ເຮືອນປະຊາຊົນຫລາຍຫລັງ ແລະ ຜົນຜະລິດກະສິກໍາຫລາຍເຮັກຕາ ຂອງປະຊາຊົນບ້ານປຸ່ງ ແລະ ບ້ານຈ້ວມ, ເມືອງຫ້ວຍຊາຍ, ແຂວງບໍ່ແກ້ວ, ໄດ້ຮັບຜົນເສຍຫາຍຢ່າງໜັກໜ່ວງ, ພາຍຫລັງຖືກລົມພະຍຸຝົນ ພັດຢ່າງຮຸນແຮງຕິດຕໍ່ກັນຫລາຍມື້ ໃນທ້າຍອາທິດຜ່ານມາ, ຂະນະທີ່ອໍານາດການປົກຄອງທ້ອງຖິ່ນ ພວມເລັ່ງກວດກາສະພາບຄວາມເສຍຫາຍທັງໝົດ ເພື່ອປະສານສົມທົບກັບພາກລັດກ່ຽວຂ້ອງ ໃນການຊ່ວຍເຫລືອຟື້ນຟູ ແກ້ໄຂຜົນກະທົບຈາກໄພທໍາມະຊາດຄັ້ງນີ້.
ຫ້ອງການກະສິກໍາ-ປ່າໄມ້ ເມືອງຫ້ວຍຊາຍ ໄດ້ລາຍງານໃຫ້ຮູ້ວ່າ: ໃນລະຫວ່າງວັນທີ 24 – 28 ກຸມພາຜ່ານມາ, ໄດ້ເກີດມີລົມ ແລະ ຝົນຕົກຕິດຕໍ່ຢ່າງແຮງ ໃນເຂດສອງບ້ານດັ່ງກ່າວ, ຊຶ່ງຫ່າງຈາກເທດສະບານເມືອງປະມານ 30 ກິໂລແມັດ, ອັນໄດ້ເຮັດໃຫ້ເຮືອນຊານປະຊາຊົນ ເປ່ເພຫລາຍກວ່າ 80 ຫລັງ ແລະ ມີຜູ້ເສຍຊີວິດໜຶ່ງຄົນ, ນອກຈາກນີ້ຍັງສວນປູກກ້ວຍຂອງປະຊາຊົນ ຫລາຍກວ່າຮ້ອຍເຮັກຕາ ກໍໄດ້ຮັບຜົນເສຍຫາຍໜັກໜ່ວງເຊັ່ນດຽວກັນ.
ຫລັງຈາກສະພາບອາກາດທີ່ບໍ່ດີດັ່ງກ່າວສະຫງົບລົງ, ອໍານາດການປົກຄອງທ້ອງຖິ່ນ ຈຶ່ງໄດ້ຮີບຮ້ອນຈັດສົ່ງພະນັກງານວິຊາການ ລົງກວດກາຄວາມເສຍຫາຍທັງໝົດ ເພື່ອລາຍງານໃຫ້ແຂວງ ແລະ ໜ່ວຍງານກ່ຽວຂ້ອງຮັບ ຊາບ ເພື່ອຫາວິທີຟື້ນຟູ ແລະ ຊ່ວຍເຫລືອຜູ້ໄດ້ຮັບຜົນກະທົບເບື້ອງຕົ້ນ. ປັດຈຸບັນສິ່ງທີ່ຜູ້ໄດ້ຮັບຜົນກະທົບມີຄວາມຕ້ອງການຮີບດ່ວນ ແມ່ນກະສັງສີ, ໄມ້ ແລະ ອຸປະກອນ ອື່ນໆ ເພື່ອສ້ອມແປງເຮືອນທີ່ເປ່ເພໃຫ້ກັບມາມີສະພາບປົກກະຕິໂດຍໄວ.
ແຫລ່ງຂ່າວ:
