ສປປ ລາວ ເປັນປະທານອາຊຽນໃນປີ 2016, ຊຶ່ງເປັນປີທຳອິດຂອງການເປັນປະຊາຄົມອາຊຽນ ແລະ ເປັນປີທຳອິດຂອງການຈັດຕັ້ງປະຕິບັດວິໄສທັດ ປະຊາຄົມອາຊຽນ 2025. ດັ່ງນັ້ນ, ສປປ ລາວ ຈຶ່ງກຳນົດເອົາຄຳຂວັນ ສຳລັບການເປັນປະທານອາຊຽນ 2016 ຄື: “ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ”. ໃນນາມປະທານອາຊຽນ, ສປປ ລາວ ຈະຈັດກອງປະຊຸມວົງແຄບຂອງ ລັດຖະມົນຕີຕ່າງປະເທດອາຊຽນໃນວັນທີ 27 ກຸມພາ 2016 ທີ່ນະຄອນຫຼວງວຽງຈັນ.
ພະນະທ່ານ ທອງລຸນ ສີສຸລິດ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຈະເປັນປະທານກອງປະຊຸມດັ່ງກ່າວ, ຊຶ່ງຈະມີບັນດາລັດຖະມົນຕີຕ່າງປະເທດ, ເຈົ້າໜ້າທີ່ອາວຸໂສ ແລະ ຜູ້ແທນຈາກປະເທດສະມາຊິກອາຊຽນ, ລວມທັງເລຂາທິການໃຫຍ່ອາຊຽນ ແລະ ບັນດາພະນັກງານຈາກກອງເລຂາອາຊຽນເຂົ້າຮ່ວມ.
ກອງປະຊຸມວົງແຄບຂອງ ລັດຖະມົນຕີຕ່າງປະເທດອາຊຽນຄັ້ງນີ້ ແມ່ນກອງປະຊຸມຄັ້ງທຳອິດຂອງບັນດາລັດຖະມົນຕີຕ່າງປະເທດອາຊຽນ ພາຍໃຕ້ການເປັນປະທານອາຊຽນຂອງ ສປປ ລາວ ໃນປີ 2016. ໃນກອງປະຊຸມດັ່ງກ່າວ, ບັນດາລັດຖະມົນຕີຕ່າງປະເທດອາຊຽນ ຈະປຶກສາຫາລືກ່ຽວກັບວິທີການ ແລະ ແນວທາງ ເພື່ອຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ແຜນແມ່ບົດທັງ 3 ສະບັບ ທີ່ບັນດາຜູ້ນຳອາຊຽນໄດ້ຮັບຮອງເອົາ ໃນກອງປະຊຸມສຸດຍອດອາຊຽນຄັ້ງທີ 27 ເດືອນພະຈິກ 2015 ທີ່ຜ່ານມາ ແລະ ສປປ ລາວ ເຮົາກໍຈະນຳສະເໜີບູລິມະສິດ ສຳລັບປີເປັນປະທານ 2016. ນອກນັ້ນ, ກອງປະຊຸມຍັງຈະໄດ້ປຶກສາຫາລື ກ່ຽວກັບການພົວພັນພາຍນອກ ແລະ ຄວາມເປັນແກນກາງຂອງອາຊຽນ ໃນໂຄງສ້າງພາກພື້ນທີ່ຜັນແປໄປ, ລວມທັງແລກປ່ຽນຄຳຄິດຄຳເຫັນຕໍ່ບັນຫາພາກພື້ນ ແລະ ສາກົນ ທີ່ມີຄວາມສົນໃຈ ແລະ ຄວາມເປັນຫ່ວງຮ່ວມກັນ.
ກ່ອນການຈັດກອງປະຊຸມວົງແຄບຂອງ ລັດຖະມົນຕີຕ່າງປະເທດອາຊຽນ ຈະມີການຈັດກອງປະຊຸມຂອງຄະນະກຳມະການ ຜູ້ຕາງໜ້າຖາວອນປະຈຳອາຊຽນ ແລະ ກອງປະຊຸມເຈົ້າໜ້າທີ່ອາວຸໂສອາຊຽນໃນວັນທີ 25 ແລະ 26 ກຸມພາ 2016 ຕາມລຳດັບ.
ແຫລ່ງຂ່າວ:
