ວັນທີ 16 ກຸມພາຜ່ານມາ ທີ່ພະແນກແຜນການ ແລະການລົງທຶນແຂວງຫຼວງນ້ຳທາ ໄດ້ຈັດພິທີເຊັນສັນຍາວ່າດ້ວຍສຳປະທານສ້າງຕັ້ງ 3 ໂຄງການ ເປັນຕົ້ນແມ່ນໂຄງການສ້າງຕະຫຼາດອຸດສາຫະກຳ ແລະກະສິກຳ, ສະຖານີລົດໂດຍສານພາຍໃນ ແລະເຮືອນພັກ-ຮ້ານອາຫານຢູ່ບ້ານນາເຕີຍ ເມືອງ ແລະແຂວງຫຼວງນ້ຳທາ, ໂດຍເຂົ້າຮ່ວມຂອງທ່ານ ຄຳໄຫຼ ສີປະເສີດ ຫົວໜ້າຫ້ອງວ່າການປົກຄອງແຂວງຫຼວງນ້ຳທາ, ທ່ານ ຄອນ ທອງ ເລື່ອງຄຳມາ ຮອງຫົວໜ້າພະແນກແຜນການ ແລະການລົງທຶນແຂວງ, ທ່ານ ດູ ຫວ່າງດາ ອຳນວຍການບໍລິສັດການ ຄ້າຫວ່າງດາສິບສອງພັນນາ ຈຳກັດ, ມີຫົວໜ້າພະແນກການອ້ອມຂ້າງ ແລະພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ທອງສີ ກັນທະຈັກ ຫົວໜ້າ ຂະແໜງສົ່ງເສີມການລົງທຶນກ່າວວ່າ: ເພື່ອປະຕິບັດຕາມກົດໝາຍສົ່ງເສີມການລົງທຶນສະບັບເລກທີ 02/ສພຊ, ລົງວັນທີ 8 ກໍລະກົດ 2009 ແລະດຳລັດຈັດຕັ້ງປະຕິບັດສະບັບເລກທີ 119/ນຍລົງວັນທີ 20 ເມສາ 2011, ເພື່ອຄວາມຕ້ອງການພັດທະນາພື້ນຖານໂຄງລ່າງເສດຖະກິດ-ສັງຄົມ, ເພື່ອເອື້ອອຳນວຍຄວາມສະດວກແກ່ການພັດທະນາ ເສດຖະກິດ-ສັງຄົມຂອງເມືອງຫຼວງນ້ຳທາ ກໍຄືແຂວງຫຼວງນ້ຳທາ, ໂດຍອະນຸຍາດກໍ່ສ້າງ ແລະບໍລິການເຮືອນພັກ-ຮ້ານອາຫານເຂດບ້ານນາເຕີຍ, ເພື່ອປະກອບສ່ວນເຂົ້າໃນການພັດທະນາການທ່ອງທ່ຽວ, ອຳນວຍຄວາມສະດວກໃຫ້ແກ່ນັກທ່ອງທ່ຽວທັງພາຍໃນ ແລະຕ່າງປະເທດໃຫ້ມີສະຖານທີ່ພັກເຊົາທີ່ໄດ້ມາດຖານເປັນໜ້າພັກເຊົາ.
ຊຶ່ງເນື້ອທີ່ສຳປະທານກວ່າ 4 ເຮັກຕາມູນຄ່າສຳປະທານ 3 ພັນໂດລາຕໍ່ເຮັກຕາຕໍ່ປີຕະຫຼອດໄລຍະສຳປະທານ, ມູນຄ່າການລົງທຶນທັງໝົດ 2 ຕື້ກີບມີມູນຄ່າທຶນຈົດທະບຽນ 2 ຕື້ກີບ ໂດຍເປັນການລົງທຶນຂອງເອກະຊົນຕ່າງປະເທດ 90%, ພາຍໃນ 10%, ອາຍຸສຳປະທານ ແມ່ນ 30 ປີ ແລະຍົກເວັ້ນຄ່າສຳປະທານທີ່ດິນລັດສ່ວນໄລຍະກໍ່ສ້າງ 5 ປີ, ໂດຍ ແມ່ນບໍລິສັດການຄ້າຫວ່າງດາສິບສອງພັນນາຈຳກັດເປັນຜູ້ສຳປະທານ.
ໂອກາດດຽວກັນ ທ່ານ ຄອນທອງ ເລື່ອງຄຳມາຮອງຫົວໜ້າພະແນກແຜນການ ແລະການລົງທຶນແຂວງກັບ ທ່ານ ດູ ຫວ່າງດາ ອຳນວຍການບໍລິສັດການຄ້າຫວ່າງດາສິບສອງພັນນາຈຳກັດ ກໍໄດ້ລົງນາມເຊັນສັນຍາຮ່ວມກັນ ນອກນັ້ນ ຕອນທ້າຍພິທີ ທ່ານ ຄຳໄຫຼ ສີປະເສີດ ກໍໄດ້ກ່າວຍ້ອງຍໍຊົມເຊີຍຕໍ່ບໍລິສັດ ແລະທັງພາກລັດທີຈະເຮັດໃຫ້ເມືອງຫຼວງນ້ຳທາ ກໍຄືແຂວງຫຼວງນ້ຳທາທີ່ຈະມີໂສມໜ້າໃໝ່, ເນັ້ນໜັກໃຫ້ບໍລິສັດຈົ່ງປະຕິບັດລະບຽບກົດໝາຍຂອງ ສປປ ລາວ ຢ່າງເຂັ້ມງວດ ແລະປະຕິບັດຕາມສັນຍາແຕ່ລະມາດທັງເຊື່ອມໃຫ້ເລີກເຊິງເທົ່າທີ່ຄວນ ແລະເນັ້ນໜັກໃຫ້ທັງພາກລັດທີ່ກ່ຽວຂ້ອງຈົ່ງລົງກວດກາ ແລະຕິດຕາມຢ່າງໃກ້ຊິດທັງໃຫ້ອຳນວຍຄວາມສະດວກໃນການກໍ່ສ້າງທາງດ້ານພື້ນຖານໂຄງລ່າງ.
ທີ່ມາ: