ຊາຍອາຍຸກວ່າ 50 ປີ ໄດ້ສິ້ນລົມຫາຍໃຈໃນຂະນະທີ່ໜ່ວຍກູ້ໄພໄດ້ນຳສົ່ງໂຮງໝໍ ພາຍຫຼັງເກີດອຸບັດເຫດລົດລົ້ມ ຢູ່ເສັ້ນທາງເລກທີ 11 ເຂດບ້ານນາສຳພັນ ເມືອງສັງທອງ ນະຄອນຫຼວງວຽງຈັນ.
ເຈົ້າໜ້າທີ່ຈະລາຈອນ ເມືອງສັງທອງໃຫ້ຮູ້ວ່າ: ຜູ້ເສຍຊີວິດຊື່ທ້າວ ແກ້ວ ອາຍຸ 52 ປີ ຢູ່ບ້ານປາກຕອນ ເມືອງສັງທອງ ນະຄອນຫຼວງວຽງຈັນ ຜູ້ກ່ຽວໄດ້ຂັບຂີ່ລົດຈັກ (ບໍ່ມີໝາຍເລກທະບຽນ) ແກ່ເຄື່ອງນຸ່ງຫົ່ມມຸ້ງໜ້າມາແຕ່ບ້ານ ປາກຕອນ ແຕ່ຍ້ອນຂັບມາດ້ວຍຄວາມໄວບວກກັບສະພາບ ເສັ້ນທາງເປ່ເພຢ່າງໜັກ, ເສັ້ນທາງຂາດຈິ່ງເຮັດໃຫ້ຜູ້ກ່ຽວ ຫັກຫຼີກຂຸມແລ້ວເກີດລົດລົ້ມກ່ອນຈະມີໜ່ວຍກູ້ໄພມາຊ່ວຍເຫຼືອ ຊຶ່ງກໍບໍ່ສາມາດຊ່ວຍຕໍ່ລົມຫາຍໃຈໄວ້ໄດ້ເພາະຜູ້ກ່ຽວໄດ້ເສຍຊີວິດໃນເວລານຳສົ່ງໂຮງໝໍ.
ເຈົ້າໜ້າທີ່ຈະລາຈອນ ເມືອງສັງທອງ ຍັງໃຫ້ຮູ້ຕື່ມວ່າ: ຜ່ານມາຢູ່ເສັ້ນທາງດັ່ງ ກ່າວໄດ້ເກີດອຸບັດເຫດມາຫຼາຍຄັ້ງ ແລະ ມີຜູ້ເສຍຊີວິດມາແລ້ວຫຼາຍຄົນ ຍ້ອນເສັ້ນ ທາງເປ່ເພ ແລະບໍ່ມີການສ້ອມແປງ ຊຶ່ງ ເພື່ອແກ້ໄຂສະເພາະໜ້າເຈົ້າໜ້າທີ່ໄດ້ ນຳເອົາປ້າຍໄປຕິດຕັ້ງເຕືອນຜູ້ຂັບຂີ່ໃຫ້ມີຄວາມລະມັດລະວັງ, ແຕ່ແນວໃດກໍດີ ຢາກໃຫ້ໜ່ວຍງານທີ່ກ່ຽວຂ້ອງຮີບຮ້ອນ ສ້ອມແປງໃຫ້ເສັ້ນທາງກັບມາມີສະພາບ ປົກກະຕິ ເພື່ອບໍ່ເຮັດໃຫ້ເກີດອຸບັດເຫດ ເກີດຂຶ້ນດັ່ງທີ່ຜ່ານມາ.