ສຳນັກຂ່າວຕ່າງປະເທດ ລາຍງານໃນວັນທີ 18 ກຸມພານີ້ວ່າ ທ່ານ ບາຣັກ ໂອບາມາ ປະທານາທິບໍດີ ແຫ່ງ ສະຫະລັດອາເມຣິກາ ຈະເດີນທາງໄປຢ້ຽມຢາມ ສາທາລະນະລັດກູບາ ໃນລະຫວ່າງວັນທີ 21-22 ມີນາ ຈະມາເຖິງນີ້ ອັນຈະກາຍເປັນການຢ້ຽມຢາມກູບາ ຄັ້ງທຳອິດຂອງປະທານາທິບໍດີ ສະຫະລັດອາເມຣິກາ ຂະນະທີ່ຍັງຢູ່ໃນຕຳແໜ່ງ ໃນຮອບກວ່າ 80 ປີ ນັບຕັ້ງແຕ່ປີ 1928 ເປັນຕົ້ນມາ.

ທັງນີ້ ເນື່ອງຈາກທ້າຍປີ 2014 ເປັນຕົ້ນມາ ປະທານາທິບໍດີ ບາຣັກ ໂອບາມາ ແຫ່ງ ສະຫະລັດອາເມຣິກາ ແລະ ທ່ານ ຣາອູນ ກາສໂຕຣ ປະທານປະເທດ ແຫ່ງ ສາທາລະນະລັດກູບາ ໄດ້ປະກາດວ່າ ທັງສອງຝ່າຍຈະເລີ່ມສ້າງຄວາມສຳພັນ ຊຶ່ງເປັນສັດຕູກັນມາກວ່າເຄິ່ງສະຕະວັດນັ້ນ ກັບຄືນມາສູ່ລະດັບປົກກະຕິ ໂດຍທີ່ ທ່ານ ໂອບາມາ ແລະ ກາສໂຕຣ ໄດ້ຈັດປະຊຸມຮ່ວມກັນເປັນຄັ້ງທຳອິດ ໃນເດືອນເມສາ 2015 ຜ່ານມາ ທີ່ປານາມາ ແລະ ຈັບມືກັນໃນກອງປະຊຸມ ນອກຮອບກອງປະຊຸມສະມັດຊາໃຫຍ່ ອົງການສະຫະປະຊາຊາດ ເມື່ອເດືອນກັນຍາປີດຽວກັນອີກດ້ວຍ.