ສຳນັກຂ່າວຕ່າງປະເທດ ລາຍງານໃນວັນທີ 1 ມີນານີ້ວ່າ ກອງທັບເຮືອຈີນ ໄດ້ເປີດໂຕ ອູ່ສ້ອມແປງກ່ຳປັ່ນ ລອຍນ້ຳເຄື່ອນທີ່ (self-propelled floating dock) ແຫ່ງທຳອິດຂອງປະເທດ ຊື່ ອູ່ກ່ຳປັ່ນຫົວຊວນ ເລກ 1 (Huachuan No.1) ຊຶ່ງສາມາດເດີນທາງອອກໄປສ້ອມແປງ ກຳປັ່ນສູ້ຮົບທີ່ຖືກເສຍຫາຍ ທີ່ຢູ່ຫ່າງໄກຈາກຊາຍຝັ່ງ ໃຫ້ສາມາດກັບຄືນມາມີປະສິດທິພາບ ໃນການສູ້ຮົບຢ່າງເຕັມກຳລັງພາຍໃນເວລາວ່ອງໄວ ແລະ ຖືກອອກແບບມາ ເພື່ອນຳໃຊ້ໃນພື້ນທີ່ສູ້ຮົບທາງທະເລໂດຍສະເພາະ ຊຶ່ງນັບເປັນຄວາມພະຍາຍາມຂອງກອງທັບຈີນ ໃນການພັດທະນາສັກກະຍະພາບກອງທັບເຮືອ ໃຫ້ມີຄວາມທັນສະໄໝ.
ໜັງສືພິມ PLA Daily ກະບອກສຽງຂອງກອງທັບປົດປ່ອຍປະຊາຊົນຈີນ ໄດ້ລະບຸວ່າ ອູ່ກຳປັ່ນລອຍນ້ຳ ຖືເປັນນະວັດຕະກຳໃໝ່ ທີ່ຈະຊ່ວຍໃຫ້ການສ້ອມແປງກຳປັ່ນສູ້ຮົບຂະໜາດໃຫຍ່ໆ ບໍ່ຈຳເປັນຕ້ອງເພິ່ງພາອູ່ສ້ອມແປງຢູ່ຊາຍຝັ່ງສະເໝີໄປ ແຕ່ຈະສາມາດເຮັດໄດ້ ເຖິງແມ່ນຈະຢູ່ກາງທະເລ.