງຈິດໃຈດີ Felix Stray kids ຂອບໃຈທີ່ໃຫ້ການສະໜັບສະໜູນມາຕະຫຼອດ 2 ປີ (2024-2025) ທີ່ໄດ້ເຂົ້າມາຊ່ວຍເຫຼືອເດັກນ້ອຍໃນປະເທດລາວໃຫ້ມີຊີວິດການເປັນຢູ່ ແລະ ສະພາບເວດລ້ອມທີ່ດີຂຶ້ນ, ໃນ 2...

ຕ້ອງກະກຽມຂໍ້ມູນຫຍັງແນ່ ເພື່ອຂຽນປະກອບເອກະສານເຮັດບັດປະຈໍາຕົວດິຈິຕອນ ກຽມພ້ອມໄວ້ ເພື່ອຄວາມສະດວກ ແລະ ວ່ອງໄວ

ໃນປັດຈຸບັນໃນນະຄອນຫຼວງວຽງຈັນສາມາດເຮັດບັດປະຈໍາຕົວໄດ້ແລ້ວ ຢູ່ທີ່ກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ບ້ານແສງສະຫວ່າງ ເມືອງໄຊເສດຖາ ນະຄອນຫຼວງວຽງຈັນ ເຊິ່ງກ່ອນທີ່ຈະເຮັດບັດປະຈຳຕົວດິຈິຕອນແມ່ນ ຕ້ອງໄດ້ຊື້ແບບຟອມປະກອບຂໍ້ມູນ ລາຄາ 30,000 ກີບ ແລະ ຈະເປີດບໍລິການເຮັດບັດປະຈຳຕົວໃນທົ່ວປະເທດໃນຕົ້ນເດືອນຕຸລາ...

ອົບພະຍົບຫຼາຍກວ່າ 1,000 ຄົນ ເຫດໄຟໄໝ້ເຂດຊຸມຊົນແອອັດ ໃນນະຄອນຫຼວງມະນິລາ ປະເທດຟິລິປິນ

ເກີດເຫດໄຟໄໝ້ຮຸນແຮງຢູ່ເຂດຊຸມຊົນແອອັດ ໃນເມືອງຫຼວງຂອງຟິລິບປິນ ປະຊາຊົນຫຼາຍກວ່າ 500 ຄອບຄົວບໍ່ມີທີ່ຢູ່ອາໄສ. ສຳນັກຂ່າວຕ່າງປະເທດລາຍງານວ່າ: ໃນວັນທີ 15 ກັນຍາ 2025 ຜ່ານມາ, ເກີດເຫດໄຟໄໝ້ຮຸນແຮງໃນຊ່ວງກາງຄືນໃນດເຂດຊຸມຊົນ ແຮບປີ້ແລນ ເຮັດໃຫ້ອາຄານບ້ານເຮຶືອນໄດ້ຮັບຄວາມເສຍຫາຍຫຼາຍຮ້ອຍຫຼັງ ເຮັດໃຫ້ປະຊາຊົນກວ່າ...