ພະແນກການເງິນແຂວງອັດຕະປືໄດ້ວາງເປົ້າໃນການເກັບລາຍຮັບເຂົ້າງົບປະມານໃນສົກປີນີ້ໃຫ້ບັນລຸ144 ຕື້ກວ່າກີບ ພ້ອມຢືນຢັນຖານະການເງິນມີຄວາມເຂັ້ມແຂງໃນການໃຊ້ຈ່າຍເງິນເດືອນແກ່ພະນັກງານຢ່າງເປັນປົກຖະຕິຂະນະທີ່ລາຍຮັບສ່ວນໃຫຍ່ຂອງແຂວງແມ່ນໄດ້ຈາກການເກັບພາສີທີ່ດິນຈາກການລົງທຶນຂອງຕ່າງປະເທດ.
ທ່ານ ບຸນທະມາລີ ໝັ້ນອານົງ ຫົວໜ້າພະແນກການເງິນແຂວງອັດຕະປືໃຫ້ສຳພາດຕໍ່ນັກຂ່າວໜັງສືພິມເສດຖະກິດ-ສັງຄົມເມື່ອບໍ່ດົນມານີ້ໃຫ້ຮູ້ວ່າ:ສຳລັບແຜນການຈັດຕັ້ງໃນການເກັບລາຍຮັບເຂົ້າງົບປະມານປີ 2015-2016 ແຂວງອັດຕະປືແມ່ນຈະໄດ້ຈັດຕັ້ງປະຕິບັດຕາມການມອບໝາຍຂອງລັດຖະບານກໍ່ຄືກະຊວງການເງິນໃຫ້ໄດ້ຈຳນວນທັງໝົດ 144 ຕື້ກວ່າກີບ, ທຽບໃສ່ປີຜ່ານມາເພີ່ມຂຶ້ນ 3%, ໃນນັ້ນແມ່ນລາຍຮັບຈາກສ່ວຍສາອາກອນ 129 ຕື້ກວ່າກີບ, ລາຍຮັບຄຸ້ມຄອງຊັບ ສິນ 15 ຕື້ກວ່າກີບ ຊຶ່ງມາຮອດປະຈຸ ໄດ້ແລ້ວ 51,7 ຕື້ກີບ ທຽບໃສ່ແຜນການປະຕິບັດໄດ້ 30% ໃນນັ້ນມີລາຍຮັບຈາກອາກອນ 38,4 ຕື້ກີບ ຄຸ້ມຄອງຊັບສິນທີ່ດິນລັດປະມານ 4,9 ຕື້ກີບ.
ຢ່າງໃດກໍຕາມສຳລັບໃນ 6 ເດືອນທ້າຍປີແມ່ນຈະໄດ້ສູ້ຊົນເຮັດໃຫ້ການເກັບລາຍໃຫ້ໄດ້ຕາມແຜນທີ່ວາງໄວ້ ແລະ ເຊື່ອການຈັດຕັ້ງປະຕິບັດຈະໄດ້ຕາມລະດັບຄາດໝາຍ100%, ເນື່ອງຈາກວ່າໃນປະຈຸບັນໄດ້ມີການລົງທຶນເຂົ້າໃສ່ໃນຫຼາຍໂຂງເຂດໂດຍສະເພາະແມ່ນບໍລິສັດຮວາງແອງຢາລາຍເປັນບໍລິສັດຍັກໃຫຍ່ເຂົ້າມາລົງທຶນໃນແຂວງອັດຕະປື ແລະໂຄງການສ່ວນໃຫຍ່ຂອງບໍລິສັດດັ່ງກ່າວແມ່ນການສຳປະທານເນື້ອທີ່ດິນ, ນອກນີ້ຍັງບັນດາການລົງທຶນຕ່າງໆທັງພາຍໃນ ແລະຕ່າງປະເທດທີ່ເຫັນວ່າມີທ່າແຮງເພີ່ມຂຶ້ນ.
ທ່ານຫົວໜ້າພະແນກໃຫ້ຮູ້ຕື່ມວ່າ:ສຳລັບລາຍຈ່າຍສົກປີ 2015-2016 ນີ້ແຂວງອັດຕະປືຈະຄຸ້ມຄອງໃຫ້ຢູ່ໃນລະດັບ 300 ຕື້ກີບ ຊຶ່ງເປັນຕົວເລກທີ່ສາມາດຕອບສະໜອງລາຍຈ່າຍເງິນເດືອນໃຫ້ແກ່ພະນັກງານລັດຢູ່ແຂວງຢ່າງປົກກະພ້ອມດຽວກັນແຂວງອັດຕະປືຍັງໄດ້ຊອກຫາລາຍຮັບທີ່ໝັ້ນຄົງດ້ວຍການລົງສຳຫຼວດທີ່ດິນຄືນໃໝ່ໃນບາງບ້ານບາງເມືອງທີ່ເຫັນວ່າປະຊາຊົນມີການຈັບຈ່ອງທີ່ດິນບໍ່ມີເອກະສານຄົບຖ້ວນທີ່ສຳຄັນໃນເວລານີ້ແມ່ນໄດ້ທົດລອງທີ່ບ້ານໃຫຍ່ເຊໝານ ເມືອງສາມັກຄີໄຊຊຶ່ງປາກົດວ່າມີການຈັບຈ່ອງທີ່ດີນບໍ່ຖືກລະບຽບກົດໝາຍ ແລະຄາດວ່າຖ້າປະຊາຊົນຫາກເຂົ້າມາເສຍພາສີທີ່ດິນແລ້ວພາຍໃນບ້ານດຽວຈະມາດເກັບລາຍຮັບໄດ້ເພີ່ມຂຶ້ນຫຼາຍຕື້ກີບຫຼັງຈາກນັ້ນແມ່ນຈະໄດ້ມີການສືບຕໍ່ໄປບ້ານໃໝ່ ແລະສືກສາເບິ່ງຄວາມເປັນໄປໄດ້, ຜົນດີ ແລະ ຜົນກະທົບກັນອີກເທື່ອໃໝ່.
ທີ່ມາ: