ເລີ່ມແຕ່ວັນທີ 26 ກຸມພາ 2016 ຜ່ານມາທາງຄະນະຜູ້ແທນສະໝັກເລືອກຕັ້ງສະມາຊິກສະພາແຫ່ງຊາດຊຸດທີVIII ເຂດທີ 6 ແຂວງຫຼວງພະບາງຈຳນວນ 15 ທ່ານນຳໂດຍທ່ານນາງປານີຢາທໍ່ຕູ້, ປະທານສະພາແຫ່ງຊາດຊຸດທີ 7 ໄດ້ລົງເຄື່ອນໄຫວຫາສຽງຈຸດທຳອິດຢູ່ສະໂມສອນຂອງໂຮງຮຽນວິທະຍາໄລກະສິກຳແລະປ່າໄມ້ພາກເໜືອເຂົ້າຮ່ວມຮັບຟັງການແນະນຳຕົວຂອງບັນດາຜູ້ແທນມີບັນດາອຳນາດການປົກຄອງບ້ານແລະປະຊາຊົນຜູ້ມີສິດປ່ອນບັດເລືອກຕັ້ງທີ່ມາຈາກບ້ານປາກເຊືອງ, ບ້ານວຽງສະຫວັນ, ບ້ານໂພນງາມພ້ອມດ້ວຍນັກຮຽນນັກສຶກສາພາຍໃນວິທະຍາໄລກະສິກຳແລະປ່າໄມ້ພາກເໜືອ.
ໃນພິທີທ່ານອານຸສິດສີລິວົງເລຂາໜ່ວຍພັກນາຍບ້ານໆປາກເຊືອງໄດ້ກ່າວຕ້ອນຮັບບັນດາຜູ້ສະໝັກເລືອກຕັ້ງພ້ອມທັງລາຍງານສະພາບການຈັດຕັ້ງປະຕິບັດເຮັດທົດລອງວຽກງານສາມສ້າງບ້ານປາກເຊືອງແລະລາຍງານການລົງເກັບກຳຂໍ້ມູນຜູ້ມີສິດປ່ອນບັດເລືອກຕັ້ງຊຶ່ງກຸ່ມພັດທະນາບ້ານປາກເຊືອງປະກອບມີ 6 ບ້ານແລະ 1 ສະຖາບັນການສຶກສາ, ໃນນັ້ນຜູ້ມີສິດປ່ອນບັດເລືອກຕັ້ງທັງໝົດ 1.967 ຄົນ, ຍິງ 971 ຄົນ, ພ້ອມນີ້ທາງຄະນະຮັບຜິດຊອບໜ່ວຍປ່ອນບັດເລືອກຕັ້ງກຸ່ມພັດທະນາປາກເຊືອງຍັງໄດ້ກະກຽມເອກະສານຕ່າງໆທີ່ກ່ຽວຂ້ອງກັບການເລືອກຕັ້ງເພື່ອລົງໂຄສະນາເຜີຍແຜ່ໃຫ້ປະຊາຊົນພາຍໃນກຸ່ມປາກເຊືອງໄດ້ຮັບຮູ້ແລະເຂົ້າໃຈທັງນີ້ກໍເພື່ອຮັບປະກັນໃຫ້ຜູ້ໃຊ້ສິດປ່ອນບັດເລືອກຕັ້ງໄດ້ລົງຄະແນນສຽງຂອງຕົນເອງຢ່າງຖືກຕ້ອງຕາມກົດໝາຍ, ຈາກນັ້ນບັນດາຜູ້ສະໝັກສະມາຊິກສະພາກໍໄດ້ຜັດປ່ຽນກັນຂຶ້ນໂຄສະນາຫາສຽງ, ສະເໜີປະຫວັດການເຄື່ອນໄຫວວຽກງານໂດຍຫຍໍ້ຂອງແຕ່ລະທ່ານເພື່ອເຮັດໃຫ້ຜູ້ມີສິດປ່ອນບັດເລືອກຕັ້ງກຳແໜ້ນປະຫວັດການເຄື່ອນໄຫວວຽກງານໄດ້ຮັບຮູ້ແລະເຂົ້າໃຈ.
ໃນວັນດຽວກັນບັນດາຜູ້ແທນກໍໄດ້ເດີນທາງໄປຫາສຽງຢູ່ກຸ່ມບ້ານກອກຫວານໂດຍທ່ານນາຍບ້ານໆກອກຫວານໄດ້ລາຍງານການເກັບກຳຂໍ້ມູນເພື່ອກະກຽມໃຫ້ແກ່ການເລືອກຕັ້ງສະມາຊິກສະພາຊຸດທີ 8 ຮູ້ວ່າກຸ່ມກອກຫວານປະກອບມີ 9 ບ້ານ, ຜູ້ມີສິດປ່ອນບັດແຕ່ 18 ປີຂຶ້ນໄປມີທັງໝົດ 1.834 ຄົນ, ຍິງ 949 ຄົນແລະໃນວັນທີ 27 ກຸມພາຄະນະຜູ້ແທນໄດ້ລົງຫາສຽງຢູ່ສະໂມສອນກອງບັນຊາການທະຫານແຂວງໂດຍໃຫ້ກຽດກ່າວຕ້ອນຮັບຂອງທ່ານພັນເອກບຸນຊູດວງຄຳມີຮອງເລຂາຄະນະພັກຫົວໜ້າການເມືອງກອງບັນຊາການທະຫານແຂວງຫຼວງພະບາງພ້ອມລາຍງານການກະກຽມ, ການເກັບກຳຂໍ້ມູນອ້າຍນ້ອງຜູ້ມີສິດປ່ອນບັດຮູ້ວ່າທົ່ວກອງບັນຊາການທະຫານໄດ້ກຳນົດເອົາ 1 ຈຸດ, ມີຜູ້ໃຊ້ສິດທັງໝົດ 4 ພັນກວ່າຄົນແລະໃນຕອນບ່າຍຂອງວັນດຽວກັນຄະນະຜູ້ແທນກໍໄດ້ລົງຫາສຽງຢູ່ປກສແຂວງໂດຍທ່ານພັນເອກສົມຈັນແກ້ວຈັນດາຫົວໜ້າກອງບັນຊາການປກສແຂວງໄດ້ລາຍງານການກະກຽມຕໍ່ການປ່ອນບັດວ່າປກສແຂວງໄດ້ກຳນົດຢູ່ 5 ຈຸດ, ມີຜູ້ໃຊ້ສິດທັງໝົດ 1.535 ຄົນ, ຍິງ 240 ຄົນ. ພ້ອມນັ້ນຄະນະຜູ້ແທນຍັງຈະໄດ້ເດີນທາງໄປຫາສຽງຢູ່ 7 ເມືອງເໜືອຄື: ເມືອງປາກອູ, ນ້ຳບາກ, ງອຍ, ວຽງຄຳ, ໂພນທອງ, ພູຄູນ, ເມືອງນານແລະເມືອງຊຽງເງິນຕື່ມອີກ.
ທີ່ມາ: