ຕາມການລາຍງານຂອງກະຊວງອຸດສະຫະກໍາ ແລະ ການຄ້າ ໃນວັນທີ 23 ກຸມພານີ້ໃຫ້ຮູ້ວ່າ: ໃນວັນທີ 12 ທັນວາ 2015 ຜ່ານມາ, ໂທລະພາບຊ່ອງ 7 ແລະ ໜັງສືພິມບາງກອກໂພສຂອງໄທ ໄດ້ລາຍງານຂ່າວວ່າ: ໃນວັນທີ 11 ທັນວາ 2015 ເຈົ້າໜ້າທີ່ພາສີໄທ ໄດ້ຍຶດສີນຄ້ານໍາຜ່ານຜິດກົດໝາຍ ໃນວັນທີ 10 ທັນວາ 2015, ຊຶ່ງປະກອບມີ: ງາຊ້າງຈໍານວນ 789 ກິໂລ ແລະ ເກັດລິ່ນ 587 ກິໂລ, ພ້ອມລະບຸວ່າ ສີນຄ້າດັ່ງກ່າວ ແມ່ນນໍາມາຈາກປະເທດໄນຈີເຣຍ ຜ່ານສິງກະໂປ ແລ້ວຜ່ານຣາຊະອານາຈັກໄທ ເພື່ອສົ່ງໄປປະເທດປາຍທາງຄື ສປປ ລາວ ໂດຍແມ່ນ ບໍລິສັດ ເຄເອັນທີ ເທຣດດິງ (KNT Trading) ເປັນຜູ້ຮັບສີນຄ້າຢູ່ລາວ ແລະ ເມື່ອມີການລາຍງານຂ່າວດັ່ງກ່າວ, ກົມການນໍາເຂົ້າ-ສົ່ງອອກ ກໍໄດ້ປະສານສົມທົບກັບ ເຈົ້າໜ້າທີ່ຄຸ້ມຄອງທະບຽນວິສາຫະກິດ ກະຊວງອຸດສະຫະກໍາ ແລະ ການຄ້າລາວ ເພື່ອກວດກາໃນຖານຂໍ້ມູນວິສາຫະກິດແຫ່ງຊາດ ແລະ ກໍບໍ່ປາກົດເຫັນມີຊື່ບໍລິສັດດັ່ງກ່າວ.
ການຍຶດງາຊ້າງນໍາເຂົ້າປະເທດຂອງທາງການໄທ ເປັນບັນຫາທີ່ເຄີຍເກີດຂຶ້ນ, ຊຶ່ງໄລຍະຜ່ານມາໂທລະພາບຊ່ອງ 3, ໜັງສືພິມຜູ້ຈັດການ ແລະ ໜັງສືພີມອື່ນໆຂອງໄທ ກໍເຄີຍອອກຂ່າວການຍຶດງາຊ້າງນໍາຜ່ານໄທ ເພື່ອເຂົ້າມາລາວ 2 ຄັ້ງຄື: ໃນວັນທີ 20 ເມສາ 2015 ແລະ ວັນທີ 26 ເມສາ 2015 ໂດຍກ່າວວ່າມີ 2 ບໍລິສັດ ທີ່ຈະຮັບສີນຄ້າຢູ່ປາຍທາງ ສປປ ລາວ ຄື: ບໍລິສັດ ມະນີສຸກການຄ້າລາວ ແລະ ບໍລິສັດ ສຸກປະສົງຂາອອກ-ຂາເຂົ້າ ຈໍາກັດ, ແຕ່ຜ່ານການກວດກາຕົວຈິງ ຂອງເຈົ້າໜ້າທີ່ກ່ຽວຂ້ອງຂອງລາວ ທັງ 2 ບໍລິສັດແມ່ນບໍ່ມີຕົວຕົນໃນລາວ.
ສປປ ລາວ ເປັນພາຄີຂອງສົນທິສັນຍາໄຊເຕັດ(CITES) ນັບແຕ່ປີ 2004 ເປັນຕົ້ນມາ, ສະນັ້ນ ການຈັດຕັ້ງປະຕິບັດພັນທະສັນຍາດັ່ງກ່າວ ຖືວ່າເປັນວຽກບູລິມະສິດຂອງລັດຖະບານ, ຕໍ່ບັນຫາດັ່ງກ່າວ ເຈົ້າໜ້າທີ່ກ່ຽວຂ້ອງຂອງລາວ ຈະປະສານສົມທົບກັບເຈົ້າໜ້າທີ່ຝ່າຍໄທ ໃນການສືບຫາຂໍ້ມູນຄວາມຈິງຕື່ມອີກ ເພື່ອບໍ່ໃຫ້ເສຍພາບພົດແກ່ ສປປ ລາວ ໃນຖານະເປັນພາຄີຂອງສົນທິສັນຍາດັ່ງກ່າວ.
ແຫລ່ງຂ່າວ:
