ທາງການລັດເວີຈີເນຍ ພາກໃຕ້ຂອງອາເມລິກາລາຍງານວ່າ ເກີດພາຍຸຟ້າຮ້ອງ ແລະ ທໍນາໂດຖະຫຼົ່ມພື້ນທີ່ຕາເວັນອອກສຽງໃຕ້ ແລະ ທາງຝັ່ງຕາເວັນອອກຂອງປະເທດ ເມື່ອວັນພຸດ (24 ກຸມພາ) ຕາມເວລາທ້ອງຖິ່ນ ເຮັດໃຫ້ມີຜູ້ເສຍຊີວິດຢ່າງໜ້ອຍ 3 ຄົນໃນລັດເວີຈີເນຍ.

ເຫດການພາຍຸຖະຫຼົ່ມຫຼ້າສຸດນີ້ເກີດຂຶ້ນຫຼັງຈາກມີທໍນາໂດ ຖະຫຼົ່ມລັດມິສຊິສຊິບປີແລະລຸຍເຊຍນາ ທາງພາກໃຕ້ຂອງສະຫະລັດເມື່ອວັນອັງຄານ (23 ກຸມພາ) ຈົນມີຜູ້ເສຍຊີວິດ 3 ຄົນແລະທຳລາຍບ້ານເຮືອນປະຊາຊົນຈຳນວນຫຼາຍ ຂະນະທີ່ຜູ້ວ່າການຂອງທັງສອງລັດຕ້ອງປະກາດສະຖານະການສຸກເສີນ ເພື່ອຮັບມືໄພພິບັດດັ່ງກ່າວ.
ຂະນະທີ່ຕຳຫຼວດລັດເວີຈີເນຍເຜີຍວ່າ ເຫຍື່ອພາຍຸທັງ 3 ຄົນ ຊຶ່ງເປັນຊາຍສອງຄົນ ອາຍຸ 50 ປີ ແລະ 26 ປີ ແລະເດັກຊາຍ 2 ປີໜຶ່ງຄົນ ເສຍຊີວິດເນື່ອງຈາກລົດບ້ານຂອງພວກເຂົາຖືກດູດເຂົ້າໄປໃນພາຍຸ ເຮັດໃຫ້ຮ່າງຂອງພວກເຂົ້າເດັນໄປໄກຈາກຈຸດທີ່ພົບປະມານ 300 ແມັດ.

ທາງສຳນັກງານບໍລິການອາກາດແຫ່ງຊາດເຕືອນວ່າ ອາດເກີດທໍນາໂດຕັ້ງແຕ່ໃນເມືອງຣາລີ ລັດນ໋ອດແຄໂຣໄລນາ ຂຶ້ນເໜືອໄປເຖິງຫຼາຍພື້ນທີ່ໃນລັດເວີຈີເນຍ ລັດແມຣີແລນ ລັດເພນຊິລເວເນຍ ແລະ ນະຄອນຫຼວງວໍຊິງຕັນ ດີຊີ.