ເມືອງໄຊທານີ ນະຄອນຫຼວງວຽງຈັນ ໄດ້ຈັດງານຕະຫຼາດນັດວາງສະແດງຂາຍສິນຄ້າເປັນຄັ້ງທຳອິດໃນວັນທີ 19 ກຸມພາ 2016 ທີ່ບ້ານພະຂາວ ໂດຍເປັນປະທານຂອງທ່ານ ຈັນທະລາ ອິນທະລັງສີ ເຈົ້າເມືອງໆໄຊທານີ ເປັນກຽດເຂົ້າຮ່ວມຂອງທ່ານ ຮສຈ. ດຣ. ທອງສະລິດ ມັງໜໍ່ເມກ ຫົວໜ້າສະຖະບັນການເມືອງການປົກຄອງແຫ່ງຊາດ ພ້ອມດ້ວຍບັນດາຄອບຄົວຕົວແບບນັກທຸລະກິດຊາວຄ້າຂາຍຊາວກະສີກອນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.
ການຈັດງານວາງສະແດງຂາຍສິນຄ້າໃນຄັ້ງນີ້ ກໍເພື່ອເປັນການຢັ້ງຢືນໃນການຈັດຕັ້ງແຜນພັດທະນາເສດຖະກິດ-ສັງຄົມຂອງເມືອງໄຊທານີ ພ້ອມທັງສ້າງເງື່ອນໄຂໃຫ້ຊາວກະສີກອນຊ່າງຫັດຖະກຳຄອບຄົວຕົວແບບຫົວໜ່ວຍທຸລະກິດດ້ານຕ່າງໆພາຍໃນເມືອງ ແລະ ຕ່າງເມືອງໄດ້ນຳເອົາຜະລິດຕະພັນຂອງຕົນມາວາງສະແດງຂາຍອອກສູ່ສັງຄົມ ທັງນີ້ ກໍເພື່ອກະຕຸກຊຸກຍູ້ການຜະລິດສິນຄ້າຂອງປະຊາຊົນຄອບຄົວຕົວແບບຜະລິດສິນຄ້າໃຫ້ເຕີບໃຫຍ່ເຂັ້ມແຂງເປີດ ກວ້າງດ້ານການຄ້າການບໍລິການການທ່ອງທ່ຽວຂອງເມືອງໃຫ້ຂະຫຍາຍຕົວກວ້າງຂວາງຂຶ້ນຕື່ມ ທັງເປັນການແລກ ປ່ຽນບົດຮຽນຂອງຊາວກະສິກອນຊ່າງຫັດຖະກຳຄອບຄົວຕົວແບບຜູ້ຜະລິດສິນຄ້າໂອດ໋ອບຂອງເມືອງ.
ສຳລັບຮ້ານວາງສະແດງ ແລະຂາຍສິນຄ້າໃນງານຄັ້ງນີ້ມີຈຳນວນທັງໝົດ 141 ຮ້ານ ໃນນັ້ນຜົນຜະລິດຂອງປະຊາ ຊົນໃນເມືອງ 104 ບ້ານມີ 33 ຮ້ານ ຊຶ່ງລວມມູນຄ່າສິນຄ້າທັງ ໝົດ 773,8 ລ້ານກີບ ປະກອບມີຜະລິດ ຕະພັນສິນຄ້າໂອດ໋ອບການຜະລິດກະສິ ກຳຂອງຄອບຄົວຕົວແບບບັນດາເຄື່ອງອຸດສາຫະກຳຫັດຖະກຳເຄື່ອງເຟີນິເຈີ ແລະບໍລິສັດຕົວແທນຈຳໜ່າຍຜະລິດຕະພັນສິນຄ້າຕ່າງແຂວງບັນດາຮ້ານບໍລິການໄດ້ຂາຍສິນຄ້າທົ່ວໄປຮ້ານກິນດື່ມ ແລະຮ້ານອາຫານ ນອກນີ້ ຍັງມີລາຍການຄົບງັນມ່ວນຊື່ນຕ່າງໆ ໂດຍຈະດຳເນີນເປັນໄລຍະ 5 ວັນ ຊຶ່ງເລີ່ມແຕ່ວັນທີ 19-24 ກຸມພາ 2016.
ທີ່ມາ: ນສພ ເສດຖະິກດ-ສັງຄົມ
