ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສະຫະລັດອາເມຣິກາ ປະຈຳ ສປປ.ລາວ ທ່ານ ດານຽລ ເອ. ຄລູນ ໄດ້ມອບອາຄານໂຮງຮຽນມັດທະຍົມຫຼັງໃໝ່ ຢູ່ແຂວງຄຳມ່ວນໃຫ້ແກ່ທ່ານຮອງເຈົ້າແຂວງຄຳມ່ວນ ທ່ານ ຄຳສີ ອຸດທິວົງ ເຊິ່ງພິທີ ມອບ-ຮັບ ແມ່ນໄດ້ຈັດຂຶ້ນໃນວັນທີ 18 ກຸມພາ 2016 ທີ່ເມືອງມະຫາໄຊ ແຂວງຄໍາມ່ວນ ໂດຍໂຄງການຊ່ອຍເຫຼືອດັ່ງກ່າວມີມູນຄ່າ 639.070 ໂດລາສະຫະລັດ ເຊິ່ງອາຄານຮຽນຫຼັງໃໝ່ ເປັນອາຄານສອງຊັ້ນ ມີຫ້ອງຮຽນ 8 ຫ້ອງ ຫ້ອງການຄູ 2 ຫ້ອງ ແລະ ຫໍພັກ 1 ຫຼັງ ໃຫ້ແກ່ໂຮງຮຽນ ມັດທະຍົມສຶກສາສົມບູນໂພນສະອາດ ທີ່ເມືອງມະຫາໄຊ ນອກຈາກນີ້ ຍັງໄດ້ປະກອບໂຕະຕັ່ງ ກະດານຄົບຊຸດ ແລະ ມີຫ້ອງນ້ຳໃໝ່ ພ້ອມທັງຕິດຕັ້ງລະບົບໄຟຟ້າ ແລະ ນ້ຳປະປາ ໃຫ້ແກ່ອາຄານຮຽນດັ່ງກ່າວ ເພື່ອຮອງຮັບຈຳນວນນັກຮຽນທີ່ເພີ່ມຂຶ້ນ.
…….ທ່ານ ເອກອັກຄະລັດຖະທູດ ແດນຽລ ເອ. ຄລູນ ໄດ້ກ່າວວ່າ ການສຶກສາແມ່ນມີຄວາມສຳຄັນທີ່ສຸດຕໍ່ການພັດທະນາເສດຖະກິດ ແລະ ສັງຄົມຂອງທຸກໆປະເທດ ເຊິ່ງພວກເຮົາມີຄວາມພາກພູມໃຈທີ່ໄດ້ຮ່ວມມືກັບລັດຖະບານ ສປປ.ລາວ ໃຫ້ການຊ່ອຍເຫຼືອນັກຮຽນໃນທົ່ວປະເທດ ໂດຍການສະໜອງອາຄານຮຽນທີ່ມີຄຸນະພາບດີ ໃນວາລະພິທີທ່ານ ເອກອັກຄະລັດຖະທູດສະຫະລັດອາເມຣິກາ ຕາງໜ້າໃຫ້ລັດຖະບານ ແລະ ປະຊາຊົນສະຫະລັດອາເມຣິກາ ມອບໂຮງຮຽນ ແລະ ຫໍພັກ ດັ່ງກ່າວນີ້ ໃຫ້ແກ່ປະຊາຊົນແຂວງຄຳມ່ວນ ເພື່ອເປັນສັນຍາລັກຂອງຄວາມສຳພັນທີ່ພວມເຕີບໃຫຽ່ຂະຫຽາຍໂຕ ລະຫວ່າງສອງປະເທດ ໃນໄລຍະທີ່ຜ່ານມາ ລັດຖະບານສະຫະລັດອາເມຣິກາ ກໍໄດ້ສະໜອງໂຄງການຊ່ອຍເຫຼືອດ້ານມະນຸດສະທຳຢູ່ໃນເຂດຊົນນະບົດຂອງປະເທດລາວ ມາຮອດປັດຈຸບັນ ເປັນເວລາຫຼາຍກວ່າ 18 ປີ ຮວມມີ ໂຮງຮຽນ ສຸກສາລາ ລະບົບຊົນລະປະທານ ລະບົບນ້ຳສະອາດ ແລະໃນວັນທີ 19 ກຸມພາ 2016 ທ່ານເອກອັກຄະລັດຖະທູດ ຍັງຈະໄດ້ເດີນທາງໄປແຂວງບໍລິຄໍາໄຊ ເພື່ອມອບໂຮງຮຽນມັດທະຍົມຕອນຕົ້ນຫຼັງໃໝ່ຢູ່ເມືອງປາກຊັນ ແຂວງບໍລິຄໍາໄຊ ເຊິ່ງມີມູນຄ່າຫຼາຍກວ່າ 456.635 ໂດລາສະຫະລັດ ເຊິ່ງໂຮງຮຽນດັ່ງກ່າວນີ້ ແມ່ນເປັນສ່ວນນຶ່ງໃນຫຼາຍໆໂຄງການຊ່ອຍເຫຼືອດ້ານມະນຸດສະທຳທີ່ໄດ້ສ້າງສຳເລັດແລ້ວໃນປີທີ່ຜ່ານມາ.
ຂໍ້ມູນຈາກ http://www.vtetoday.la/