ສຳນັກຂ່າວເອເອຟພີລາຍງານເມື່ອວັນທີ 27 ກຸມພາວ່າ ນາງ ມາຣີຊອລ ຕູເຣນ ລັດຖະມົນຕີສາທາລະນຸສຸກຢືນຢັນ ພົບຄົນເຈັບຍິ່ງລາຍທຳອິດທີ່ຕິດເຊື້ອໄວຣັສຊິກາຜ່ານທາງເພດສຳພັນຈາກຄູ່ຮັກຂອງລາວ ຊຶ່ງມີປະຫວັດເດີນທາງກັບຈາກບຣາຊິລ ປະເທດທີ່ມີການແພ່ລະບາດເຊື້ອຮຸນແຮງທີ່ສຸດ.
ນາງ ຕູເຣນລະບຸວ່າ ຜູ້ຕິດເຊື້ອແລະຄູ່ຮັກອາໄສຢູ່ໃນປາຣີ ປະເທດຝຣັ່ງ, ແນວໃດກໍຕາມ ລາວສະແດງອາການຂອງເຊື້ອຊິກາຕາມປົກກະຕິ ແຕ່ບໍ່ໄດ້ເຂົ້າຮັບການຮັກສາຕົວໃນໂຮງໝໍ ແລະຍັງມີສຸຂະພາບດີ.
ຂະນະດຽວກັນ ສຳນັກຂ່າວເອເອຟພີລະບຸວ່າ ພຽງ 1 ອາທິດ ປະເທດໂຄໂລມບີພົບຜູ້ຕິດເຊື້ອເພີ່ມ 5.685 ຄົນ ລວມຍອດຢູ່ທີ່ 42.706 ຄົນ ແລະເປັນຍິງຖືພາ 7.653 ຄົນ ໂດຍເຊື້ອຊິກາສາມາດເຮັດໃຫ້ລູກທີ່ຢູ່ໃນທ້ອງຍິງຕິດເຊື້ອປະສົບສະພາວະຫົວນ້ອຍຜິດປົກກະຕິໄດ້.
ທັງນີ້ ອົງການອະນາໄມໂລກລາຍງານວ່າພົບການແພ່ລະບາດເຊື້ອໃນ 46 ປະເທດ ແລະຍຸງລາຍອັນເປັນພະຫະຂອງເຊື້ອສາມາດພົບໄດ້ໃນ 130 ປະເທດທົ່ວໂລກ ປະຈຸບັນ ເຊື້ອໄວຣັສນີ້ຍັງບໍ່ມີການຮັກສາ.