ພາຍຫລັງເຫັນວ່ານະໂຍບາຍ 6 ສ ຄື: ສ ສະອາດ, ສ ສະຫງົບ, ສ ສະຫວ່າງ, ສ ສີຂຽວ, ສ ສະເໜ່ ແລະ ສ ສີວິໄລ ທີ່ນະຄອນຫລວງວຽງຈັນ ໄດ້ພະຍາຍາມຈັດຕັ້ງປະຕິບັດມາຫລາຍປີ ແຕ່ມີຄວາມຄືບໜ້າຊ້າ, ຄະນະນໍານະຄອນຫລວງວຽງຈັນ ຈຶ່ງໄດ້ກໍານົດຄໍາຂວັນ 5 ຮ່ວມຂຶ້ນມາອີກ ເພື່ອຍູ້ໜູນນະໂຍບາຍ 6 ສ ໃຫ້ບັນລຸຜົນເປັນຈິງເທື່ອລະກ້າວ, ໂດຍໄດ້ມີການເປີດເຜີຍຈາກ ທ່ານເຈົ້າຄອງນະຄອນຫລວງວຽງຈັນ ດຣ ສີນລະວົງ ຄຸດໄພທູນ ເມື່ອບໍ່ນານນີ້, ຊຶ່ງຄໍາຂວັນ 5 ຮ່ວມດັ່ງກ່າວປະກອບມີ: ຮ່ວມຢູ່, ຮ່ວມປົກປັກຮັກສາ, ຮ່ວມແກ້ໄຂບັນຫາອັນບໍ່ດີ, ຮ່ວມພັດທະນາ ແລະ ຮ່ວມກ້າວໄປຂ້າງໜ້າກັບນະຄອນຫລວງວຽງຈັນ, ຖ້າພວກເຮົາໝົດທຸກຄົນ ທີ່ດໍາລົງຊີວິດ, ເພິ່ງພາອາໄສ ແລະ ທໍາມາຫາກິນຢູ່ນະຄອນຫລວງວຽງຈັນ ໄດ້ພ້ອມກັນປະຕິບັດ 5 ຮ່ວມຢ່າງເປັນເຈົ້າການແລ້ວ ກໍຈະຊ່ວຍໃຫ້ການຈັດຕັ້ງປະຕິບັດ ນະໂຍບາຍ 6 ສ ຂອງນະຄອນຫລວງວຽງຈັນ ບັນລຸເປົ້າໝາຍວາງໄວ້ຢ່າງແນ່ນອນ.
ນະໂຍບາຍ 6 ສ ໄດ້ຖືກກໍານົດຂຶ້ນ ໃນມະຕິກອງປະຊຸມໃຫຍ່ຄັ້ງທີ V ຂອງ ອົງຄະນະພັກນະຄອນຫລວງວຽງຈັນ ແຕ່ປີ (2011-2015) ເພື່ອເປັນທິດທາງ ໃນການພັດທະນາຕົວເມືອງນະຄອນຫລວງວຽງຈັນ ເປັນເຂດທີ່ໜ້າຢູ່, ມີຄວາມສະຫງົບເປັນລະບຽບຮຽບຮ້ອຍ, ສະອາດສວຍງາມ ແລະ ມີສະພາບແວດລ້ອມທີ່ດີ.
ແຕ່ໃນໄລຍະຫລາຍປີຜ່ານມາ ການປະຕິບັດຕົວຈິງໃນແຕ່ລະ ສ ແມ່ນມີຄວາມຫຍຸ້ງຍາກ ແລະ ມີຄວາມຄືບໜ້າຊ້າ, ເນື່ອງຈາກພົວພັນກັບຫລາຍຂະແໜງ, ນິຕິກໍາ ຫລື ມາດຕະການ ໃນການຈັດຕັ້ງປະຕິບັດບໍ່ທັນຮັດກຸມ, ງົບປະມານມີຈໍາກັດ ແລະ ບັນຫາອັນສໍາຄັນ ແມ່ນການຮັບຮູ້ເຂົ້າໃຈ ແລະ ຕືນຕົວຂອງຄົນສັງຄົມ ໃນການປະຕິບັດນະໂຍບາຍດັ່ງກ່າວຍັງມີໜ້ອຍ.
ແຫລ່ງຂ່າວ:
